Automobile industry stumbles as unsold vehicles pile up:
সন্মুখত উৎসৱৰ বতৰ। অথচ মন্দা গাড়ীৰ বজাৰ। বছৰ জুৰি ব্যৱসায় বেয়া হ’লেও উৎসৱৰ বতৰত সদায়ে বিক্ৰী বৃদ্ধি পায়। কিন্তু এইবাৰ এনে নহ’ল। গাড়ীৰ ডিলাৰৰ সংস্থা ‘ফেডাৰেচন অৱ অট’ম’বাইল ডিলাৰ্ছ এছ’চিয়েছন’ (ফাডা)ই জনোৱা মতে যাত্রীবাহী গাড়ী বিক্ৰীৰ বিপণীসমূহত মজুত থকা গাড়ীৰ পৰিমাণে বিগত বৰ্ষৰ সকলো পৰিসংখ্যা অতিক্রম কৰিছে।
ফাডাই কয় যে বিগত প্রায় ৭৫দিন ধৰি প্ৰায় ৭৮ হেজাৰ কোটি টকা মূল্যৰ মুঠ ৭.৮ লক্ষ গাড়ী শ্ব’ৰূমত পৰি আছে। গাড়ী নির্মাণকাৰী সংস্থাসমূহে উৎপাদন আৰু সৰবৰাহ ক্ৰমশঃ বৃদ্ধি কৰিছে। যাৰ ফলত বিপণীসমূহ (শ্ব’ৰূম)ৰ গুদামত বিক্ৰী নোহোৱা গাড়ী জমা হ’বলৈ ধৰিছে। ইয়াকে লৈ ডিলাৰসকলৰ মাজত বিত্তীয় দিশটোৰ প্ৰতি উদ্বেগ বৃদ্ধি পাইছে। কিয়নো মজুত থকা গাড়ীৰ বয়স ৩০দিনৰ অধিক হোৱাটো ডিলাৰৰ বাবে উদ্বেগৰ বিষয়।
এই সময়সীমা বৃদ্ধি হৈ ৬০দিন অতিক্ৰম কৰি প্ৰায় ৭৫ দিন পর্যন্ত হৈছে। ইয়াৰ অন্যতম কাৰণ হ’ল বেংকৰ পৰা ডিলাৰে গ্ৰহণ কৰা ঋণ ৬০ দিনৰ ভিতৰত সুতসহ ওভতাই দিয়ে। বিগত বছৰৰ এটা সময়ত ৬৫দিনৰ গাড়ী মজুত হৈছিল।
এই পৰিস্থিতিত প্রশ্ন হয় যে হঠাতে গাড়ী ক্ৰয়ৰ প্ৰতি গ্ৰাহকৰ অনীহা কিয় সৃষ্টি হৈছে। ফাডাৰ সভাপতি মনীষৰাজ সিংহানীয়াই সংবাদ মাধ্যমক জনোৱা মতে গাড়ী নিৰ্মাণকাৰী প্ৰতিষ্ঠানসমূহে উৎপাদন আৰু সৰবৰাহ ক্ৰমাগত বৃদ্ধি কৰিছে। ইপিনে, মে’ত হঠাতে শ্ব’ৰূমৰ পৰা যাত্রীবাহী গাড়ীৰ বিক্ৰী সংকটৰ মুখত পৰে। ফলত মজুত থকা গাড়ীৰ পৰিমাণ বৃদ্ধি পাইছে। জুলাই আৰু আগষ্টতো গাড়ী নির্মাতাই ডিলাৰলৈ মাহিলি চাহিদাৰ ভিত্তিত মজুত থকা গাড়ী প্ৰেৰণ কৰাৰ ফলত পৰিমাণ অধিক বৃদ্ধি পাইছে।
