GMC Hikes Property Tax In Guwahati:
মূল্যবৃদ্ধিৰ ভৰত কক্বকাই থকা জনতাক মাধমাৰ শোধাই এইবাৰ গুৱাহাটী পৌৰ নিগমে চাৰিগুণ বৃদ্ধি কৰিলে সম্পত্তি কৰৰ পৰিমাণ। বিদ্যুতৰ স্মাৰ্ট প্রিপেইড মিটাৰ সংস্থাপনৰ পাছত যিদৰে অবিশ্বাস্য হাৰত বিদ্যুৎ মাচুল বৃদ্ধি পাইছে, তেনেদৰেই গুৱাহাটীৰ অধিকাংশ আৱাসীলৈ সম্পত্তি কৰৰ পৰিমাণ চাৰিগুণ পর্যন্ত বৃদ্ধি কৰি জাননী জাৰি কৰাৰ ঘটনাই মহানগৰবাসীক ক্ষুব্ধ কৰি তুলিছে।
গুৱাহাটী পৌৰ নিগমে হঠাতে সম্পত্তি কৰৰ হাৰ বৃদ্ধি কৰাৰ প্ৰসংগত নিগমৰ কর্তৃত্বশীল বিষয়াই সদৰী কৰে যে গুৱাহাটী পৌৰ নিগমৰ অধীনস্থ অঞ্চলত ২০০৮-০৯ বৰ্ষত ভূমি সম্পত্তিৰ মূল্য নতুনকৈ নিৰ্ধাৰিত হৈছিল; কিন্তু ২০০৮-০৯ৰ পূৰ্বৰে পৰা গুৱাহাটীত যিসকল লোকে ঘৰ সাজি বসবাস কৰি আহিছে।
তেওঁলোকে সংশোধিত হাৰত সম্পত্তি কৰ ইমানদিনে পৰিশোধ কৰা নাছিল। শেহতীয়াকৈ গুৱাহাটী পৌৰ নিগমে সম্পত্তি কৰ সংগ্ৰহৰ সমগ্ৰ ব্যৱস্থাটো ছফটৱেৰৰ মাধ্যমৰে অনলাইনযোগে সংগ্ৰহ আৰম্ভ কৰাৰ লগে লগে গুৱাহাটীবাসীয়ে লাভ কৰিবলৈ ধৰিছে ভৰাতকৈ কে’বাগুণো অধিক হাৰত সম্পত্তি কৰৰ নিৰিখ।
জিএমচিৰ মতে বহু লোকে বিগত কেবা বছৰ ধৰি সম্পত্তি কৰ পৰিশোধেই কৰা নাছিল। আন কিছুসংখ্যক লোকে পৰিশোধ কৰিছিল যদিও পূৰ্বৰ হাৰতে আদায় দি আহিছিল; কিন্তু অনলাইন ব্যৱস্থা প্ৰৱৰ্তনৰ লগে লগে গুৱাহাটীৰ প্ৰতিঘৰ আৱাসীলৈ তেওঁলোকৰ সম্পত্তিৰ মূল্য পুনৰ নিৰ্ধাৰণ কৰি সেই হাৰত স্বয়ংক্রিয়ভাৱে সম্পত্তি কৰৰ বৰ্ধিত হাৰ প্ৰকাশ কৰা হৈছে।
পূৰ্বে বছৰি দুহেজাৰ টকা সম্পত্তি কৰ আদায় দি থকা গুৱাহাটীৰ একোটা পৰিয়ালৰ বৰ্তমানৰ সম্পত্তি কৰৰ নিৰিখ আঠ হেজাৰ টকালৈকে বৃদ্ধি পাইছে। কেৱল সেয়াই নহয়, বিগত কে’বা বছৰ ধৰি সম্পত্তি কৰ পৰিশোধ নকৰা তথা যিসকলে পূৰ্বৰ নিৰিখতে কৰ পৰিশোধ কৰি আহিছিল তেওঁলোকৰ ক্ষেত্ৰত ২০০৮-০৯ৰ সংশোধিত নিৰিখ প্রযোজ্য কৰি বকেয়া বিল প্ৰেৰণ কৰা হৈছে।
অর্থাৎ গুৱাহাটীৰ একো একোটা পৰিয়ালে কেৱল সম্পত্তি কৰ লাখৰ ঘৰত পৰিশোধৰ বাবে জাননী পাইছে। জিএমচিয়ে সংশ্লিষ্ট আৱাসীসকললৈ সুতে-মূলে কৰ আদায়ৰ ব্যৱস্থা প্ৰৱৰ্তনৰ সূত্ৰে এতিয়া হাহাকাৰ পৰিৱেশৰ সন্মুখীন হৈছে গুৱাহাটীবাসী।
ছফটৱেৰ ব্যৱস্থাৰে কৰ সংগ্ৰহৰ বাবেহে এনেদৰে প্ৰতিটো পৰিয়ালে জিএমচিক বৃহৎ অংকৰ ধন বকেয়াসহ আদায় দিবলগীয়া হৈছে বুলি জিএমচি কর্তৃপক্ষই দাবী কৰিছে। উল্লেখ্য যে ২০০৮-০৯ বিত্তীয় বৰ্ষতে সম্পত্তি কৰৰ হাৰ সংশোধন কৰি চাৰিগুণ পর্যন্ত বৃদ্ধি কৰিছিল; কিন্তু পৌৰ নিগম কর্তৃপক্ষই এই কথা ৰাজহুৱাভাৱে অৱগত কৰোৱাৰ পৰা বিৰত আছিল। ইমান বছৰে পূৰ্বৰ হাৰতে সম্পত্তি কৰ নিয়মীয়াকৈ পৰিশোধ কৰি অহা লোকসকলৰ ক্ষেত্ৰতো এতিয়া বকেয়া জাপি দিয়াত স্বাভাবিকতে ক্ষুব্ধ হৈছে গুৱাহাটীবাসী।
