Guwahati Flood:
দুদিন ধৰি অব্যাহত থকা মুষলধাৰ বৰষুণৰ ফলত গুৱাহাটীৰ চৌদিশে এতিয়া কেৱল পানী আৰু পানী ৷ বিস্তৃৰ্ণ অঞ্চল জলমগ্ন হৈ সৃষ্টি হৈছে কৃত্ৰিম বানৰ।
যাৰ ফলস্বৰূপে ঠায়ে ঠায়ে ব্যাহত হৈ পৰিছে যাতায়ত ব্যৱস্থা। এনে কৃত্ৰিম বানৰ বাবে ইতিমধ্যে মহানগৰ প্ৰশাসনে বন্ধ ঘোষণা কৰিছে বহু শিক্ষানুষ্ঠান।
সদাব্যস্ত আৰ জি বৰুৱা ৰোডত একঁকাল পৰ্যন্ত পানী হোৱাৰ বিপৰীতে জু-ৰোডত কৃত্ৰিম বানৰ বাবে একপ্ৰকাৰ ব্যাহত পৰিছে যাতায়ত ব্যৱস্থা।
চলিতবৰ্ষৰ ভয়াৱহ কৃত্ৰিম বাবে মহানগৰীৰ বিভিন্ন শিক্ষানুষ্ঠান বন্ধ ঘোষণা কৰিছে । আনকি বাতিল কৰা হৈছে ছমহীয়া পৰীক্ষা ৷ আজি ছেণ্টমেৰিজকে ধৰি বিভিন্ন বিদ্যালয়ত হৈ থকা পৰীক্ষা সাময়িক ভাৱে স্থগিত ৰখাৰ ঘোষণা কৰিছে সংশ্লিষ্ট বিদ্যালয়ৰ কৰ্তৃপক্ষই ৷
উল্লেখ্য যে, ধাৰাষাৰ বৃষ্টিপাতৰ বাবে গুৱাহটী মহানগৰৰ অধিকাংশ অঞ্চল এতিয়া পানীৰ তলত। ৰাজগড় অনিল নগৰৰ কেতবোৰ উপ-পথত এবুকু পৰ্যন্ত পানী হোৱাৰ লগতে বাসগৃহৰ ভিতৰতো এককাল পানী হোৱাত জনজীৱন ব্যাহত হৈ পৰিছে। আবদ্ধ হৈ পৰিছে আবাসী সকল ৷ ঘৰৰ আছবাব এতিয়া পানীৰ তলত ৷ ইতিমধ্যে এছ ডি আৰ এফে আবদ্ধ লোক সকলক উদ্ধাৰৰ বাবে যুদ্ধকালীন তৎপৰতা অব্যাহত ৰাখিছে ৷
কৃত্ৰিম বানৰ কৱলত পৰা গুৱাহাটীৰ আন আন স্থানত অনুৰূপ ঘটনা সংঘটিত হোৱাৰ সম্ভাৱনা প্ৰকট হৈ পৰিছে।
উল্লেখ্য যে,বৃহস্পতিবাৰেও জু-ৰোডৰ ভাস্কৰ নগৰত সংঘটিত হয় ভূমিস্খলনৰ ঘটনা। বাসগৃহৰ ওপৰত খহি পৰিছিল দেৱাল-মাটি। অৱশ্যে কথমপিহে ৰক্ষা পৰে বাসগৃহৰ লোকসকল ৷
গাৰ্ডৱালখন খহি পৰাৰ পাছত মুকলি হোৱা স্থানেদি যিকোনো মুহূৰ্ততে চিৰিয়াখানাৰ পৰা ওলাই আহিব পাৰে জীৱ-জন্তু। যাকলৈ চিন্তিত হৈ পৰিছে চিৰিয়াখানাৰ দাঁতকাষৰীয়া আবাসী সকল ৷