Holder Of LMV Driving License Doesn’t Need Separate Authorisation To Drive Transport Vehicle Weighing Less Than 7500 KG: SC:
যিসকলৰ লঘু যান- বাহন চলোৱাৰ অনুজ্ঞাপত্ৰ আছে, তেওঁলোকৰ বাবে এতিয়াৰে পৰা ৭,৫০০ কিলোগ্রামতকৈ কম ওজনৰ গধুৰ বাহন চলাবৰ বাবে সুকীয়া অনুজ্ঞাপত্ৰৰ প্ৰয়োজন নহ’ব। অর্থাৎ এনে অনুজ্ঞাপত্র থকা এজন ব্যক্তিয়ে ইচ্ছা কৰিলে ৭,৫০০ কিলোগ্রামতকৈ কম ওজনৰ বাণিজ্যিক পৰিবহণত ব্যৱহৃত বাহন চলাব পাৰিব।
এই ৰায় দিয়ে দেশৰ মুখা ন্যায়াধীশ ডি ৱাই চন্দ্রচূড়ক সামৰি গঠিত এখন পাঁচজনীয়া সাংবিধানিক পীঠে। এই ৰায়দানৰ সময়ত বিচাৰপীঠে মন্তব্য কৰে যে লঘু বাহনৰ অনুজ্ঞাপত্ৰধাৰী চালকে বাণিজ্যিক পৰিবহণ বাহন চলোৱাৰ সময়ত পথ দুর্ঘটনা সংঘটিত কৰাৰ কোনো বাস্তৱ আধাৰিত তথ্য নাই। অৱশ্যে পীঠখনে এই কথাও স্পষ্ট কৰি দিয়ে যে ৭,৫00 কিলোগ্রামতকৈ অধিক ওজনৰ গধুৰ বাণিজ্যিক পৰিবহণ বাহন চলাবলৈ লঘু যান-বাহনৰ অনুজ্ঞাপত্ৰ থকা চালকসকলকো সুকীয়া অনুজ্ঞাপত্ৰৰ প্ৰয়োজন হ’ব।
মুখ্য ন্যায়াধীশ চন্দ্ৰচূড়ৰ উপৰি ন্যায়াধীশ ঋষিকেশ ৰয়, ন্যায়াধীশ পি এছ নৰসিংহ, ন্যায়াধীশ পংকজ মিত্তাল আৰু ন্যায়াধীশ মনোজ মিশ্রক সামৰি গঠিত সাংবিধানিক পঠখনে এই ৰায়দানৰ সময়ত ১৯৮৮ৰ যান-বাহন আইনৰো ব্যাখ্যা কৰে। পীঠখনৰ হৈ ৰায়টো লিখে ন্যায়াধীশ ৰয়ে। পীঠে স্পষ্ট কৰি দিয়ে যে যান-বাহন আইনৰ ১০ (২) (ই) ধাৰাৰ অধীনত লঘু যান-বাহনৰ চালকৰ অনুজ্ঞাপত্ৰ থকাসকলক ৭,৫00 কিলোগ্রামতকৈ কম ওজনৰ বাণিজ্যিক বা গধুৰ বাহন চলোৱাৰ বাবে সুকীয়া অনুজ্ঞাপত্ৰৰ প্ৰয়োজন নাই।
এই ৰায়ে লঘু যান-বাহনৰ চালকৰ অনুজ্ঞাপত্ৰ থকা বহুতকে সকাহ দিব বুলি ধাৰণা কৰা হৈছে। বিচাৰপীঠে এই কথাও স্পষ্ট কৰি দিয়ে যে যান-বাহনৰ চালকৰ অনুজ্ঞাপত্ৰৰ ক্ষেত্ৰত লঘু যান-বাহন আৰু পৰিবহণ যান-বাহনক সম্পূর্ণৰূপে সুকীয়া শ্রেণীভুক্ত কৰিব নোৱাৰি। অৱশ্যে ই-কার্ট, ই-ৰিক্সা আৰু বিপজ্জনক সামগ্রীবাহী যান-বাহনসমূহকে ধৰি কেতবোৰ বাহনৰ ক্ষেত্ৰত এই শ্রেণীকৰণ প্ৰযোজ্য হ’ব বুলি বিচাৰপীঠে মন্তব্য কৰে।
আনহাতে, সাংবিধানিক পীঠখনৰ এই উল্লেখনীয় বায়ৰ সুবাদত লঘু যান বাহনৰ চালকৰ অনুজ্ঞাপত্র থকাসকলে ইচ্ছা কৰিলে ৭,৫00 কিলোগ্রামতকৈ কম ওজনৰ বয়-বস্তু কঢ়িওৱা, মধ্যমীয়া যাত্রীবাহী আদি গাড়ী চলাব পাৰিব। এই ৰায়দানৰ সময়ত সাংবিধানিক পীঠে কয়, ‘লঘু যান-বাহনৰ চালকৰ অনুজ্ঞাপত্ৰ থকাসকলৰ বাবে ৭,৫00 কিলোগ্রামতকৈ কম ওজনৰ বাহন চলাবৰ বাবে চালৰ সুকীয়া অনুজ্ঞাপত্ৰৰ প্ৰয়োজন নহ’ব।’
মুকুন্দ দেৱানগন নামৰ এজন ব্যক্তিয়ে অৰিয়েন্টেল ইঞ্চৰেন্স কোম্পানীৰ বিৰুদ্ধে ৰুজু কৰা এটা গোচৰত আজি উচ্চতম ন্যায়ালয়ৰ পাঁচজনীয়া সাংবিধানিক পীঠখনে এই ৰায়দান কৰে।
