APDCL:নতুন বিত্তীয় বর্ষত লুণ্ঠনৰ নতুন কৌশল এপিডিচিএলৰ
বিদ্যুৎ যোগান-ব্যয়ৰ তিনিটা নতুন সময় ধার্য
সৌৰ-সর্বোচ্চ চাহিদা-নৈশ সময়ৰ বাবে ভিন ভিন মাচুলৰ প্ৰস্তাৱ
:আগন্তুক বিত্তীয় বৰ্ষৰ পৰা ৰাজ্যৰ শক্তি বিভাগে বিদ্যুৎ গ্রাহকৰ পৰা নতুন কৌশলৰে লুণ্ঠনৰ পাং পাতিছে। ইয়াৰ বাবে অৱলম্বন কৰা হৈছে জিজি বুলি নাখাই মাছ বুলি খোৱা নীতি। এই নীতিৰে গ্ৰাহক তথা উপভোক্তাৰ দুৰ্বল মুহূৰ্তৰ সুযোগ বুজি অধিক মাচুল আদায়ৰ কৌশল গ্ৰহণ কৰা হৈছে।
এই কৌশলৰ প্ৰস্তাৱ অসম বিদ্যুৎ বিতৰণ কোম্পানী লিমিটেড (এপিডিচিএল)-এ অসম বিদ্যুৎ নিয়ামক আয়োগত দাখিল কৰিছে। এপিডিচিএলৰ এই কৌশলৰ ওপৰত নিয়ামক আয়োগত অহা ফেব্ৰুৱাৰীত শুনানি অনুষ্ঠিত হ’ব। অৱশ্যে এই ধৰণৰ শুনানিবোৰ নিয়মমাফিক এক প্রক্রিয়াহে বুলি পূৰ্বৰে পৰা চৰ্চা চলি আহিছে।
আয়োগে সেউজ সংকেত দিলেই নতুন বিত্তীয় বর্ষ অর্থাৎ অহা পহিলা এপ্ৰিলৰ পৰা ৰাজ্যৰ বিদ্যুৎ উপভোক্তাই দিনটোৰ বিদ্যুৎ যোগান ব্যৱস্থাক তিনিটা ভাগত ভাগ কৰা এপিডিচিএলৰ কৌশলৰ মেৰপেছত বন্দী হৈ পৰিব। তাৰ পাছতে ভৰিব লাগিব প্রতি ইউনিট বিদ্যুৎ খৰচৰ বিপৰীতে কাৰ্যত উচ্চ মাচুল।
নিয়ামক আয়োগক দাখিল কৰা প্রস্তাৱত এপিডিচিএলে দিনটোৰ ২৪ ঘণ্টাক বিদ্যুৎ যোগানৰ ভিত্তিত তিনিটা ভাগত ভাগ কৰিছে। বৰ্তমানৰ ব্যৱস্থাত দুটা ভাগ আছে। সেয়া হ’ল সর্বোচ্চ চাহিদাৰ সময় আৰু সর্বনিম্ন চাহিদাৰ সময়। সর্বোচ্চ চাহিদাৰ সময় সন্ধিয়া পাঁচ বজাৰ পৰা নিশা ১০ বজালৈ আৰু সর্বনিম্ন চাহিদাৰ সময় নিশা ১০ বজাৰ পৰা সন্ধিয়া পাঁচ বজালৈ।
প্ৰস্তাৱিত ব্যৱস্থাত কৰা ভাগ তিনিটা হ’ল নৈশ সময়, সৌৰ সময় আৰু সর্বোচ্চ চাহিদাৰ সময়। নৈশ সময় হিচাপে মাজনিশা ১২ বজাৰ পৰা পুৱা ছয় বজালৈ নিৰ্ধাৰণ কৰা হৈছে। সৌৰ সময় আৰম্ভ হ’ব পুৱা ছয় বজাত আৰু শেষ হ’ব সন্ধিয়া ছয় বজাত। আনহাতে, সর্বোচ্চ চাহিদাৰ সময় হ’ব সন্ধিয়া পাঁচ বজাৰ পৰা মাজনিশা ১২ বজালৈ। সকলো প্ৰকাৰৰ গ্ৰাহকৰ বাবে এই সময়সীমা প্রযোজ্য হ’ব।
এপিডিচিএলৰ প্রস্তাৱটোত মাচুল বৃদ্ধি কৰা হোৱা নাই বুলি উল্লেখ কৰা হৈছে; কিন্তু যি নীতিৰে গ্ৰাহকৰ পৰা মাচুল আদায়ৰ কৌশল প্রস্তাৱটোত সন্নিবিষ্ট হৈছে তাৰ ফলত মাচুল বৃদ্ধিৰ ব্যৱস্থা নথকাৰ বিষয়টো এক মিথ্যাচাৰৰ বাদে আন একো নহয়। প্রচলিত ব্যৱস্থাত সর্বোচ্চ আৰু সর্বনিম্ন চাহিদাৰ সময়ত প্রতি ইউনিট বিদ্যুতৰ মাচুলৰ পৰিমাণ একেটাই। ইয়াৰ বিপৰীতে প্ৰস্তাৱিত ব্যৱস্থাত এই পৰিমাণ ভিন ভিন।
