Donald Trump is sworn in as President:
নির্বাচনী প্রতিশ্রুতি অংগীকাৰ কৰি আমেৰিকা যুক্তৰাষ্ট্ৰৰ ৪৭ সংখ্যক ৰাষ্ট্ৰপতিৰূপে শপতগ্রহণ কৰিলে প্রাক্তন ৰাষ্ট্ৰপতি ড’নাল্ড ট্রাম্পে। শপত গ্রহণৰ প্ৰাকক্ষণত নৱনির্বাচিত ৰাষ্ট্ৰপতিজনে অগণন সমৰ্থকৰ উপস্থিতিত এক ‘বিজয় সমাবেশ’ত অংশ লয়। বৰফ-বৰষুণে নমাই অনা প্রচণ্ড শীতক নেওচি সমবেত হোৱা উচ্ছসিত সমর্থকসকলক উদ্দেশি ভাষণ দি ট্রাম্পে অংগীকাৰ কৰে যে তেওঁ প্রধান নির্বাচনী প্রতিশ্রুতিসমূহ খৰতকীয়াকৈ পূৰণ কৰিব।
উল্লেখ্য যে ট্রাম্পে বিগত ৰাষ্ট্ৰপতি নিৰ্বাচনৰ প্ৰচাৰত প্ৰতিশ্রুতি দিয়ে যে তেওঁ কার্যকালৰ প্ৰথম দিনটোতে অনুপ্ৰৱেশত কঠোৰ সীমাবদ্ধতা আৰোপ কৰিব। লগতে তেওঁ আমেৰিকাই সম্মুখীন হোৱা প্ৰতিটো সংকট ঐতিহাসিক গতি আৰু শক্তিৰে মোচন কৰিব। গতিকে ট্রাম্পে কাৰ্যভাৰ গ্ৰহণৰ পাছতে অনুপ্ৰৱেশৰ ক্ষেত্ৰত কঠোৰ ব্যৱস্থা গ্রহণ কৰাৰ সম্ভাৱনা প্ৰৱল হৈছে। শপতগ্ৰহণৰ প্ৰাকক্ষণত তেওঁ কয়, ‘মঙলবাৰে বেলি ডুব যোৱাৰ লগে লগে আমাৰ দেশত চলা আক্রমণ বন্ধ হ’ব।’
তেওঁ এই হুংকাৰ দিয়াৰ লগে লগে উচ্ছসিত সমর্থকসকলে হর্ষোল্লাস কৰে। কেপিটেল ৱান এৰেনাত আয়োজিত এই সমাবেশত তেওঁ উচ্ছ্বসিত সমর্থকসকলক উদ্দেশি পুনৰ আমেৰিকাক শ্রেষ্ঠ কৰাৰো প্ৰতিশ্রুতি দিয়ে। উল্লেখ্য যে ৰিপাব্লিকান ট্রাম্পে ২০১৬ৰ ৰাষ্ট্ৰপতি নিৰ্বাচনৰ প্ৰচাৰৰ সময়ৰ পৰাই অনুপ্ৰৱেশৰ বিৰুদ্ধে কঠোৰ ব্যৱস্থা গ্ৰহণৰ হুংকাৰ দি আহিছে।
সম্প্রতি ৭৮ বছৰীয়া নৱনিৰ্বাচিত ৰাষ্ট্ৰপতিজনে এই সমাবেশত লগতে কয়, ‘৭৫ দিন পূর্বে আমি এক মহাকাব্যিক বিজয় সাব্যস্ত কৰিলো। দেশত কেতিয়াও এনে ঘটনা সংঘটিত হোৱা নাছিল। আমাৰ দেশে সম্মুখীন হোৱা প্ৰতিটো সমস্যা কাইলৈৰ পৰা মই শক্তি-সামর্থ্যৰ ঐতিহাসিক গতিৰে সমাধান কৰিম।’ আনহাতে, ২০২১ৰ জানুৱাৰীত মার্কিন কেপিটল হিলত সংঘটিত আক্ৰমণৰ গোচৰত দোষী সাব্যস্ত অথবা অভিযুক্ত হোৱা ১৫শৰো অধিক লোকক ক্ষমা কৰি দিব বুলি তেওঁ এই সমাবেশত দোহাৰে।
তদুপৰি বাইডেন প্রশাসনে জাৰি কৰা প্ৰতিটো মৌলবাদী আৰু মূর্খামিৰে ভৰা কাৰ্যবাহী নির্দেশ বাতিল কৰিব বুলিও তেওঁ অংগীকাৰ কৰে। লক্ষ্যণীয় যে দুটা মহাভিযোগ, দুটাকৈ হত্যাৰ ষড়যন্ত্ৰ আৰু এবাৰ আদালতৰ দ্বাৰা অপৰাধ গোচৰত দোষী সাব্যস্ত হোৱা আদি প্রত্যাহ্বান অতিক্ৰম কৰি ট্রাম্প বিগত ৰাষ্ট্ৰপতি নির্বাচনত পুনৰ হোৱাইট হাউছলৈ নির্বাচিত হয়। শপত গ্রহণ অনুষ্ঠানত ট্রাম্পৰ পত্নী মেলিনিয়া ট্রাম্পো উপস্থিত থাকে।