সংগঠনটোৱে কয় যে উৎসৱৰ বতৰৰ পূৰ্বে মজুতৰ পৰিমাণক লৈ ডিলাৰসকল বিশেষ চিন্তিত নহ’লেহেঁতেন। কিন্তু বিভিন্ন ৰাজ্যত স্বাভাৱিকতকৈ অতিৰিক্ত বৰষুণৰ বাবে গাড়ীৰ ক্ৰয়ৰ চাহিদা হ্রাস পাইছে। বিগত জুলাই আৰু আগষ্টত যি পৰিমাণৰ গাড়ী ডিলাৰসকলে মজুত ৰাখিবলগীয়া হয় তাৰ ফলত চাহিদা আৰু মজুতৰ ভাৰসাম্য বিঘ্নিত হৈছে।
ফাডাৰ সভাপতি সিংহানীয়াই জনোৱা মতে, ২০১৮-১৯ৰ বিত্তীয় বর্ষ তেওঁলোকৰ বাবে আছিল দুঃস্বপ্ন সদৃশ। গাড়ীৰ বজাৰৰ মন্দাৱস্থাৰ বাবে দেশত ২৮০খন বিপণীৰ দুৱাৰ বন্ধ হৈছিল। তাৰ পাছৰে পৰা তেওঁলোকে গাড়ী মজুতকৰণক লৈ সতর্ক হৈছে। গাড়ীৰ মূল সৰঞ্জাম প্ৰস্তুতকৰ্তা আৰু গাড়ী নির্মাতা সংস্থাসমূহে নিজ নিজ বজাৰ স্থিৰ কৰি ৰাখিবলৈ ডিলাৰৰ ওপৰত চাপ সৃষ্টি কৰা বুলিও সংগঠনটোৱে অভিযোগ কৰে।
টাটা মটৰ্ছ, মাৰুতি, টয়টা, মাহিন্দ্ৰা আদিৰ দৰে শীৰ্ষ গাড়ী নির্মাতা কোম্পানীৰ যাত্রীবাহী গাড়ীৰ বিক্ৰী বছৰত মুঠ ১.৬ শতাংশ হ্রাস হৈ ৩,০৪,৩৮১খন হৈছে। ভাৰতৰ বৃহত্তম যাত্রীবাহী গাড়ী প্রস্তুতকর্তা মাৰুতি ছুজুকীৰ পাইকাৰী বিক্ৰী ৯.৬৭ শতাংশ হ্রাস পাইছে। কোম্পানীটোৰ সৰু সৰু গাড়ীৰ বিক্ৰী স্থিতিশীল আছিল। ইপিনে, মজলীয়া আকাৰৰ ছিডান গাড়ীৰ বিক্ৰী বৃহৎ পতনৰ সন্মুখীন হৈছে। ডিলাৰসকল যাতে বিত্তীয় ক্ষতিৰ সন্মুখীন নহয় তাৰ বাবে অতিৰিক্ত মজুত গ্রহণ বন্ধ কৰিবলৈ দ্রুত সিদ্ধান্ত গ্ৰহণৰ নিৰ্দেশ দিছে ফাডাই।
উল্লেখ্য যে আজিৰ বজাৰত স্প’ৰ্টছ ইউটিলিটি ভেহিকেল (এছইউভি)ৰ চাহিদা সর্বাধিক। বিশেষকৈ মজলীয়া আকাৰৰ এছইউভিৰ চাহিদা আটাইতকৈ বেছি। মাত্র কিছুদিনৰ ভিতৰত ভাৰতত চাহিদা বহু বৃদ্ধি পাইছে। দেশৰ ৰাস্তাত চলাচলৰ কথা চিন্তা কৰিয়ে এই ধৰণৰ উচ্চতাৰ গাড়ী ক্রেতাসকলে অধিক পছন্দ কৰে। সৰু গাড়ীৰ বজাৰৰ ক্ষেত্ৰত মাৰুতিৰ উপৰি ভাৰতীয় ক্রেতাসকলে টাটাৰ গাড়ীও ভাল পায়। মাহিন্দ্ৰাৰ এছইউভিৰ চাহিদা আৰু একে সময়তে কিয়াৰ চাহিদা ২০২৪ত বৃদ্ধি পাইছে।
