Baksa:
বাগ্সা ফৰেষ্ট ডিভিজন, মুছলপুৰৰ অন্তৰ্গত ভাৰত-ভূটান সীমান্তৱৰ্তী দাওধাৰা সংৰক্ষিত বনাঞ্চলত বনৰক্ষী-চোৰাং চিকাৰীৰ মাজত সংঘৰ্ষ ৷ সংঘৰ্ষত দুটাকৈ চোৰাং চিকাৰী গুলীবিদ্ধ হয় ৷ আজি দিনৰ প্ৰায় ১০-৪৫ বজাত সংঘটিত এই সংঘৰ্ষত দুটা চোৰাং চিকাৰীক পাঁচটা হস্তনিৰ্মিত বন্দুক আৰু বন গাহৰিৰ মাংস সহিতে মানাহৰ বন বিভাগে আটক কৰিবলৈ সক্ষম হয় ৷
ধৃত চোৰাং চিকাৰী দুটা ডুমৰুগুৰিৰ গোপাল বাহাদুৰ আৰু বৰপামৰ ধৰ্মেন্দ্ৰ ওৱাৰী৷চোৰাং চিকাৰী দুটা বনৰক্ষীৰ গুলীত আঘাতপ্ৰাপ্ত হয় আৰু দুয়োকে চিকিৎসাৰ বাবে বৰপেটা চিকিৎসালয়লৈ প্ৰেৰণ কৰা হয় ৷
আনহাতে ঘটনাস্থলীৰ পৰা আন তিনিটা চোৰাং চিকাৰী পলায়ন কৰে বুলি জানিব পৰা গৈছে ৷ প্ৰাপ্ত তথ্য অনুসৰি দাওধাৰা সংৰক্ষিত বনাঞ্চলত চোৰাং চিকাৰীৰ অৱস্থিতিৰ উমান পাই মানাহৰ বন বিভাগক প্ৰথমে খবৰ দিছিল বেচৰকাৰী প্ৰকৃতিপ্ৰেমী সংগঠন মানাহ মাউজিগেন্দ্ৰি ইক’টুৰিজ্যিম ছচাইটিয়ে ৷
ইয়াৰ পাছতে মানাহৰ ভূঞাপাৰা ৰেঞ্জৰ ভাৰপ্ৰাপ্ত বন বিষয়া কামেশ্বৰ বড়োৰ নেতৃত্বত ককলাবাৰী বীটৰ বনৰক্ষী আৰু আন বনৰক্ষী সহিতে বন বিভাগৰ দলে অভিযান চলাইছিল দাওধাৰা সংৰক্ষিত বনাঞ্চলত ৷
বনাঞ্চলখনৰ এটুকুৰা ঠাইৰ পৰা ধোঁৱা ওলোৱা প্ৰত্যক্ষ কৰি বন বিভাগৰ দলে সন্তপৰ্ণে উক্ত স্থান তৰিৎ গতিৰে ঘেৰাও কৰে আৰু তাতেই চোৰাং চিকাৰীৰে সংঘৰ্ষ হয় ৷
জানিব পৰা মতে চোৰাং চিকাৰীয়ে হস্তনিৰ্মিত বন্দুকেৰে বন বিভাগৰ দলক আক্ৰমণ কৰিবলৈ লৈছিল যদিও বনৰক্ষীয়ে তাৰ পূৰ্বেই গুলীয়াই আঘাতপ্ৰাপ্ত কৰে দুই চোৰাং চিকাৰীক আৰু আটক কৰে দুয়োকে ৷
অৱশ্যে ছেগ বুজি আন তিনিটা চিকাৰী ঘটনাস্থলীৰ পৰা পলায়ন কৰে ৷ পৰৱৰ্তী সময়ত আহত দুই চোৰাং চিকাৰীক চিকিৎসাৰ বাবে বৰপেটালৈ প্ৰেৰণ কৰে বন বিভাগে ৷