আনহাতে, ট্রাম্পৰ শপত গ্রহণলৈ কিছু সময় বাকী থকা অৱস্থাত ৰাষ্ট্ৰপতি জ’ বাইডেন আৰু প্ৰথম মহিলা জিল বাইডেনে হোৱাইট হাউছত তোলা তেওঁলোকৰ অন্তিম চেলফি শ্বেয়াৰ কৰি মার্কিন নাগৰিকসকললৈ এক বিদায়ী বাৰ্তা প্ৰেৰণ কৰে। এই বিদায়ী বার্তাত তেওঁলোকে কয়, ‘আমেৰিকা, তোমাক ভালপাওঁ।’ তাৰ পাছতে বাইডেন দম্পতীয়ে হোৱাইট হাউছত ট্রাম্প দম্পতীৰ স’তে এক আনুষ্ঠানিক চাহ-কফি পান পর্বত অংশ লয়।
# ৰাষ্ট্ৰপতিৰ অসাধাৰণ ক্ষমতা প্রয়োগ কৰি ঘনিষ্ঠক সুৰক্ষিত কৰিলে বাইডেনে
ট্রাম্পে ৰাষ্ট্ৰপতিৰূপে শপত গ্ৰহণ কৰাৰ প্ৰাকক্ষণত ৰাষ্ট্ৰপতিৰ ক্ষমতাৰ অসাধাৰণ প্ৰয়োগ কৰি একাংশ ঘনিষ্ঠক আইনী মেৰপেচৰ পৰা ৰক্ষা কৰি গ’ল বিদায়ী ৰাষ্ট্ৰপতি জ’ বাইডেনে।
ভৱিষ্যতে আইনী মেৰপেচত সাঙোৰ খোৱাৰ সম্ভাৱনাৰ পৰা ৰক্ষা পৰা এই লোকসকল হ’ল বাইডেনৰ ক’ভিড-১৯ মহামাৰীৰ প্রাক্তন উপদেষ্টা এন্থনী ফাউচি, অৱসৰপ্ৰাপ্ত সঞ্চালক মার্ক মিলেই আদি।
এইসকলক ট্রাম্পে ৰাজনৈতিক উদ্দেশ্য প্রণোদিতভাবে আইনী মেৰপেচত সাঙোৰাৰ আশংকা কৰি ৰাষ্ট্ৰপতি বাইডেনে কার্যকালৰ অন্তিম ক্ষণত এনেদৰে সুৰক্ষা দিয়ে। ৰাষ্ট্ৰপতিৰ দ্বাৰা সুৰক্ষা পোৱাসকলৰ মাজত ২০২১ৰ ছয় জানুৱাৰীত মার্কিন কেপিটল হিলত ট্রাম্পৰ সমৰ্থকসকলে সংঘটিত কৰা আক্ৰমণৰ ঘটনাৰ মার্কিন ৰাষ্ট্ৰপতিৰ কাৰ্যালয়ৰ তদন্ত সমিতিখনৰ সদস্যবর্গ, কৰ্মচাৰী আৰু সাক্ষীসকলো আছে।
এই সকলক আইনী মেৰপেচৰ পৰা ৰক্ষা কৰাৰ কথা সদৰী কৰি এক বিবৃতিত বাইডেনে কয়, ‘এইসকল অসামৰিক বিষয়া-কর্মচাৰীয়ে সম্মান আৰু মৰ্যাদাৰে আমাৰ দেশৰ প্ৰতি সেৱা আগবঢ়ালে আৰু তেওঁলোক অযুক্তিকৰ আৰু ৰাজনৈতিক উদ্দেশ্য প্রণোদিত আইনী মেৰপেচৰ পৰা ৰক্ষা পোৱাৰ যোগ্য।’ সম্প্রতি পৰিস্থিতি ব্যতিক্ৰম বুলি উল্লেখ কৰি তেওঁ লগতে কয়, ‘এতিয়াৰ পৰিস্থিতি ব্যতিক্ৰম আৰু এনে অৱস্থাত মই একো নকৰাকৈ সুবিবেচক হৈ থাকিব নোৱাৰো।’
লক্ষ্যণীয় যে প্রাক্তন সঞ্চালক মার্ক মিলেইক লৈ ট্রাম্প ক্ষুণ্ণ হৈ আছে। ট্রাম্পৰ প্ৰথম ৰাষ্ট্ৰপতি কার্যকালত মিলেই হোৱাইট হাউছৰ যুটীয়া মুখ্য বিষয়া আছিল। পৰৱৰ্তী সময়ত তেওঁ ট্রাম্প সম্পর্কে সাংবাদিক ব’ব উডৱাৰ্ডক কয় যে ট্রাম্প হাড়ে-হিমজুৰে ফেচীবাদী আৰু দেশখনৰ প্ৰতি তেওঁ সবাতোকৈ ভয়ংকৰ ব্যক্তি। মিলেই লগতে অভিযোগ উত্থাপন কৰিছিল যে ট্রাম্পে চীনৰ ৰাষ্ট্ৰপতিক কেপিটল হিলত আক্রমণত সহায় কৰিবলৈ গোপনে আহ্বান জনাইছিল।
একেদৰে তেওঁ চীন আক্ৰমণৰ আঁচনি আমেৰিকা যুক্তৰাষ্ট্ৰৰ নাই বুলিও বেইজিঙক নিশ্চয়তা দিছিল বুলিও মিলেই আন এক গুৰুতৰ অভিযোগ উত্থাপন কৰি থৈছে। লক্ষ্যণীয় যে ট্রাম্পৰ শপতগ্ৰহণ অনুষ্ঠানলৈ চীনৰ ৰাষ্ট্ৰপতি জি জিনপিঙেও নিমন্ত্রণ পাইছে।