গুৱাহাটী পৌৰ নিগমৰ আয়ুক্তৰ মতে গুৱাহাটীত প্ৰায় ৯০ হেজাৰ পৰিয়ালে সংশোধিত হাৰৰ সম্পত্তি কৰ আদায় দিবলগা আছে। এই পৰিয়ালসমূহৰ পৰাহে বৰ্ধিত হাৰৰ সম্পত্তি কৰ আদায় লৈ থকা হৈছে। ইফালে, মহানগৰবাসীৰ মাজত গুৱাহাটী পৌৰ নিগম কৰ্তৃপক্ষৰ বিৰুদ্ধে সৃষ্টি হোৱা এনে ক্ষোভ আৰু অসন্তুষ্টিৰ কথা অৱগত হোৱাৰ পাছতে শেহতীয়াকৈ জিএমচিৰ মেয়ৰ মৃগেন শৰণীয়াই সম্পত্তি কৰ আদায় দিবলৈ বাকী থকা লোকসকলক ৩১ মে’ৰ পূৰ্বে ধন পৰিশোধ কৰিলে ১০ শতাংশ বেহাই দিব বুলি ঘোষণা কৰি আশ্বস্ত কৰিছিল।
নিৰ্দিষ্ট সময়ৰ বাবে ১০ শতাংশ হাৰত কৰ ৰেহাই দি মহানগৰবাসীক আশ্বস্ত কৰিব বিচাৰিলেও গোপনে সম্পত্তি কৰ চাৰিগুণ হাৰত বৃদ্ধি কৰাৰ সিদ্ধান্ত মহানগৰবাসীৰ বাবে এক সহিব নোৱাৰা বোজাৰূপে চিহ্নিত হৈছে।
জিএমচিয়ে সম্পত্তি কৰৰ হাৰ চাৰিগুণ বৃদ্ধি কৰি সুতে-মূলে মহানগৰবাসীৰ পৰা ধন সংগ্ৰহ কৰিবলৈ ধৰাৰ প্ৰসংগত আজি তীব্র প্রতিক্রিয়া প্ৰকাশ কৰি এই জনবিৰোধী সিদ্ধান্ত শীঘ্ৰেই বাতিল কৰি ৰাইজক সকাহ দিবলৈ চৰকাৰক দাবী জনাইছে সদৌ অসম ছাত্ৰ সন্থাৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই।
আছুৰ শীৰ্ষ নেতাজনে আজি কয় যে ২০০৮-০৯ বৰ্ষত জিএমচিয়ে গুৱাহাটীবাসীৰ সম্পত্তিৰ মূল্য পুনৰ নিৰ্ধাৰণ কৰিছিল। সেই সময়তে জিএমচিয়ে সম্পত্তি কৰৰ হাৰ চাৰিগুণ হাৰত বৃদ্ধি কৰিছিল। কিন্তু এই কথা আনুষ্ঠানিকভাৱে ৰাজহুৱা কৰা হোৱা নাছিল। কৰ পৰিশোধ কৰিবলৈ যোৱা লোকসকলৰ পৰা বৰ্ধিত হাৰত কৰ সংগ্ৰহ কৰি থকাৰ সমান্তৰালকৈ আন একাংশ লোকে আকৌ অজ্ঞতাৰ বাবে পূৰ্বৰ হাৰতে ইমান দিনে সম্পত্তি কৰ আদায় দি আহিছিল।
বিগত সময়ছোৱাত জিএমচিয়ে কোনোদিনে সম্পত্তি কৰ চাৰিগুণ হাৰত বৃদ্ধি কৰাৰ কথা ৰাজহুৱা নকৰি এতিয়া অনলাইন ব্যৱস্থাৰে বৰ্ধিত হাৰত সম্পত্তি কৰ সংগ্ৰহ আৰম্ভ কৰিবলৈ ধৰাতহে সৰ্বসাধাৰণ ৰাইজে কৰ বৃদ্ধিৰ কাৰচাজি অৱগত হৈছে। গুৱাহাটীত সম্পত্তি কৰ বৃদ্ধিৰ এই সিদ্ধান্ত লোৱাৰ পূৰ্বে গুৱাহাটীবাসীৰ মতামত গ্ৰহণ কৰিব লাগিছিল জিএমচিয়ে। কিন্তু তাকে নকৰি গুৱাহাটীবাসীৰ মূৰ্ত জাপি দিয়া হৈছে বর্ধিত কৰৰ বোজা।
২০০৮ৰ পূৰ্বে মূল্য নির্ধাৰিত হোৱা ঘৰসমূহৰ ক্ষেত্ৰত বৰ্ধিত কৰ প্ৰযোজ্য কৰাৰ এই ব্যৱস্থা দুৰ্ঘোৰ অন্যায় বুলি অভিহিত কৰি ভট্টাচাৰ্যই কয় যে ক’ভিড পৰিস্থিতিত জুৰুলা জনসাধাৰণৰ মূল্যবৃদ্ধি আৰু এনে উপর্যুপৰি কৰ বোজাই দিশহাৰা কৰি তুলিছে। এই জনবিৰোধী সিদ্ধান্ত শীঘ্ৰে বাতিল কৰিবলৈ তেওঁ চৰকাৰক দাবী জনায়।