সর্বোচ্চ চাহিদাৰ সময়ত প্ৰস্তাৱিত ব্যৱস্থাত অধিক মাচুল ধার্য কৰা হৈছে। তদুপৰি সৰ্বোচ্চ চাহিদাৰ সময়ো বৰ্তমানতকৈ বৃদ্ধি কৰা হৈছে। জলবায়ু পৰিৱৰ্তনৰ ফলত পূৰ্বৰ তুলনাত সম্প্রতি উত্তাপৰ মাত্রা যথেষ্ট বেছি। তদুপৰি গৰমৰ দিনো পূর্বতকৈ বাঢ়িছে। এতিয়া বছৰৰ অধিক সময় গৰমৰ দিন হৈছে। সেই সুযোগ গ্রহণ কৰি উপভোক্তাৰ পৰা সর্বোচ্চ চাহিদাৰ সময়ত অধিক মাচুল আদায়ৰ কৌশল লৈছে এপিডিচিএলে।
ইয়াৰ বাবে আনকি বজালৈ সর্বোচ্চ চাহিদাৰ সময়। সর্বোচ্চ চাহিদাৰ সময়সীমাও দুঘণ্টা বঢ়োৱা হৈছে। বর্তমানৰ ব্যৱস্থাত সন্ধিয়া পাঁচ বজাৰ পৰা নিশা ১০ প্রস্তাবিত ব্যৱস্থাত ১০ বজাৰ সীমা নিশা ১২ বজালৈ বৃদ্ধি কৰা হৈছে। এইখিনি সময়ত বেছিভাগ মানুহ ঘৰত থাকে, শুবলৈ যায়। উত্তাপৰ মাত্রা বৃদ্ধিৰ বাবে এইখিনি সময়ত ফেন, বাতানুকুল যন্ত্র, এয়াৰকুলাৰ আদিৰ ব্যৱহাৰ বৃদ্ধি হয়। সেই সুযোগেই গ্রহণ কৰি অধিক মাচুল আদায়ৰ কৌশল গ্রহণ কৰিছে এপিডিচিএলে। সর্বোচ্চ চাহিদাৰ সময়ত ক্ৰয় কৰা বিদ্যুতৰ মাচুলো মুকলি বজাৰত বৃদ্ধি হয়।
যিহেতু অসমে চাহিদা পূৰাবলৈ মুকলি বজাৰৰ বিদ্যুতৰ ওপৰতে সম্পূৰ্ণ নিৰ্ভৰ কৰিবলগীয়া হয়, সেয়েহে প্ৰস্তাৱিত ব্যৱস্থাৰে সেই ব্যয়ৰো জোৰা মৰাৰ কৌশল অবলম্বন কৰিছে এপিডিচিএলে।সময়ত সর্বোচ্চ চাহিদাৰ কৌশলৰে অধিক পৰিমাণৰ বিদ্যুৎ মাচুল আদায় কৰি বাকী সময়ছোৱাত যে হ্রাস কৰিছে তেনেও নহয়।
সাধাৰণ বিদ্যুৎ গ্ৰাহকৰ ক্ষেত্ৰত প্ৰস্তাৱিত ব্যৱস্থাটোত সর্বোচ্চ চাহিদাৰ সময়ত প্রতি ইউনিটৰ মাচুল ৯.৬২ টকা প্রস্তাৱ কৰা হৈছে। ইয়াৰ বিপৰীতে সৌৰ সময়ত এই পৰিমাণ হ’ল ৬.৯৯ টকা। কিন্তু নৈশ সময়ত আকৌ এই পৰিমাণ ধাৰ্য কৰা হৈছে ৮.৯৪ টকা। এনেদৰে তিনিটা ভাগত প্রতি ইউনিট বিদ্যুতৰ মাচুল প্ৰস্তাৱটোত ধাৰ্য কৰাৰ বিপৰীতে বর্তমান এই পৰিমাণ ৮.৭৪ টকা।
একেদৰে বাণিজ্যিক শিতানত বর্তমান প্রতি ইউনিট বিদ্যুতৰ সাধাৰণ মূল্য ৯.১৯ টকা। এই পৰিমাণ প্ৰস্তাৱিত ব্যৱস্থাটোত ভাগ কৰা হৈছে এনেদৰে-সর্বোচ্চ চাহিদাৰ সময়ত ১১.০২ টকা, সৌৰ সময়ত ৭.৩৫ টকা আৰু নৈশ সময়ত ৯.৩৯ টকা।
এপিডিচিএলৰ প্রস্তাৱটো কাৰ্যকৰী হ’লে বিদ্যুৎ চালিত বাহনৰ ‘চার্জ’ মূল্যও বৃদ্ধি হ’ব। বর্তমান এনে বাহনৰ বেটাৰী চাৰ্জ কৰাৰ বিনিময়ত প্রতি ইউনিটৰ বিপৰীতে ব্যয় হয় ৭.১৯ টকা। এপিডিচিএলৰ প্ৰস্তাৱ অনুসৰি, সর্বোচ্চ চাহিদাৰ সময়ত চার্জ দিলেই প্রতি ইউনিট বিদ্যুতৰ বিপৰীতে ভৰিব লাগিব ১০.৫০ টকা। তেনেদৰে সৌৰ সময়ত ভৰিব লাগিব ৭.৬৪ টকা আৰু নৈশ সময়ত ভৰিব লাগিব ৯.৭৫ টকা।