Illegal Bangladeshi:
আন্তঃৰাষ্ট্ৰীয় সীমান্ত ছীল কৰা, সীমান্তত নিৰাপত্তা ব্যৱস্থা শক্তিশালী কৰাৰ চৰকাৰৰ দাবীৰ স্বৰূপ উদঙাই অসমলৈ ব্যাপক হাৰত বাংলাদেশী নাগৰিকৰ অনুপ্রবেশে অত্যন্ত গুৰুতৰ ৰূপ ধাৰণ কৰিছে। অসমৰে প্ৰৱেশ কৰি বাংলাদেশীৰ দলে অসমৰ উপৰি দেশৰ বিভিন্ন ৰাজ্যত বিয়পি পৰিছে।
লক্ষ্যণীয় যে শেহতীয়াকৈ দেশৰ কে’বাখনো ৰাজাত এই অনুপ্রবেশকাৰীৰ বিৰুদ্ধে ব্যাপক অভিযান আৰম্ভ কৰা হৈছে আৰু তাৰ ফলত একপ্ৰকাৰ দলে দলে তেনে অবৈধ নাগৰিক ধৰা পৰিছে। অসমৰ বাবে অত্যন্ত উদ্বেগৰ বিষয় এয়ে যে ধৃত বাংলাদেশী নাগৰিকৰ বুজন সংখ্যকৰ পৰা জব্দ কৰা হৈছে অসমত প্ৰস্তুত কৰা ভুৱা আধাৰকাৰ্ড।
দিল্লী, মুম্বাই সকলোতে এই তথ্য পোহৰলৈ আহিছে। ইয়াৰ পৰিপ্রেক্ষিতত অতি শীঘ্ৰে দিল্লী আৰক্ষীৰ এটা দল অসমলৈ আহিব। অসম আৰক্ষী তথা ৰাজ্যৰ গৃহ বিভাগলৈ প্ৰেৰণ কৰা বার্তা অনুসৰি, দলটোৱে গোৱালপাৰা জিলাত উপস্থিত হৈ প্রয়োজনীয় তদন্ত কৰিব। ইয়াৰ উপৰি বৰাক উপত্যকাতো দিল্লী আৰক্ষীয়ে অভিযান চলাব।
আনকি মহাৰাষ্ট্ৰ আৰক্ষীৰ দলো অসমলৈ অহাৰ সম্ভাৱনা আছে প্রসংগক্রমে উল্লেখ্য যে মহাৰাষ্ট্ৰত যোৱা ডিচেম্বৰত ৪৩ জন বাংলাদেশী অনুপ্ৰৱেশকাৰী ধৰা পৰে। ৰাজ্যখনৰ এণ্টি টেৰৰ স্কোৱাড (এটিএছ)-এ অনুপ্রবেশকাৰীৰ বিৰুদ্ধে বিশেষ অভিযান অব্যাহত ৰাখিছিল। একেদৰে বিশেষ অভিযান আৰম্ভ কৰা হৈছে দিল্লীতো। গুজৰাট, মধ্যপ্রদেশ আদিতো অভিযান চলোৱা হৈছে।
জালত পৰা অনুপ্ৰৱেশকাৰী সকলৰ বহুতৰ ভাৰতৰ নাগৰিকৰ কোনো নথিপত্র নাই। কিছু সংখ্যকৰ আছে আৰু সেইসকলৰ মূল নথি হ’ল আধাৰকাৰ্ড। সেই কার্ড সঁচা নে ভুৱা, সেয়া নিশ্চিত কৰিবলৈ নির্দিষ্ট ৰাজ্যলৈ দিল্লী আৰক্ষীয়ে তথ্য প্ৰেৰণ কৰাৰ উপৰি আধাৰৰ লগত জড়িত ইউডাইৰো সহযোগিতা বিচাৰি আহিছে। এই পৰীক্ষণতে অসমৰ পৰা ব্যাপক হাৰত জাল আধাৰকাৰ্ড যোগানৰ তথ্য পোহৰলৈ আহিছে।
গোৱালপাৰাত এনে কার্ড প্রস্তুতৰ তথ্যও কেন্দ্রীয় নিৰাপত্তা সংস্থাই ধৃত বাংলাদেশীৰ জৰিয় তে উদ্ধাৰ কৰিছে। তদুপৰি বৰাকতো বৃহৎ চক্র অনুপ্ৰৱেশকাৰীক আধাৰকাৰ্ডৰ লগতে ভাৰতৰ নাগৰিকৰ আন আন জাল নথি যোগানত সক্ৰিয় হৈ অহাৰ তথ্যও ধৃত বাংলাদেশীৰ পৰাই উদ্ধাৰ হৈছে। ইয়াৰ উপৰি পশ্চিমবংগৰো নদীয়া, মেদিনীপুৰ আৰু কোচবিহাৰত এটা চক্ৰৰ উপস্থিতি ধৰা পৰিছে।
বাংলাদেশী অনুপ্ৰৱেশকাৰীৰ ভাৰতত প্ৰৱেশৰ তিনিখন মুখ্য ৰাজ্যৰ আন্তঃৰাষ্ট্ৰীয় সীমা বুলিও চলিত অভিযানৰ জৰিয়তে নিৰাপত্তা সংস্থাসমূহ নিশ্চিত হৈছে। ইয়াৰ ভিতৰত অসম অন্যতম। আন দুখন ৰাজ্য হ’ল ত্ৰিপুৰা আৰু পশ্চিমবংগ। বাংলাদেশত বিগত বৰ্ষত সৃষ্টি হোৱা অশান্তিজৰ্জৰ পৰিস্থিতিৰ পাছতে ভাৰতত অনুপ্ৰৱেশৰ মাত্রা অভাৱনীয় ৰূপত বৃদ্ধি হয়।
সেয়েহে অনুপ্ৰৱেশকাৰীক বাধা দিবলৈ সীমান্ত অঞ্চলত নিৰাপত্তা ব্যৱস্থা বৃদ্ধি কৰা বুলি কেন্দ্ৰীয় চৰকাৰৰ লগতে ৰাজ্য চৰকাৰেও সদৰী কৰিছিল। সেই সুৰক্ষা ব্যৱস্থা যে সম্পূর্ণৰূপে সোপাঢিলা, তাকেই অনুপ্ৰৱেশৰ ভয়াৱহ মাত্রাই উদঙাই দিছে। অসমত প্রায় প্রতিদিনে বাংলাদেশী ধৰা পৰিছে আৰু সেইসকলক নিয়ম অনুসৰি নিজ দেশলৈ ঘূৰাই পঠিওৱা হৈছে।
ইয়াৰ বাদেও ধৰা নপৰাকৈ কিমান বাংলাদেশীয়ে ৰাজ্যখনত টিঘিল ঘিলাই ফুৰিবলৈ সক্ষম হৈছে অথবা অসমক ট্রেনজিট পইন্ট হিচাপে ব্যৱহাৰ কৰি অন্য ৰাজ্যলৈ যাত্ৰা কৰিছে, সেয়া কল্পনা কৰা টান আৰু স্বয়ং মুখ্যমন্ত্রী ড: হিমন্ত বিশ্ব শৰ্মাই এই কথা স্বীকাৰ কৰিছে।b
