Narendra Modi :
দেশত বিভাজন সৃষ্টি কৰাৰ চেষ্টা চলোৱা হৈছে বুলি দাবী প্ৰধানমন্ত্ৰী নৰেন্দ্ৰ মোদীৰ। তেওঁ সকলোকে এই ক্ষেত্ৰত সতৰ্ক আৰু সজাগ হ’বলৈ পৰামৰ্শ দিয়ে।
একে সময়তে তেওঁ কয় যে যিসকলে দেশত বিভাজন সৃষ্টি কৰিবলৈ চেষ্টা কৰি আছে তেওঁলোক সফল নহ’ব। বিবিচিৰ তথ্যচিত্ৰক লৈ সমগ্ৰ দেশতে বিতৰ্ক চলি থকা সময়ত প্ৰধামন্ত্ৰীৰ এই মন্তব্য তাৎপৰ্যপূৰ্ণ বুলি বিবেচিত হৈছে ।
বিদেশী সংবাদ মাধ্যমৰ তথ্যচিত্ৰই ভাৰতীয় সমাজত বিভাজন সৃষ্টি কৰি দেশৰ সাৰ্বভৌমত্ব ভেঙুচালি কৰাৰ চেষ্টা চলাইছে বুলি অভিযোগ উত্থাপন কৰিছে শাসকীয় ভাৰতীয় জনতা পাৰ্টি (বিজেপি) আৰু কেন্দ্ৰীয় চৰকাৰে ।
এই সকলোবোৰৰ পৰিপ্ৰেক্ষিতত প্ৰধানমন্ত্ৰীৰ মুখলৈ ঘূৰি আহিল ‘বিভাজন’ আৰু ‘একতা’ৰ কথা। শনিবাৰে এনচিচিৰ এক অনুষ্ঠানত দিল্লী কেণ্টনমেণ্টৰ কৰিয়াপ্পা ময়দানত উপস্থিত আছিল মোদী । তেওঁ কয় যে দেশৰ প্ৰগতিৰ একমাত্ৰ চাবিকাঠি হৈছে একতা। তেওঁ এইটোও দাবী কৰে যে সমগ্ৰ বিশ্বই দেশৰ যুৱশক্তিৰ ওপৰত দৃষ্টি ৰাখিছে ।
বিভাজন সন্দৰ্ভত তেওঁ কয়, “দেশ খন ভাঙিবলৈ বিভিন্ন প্ৰচেষ্টা কৰা হৈছে। ইয়াক ভাৰত মাতৃৰ সন্তানসকলৰ মাজত বিভক্ত কৰাৰ প্ৰয়াস কৰা হৈছে। এই সকলোবোৰ কৰি দেশৰ জনসাধাৰণৰ মাজত বিভাজন সৃষ্টি কৰিব নোৱাৰিব বুলিও মোদীয়ে দাবী কৰে ।
এক ঘণ্টীয়া তথ্যচিত্ৰখনত দুটা দশক পূৰ্বে গুজৰাটৰ তৎকালীন মুখ্যমন্ত্ৰী নৰেন্দ্ৰ মোদীৰ কাৰ্যকালত সংঘটিত গোধৰা কাণ্ড আৰু সাম্প্ৰদায়িক হিংসাৰ বিষয়ে বৰ্ণনা কৰা হৈছে।
কেন্দ্ৰীয় চৰকাৰে আৰম্ভণিৰে পৰা ‘দ্য মোদী কুৱেশ্ছন ‘ নামৰ তথ্যচিত্ৰখনত আপত্তি জনাই আহিছে। ইয়াক ‘প্ৰচাৰ’ বুলি অভিহিত কৰি, এইটো দাবী কৰা হৈছিল যে তথ্যচিত্ৰখন ঔপনিৱেশিক মানসিকতাৰ পৰা নিৰ্মাণ কৰা হৈছিল। অৱশ্যে, বিবিচিয়ে দাবী কৰে যে তথ্যচিত্ৰখন যথেষ্ট গৱেষণাৰ পাছত নিৰ্মাণ কৰা হৈছে। বিৰোধী নেতাসকলে মোদী চৰকাৰৰ পদক্ষেপক “চেঞ্চৰশ্বিপ” বুলি অভিহিত কৰিছে।
কিছুদিন পূৰ্বে, কেন্দ্ৰই ইউটিউব আৰু টুইটাৰৰ দৰে ছ’চিয়েল মিডিয়া প্লেটফৰ্মৰ পৰা বিবিচিৰ তথ্যচিত্ৰৰ লিংক আঁতৰাবলৈ নিৰ্দেশ দিছিল। ই তথ্য আৰু প্ৰযুক্তি মন্ত্ৰালয়ক তথ্য প্ৰযুক্তি নিয়ম, ২০২১-ৰ জৰুৰীকালীন ক্ষমতা প্ৰয়োগ কৰি প্ৰায় ৫০ টা টুইট আঁতৰাবলৈ নিৰ্দেশ দিছিল।
