Asomiya Yuba Mancha Press Release:
বিশিষ্ট সমাজকর্মী, জাতীয়তাবাদী আৰু মানৱ অধিকাৰ আন্দোলনৰ একনিষ্ঠ কর্মী তথা লেখক ৰাজকুমাৰ বৈশ্যক পৱন আগৰৱালা নামৰ এজন বহিৰাগত বিল্ডাৰে চলোৱা কদর্য লুণ্ঠন কাৰ্যৰ বিৰুদ্ধে আজি জাঙুৰ খাই উঠিছে অসমীয়া যুৱ মঞ্চৰ গুৱাহাটী মহানগৰ সমিতি।
বিল্ডাৰ জনে ২৪ ঘণ্টাৰ ভিতৰত এই অসৎ কাৰ্য বন্ধ নকৰিলে বিল্ডাৰৰ “CAM QUEST” নামৰ ব্যৱসায়ীক প্রতিষ্ঠানত তলা লগোৱা হ’ব বুলি সংগঠনটোৱে কঠোৰ ভাষাৰে সকিয়াই দিছে।
উল্লেখযোগ্য যে ২০১৪ চনত বৈশ্যই চকুৰ গ্লোকোমা ৰোগত চিকিৎসাধীন হৈ থকা অৱস্থাত তেওঁৰ ধনৰ প্ৰয়োজন হোৱাত তেওঁৰ আত্মীয় সকলে পৱন আগৰৱালা নামৰ এজন বিল্ডাৰক বৈশ্যই পৈতৃক সূত্রে লাভ কৰা এক কঠা পাচ লেচা ভূমিত গৃহ নিৰ্মাণৰ বাবে চুক্তি সম্পাদন কৰিছিল ৷ চুক্তি অনুসৰি দুটা ফ্লেট আৰু অট্টালিকাটোৰ পিছফালৰ সম্পূৰ্ণ পার্কিং এলেকা বৈশ্যৰ নামত পঞ্জীয়ন কৰা আছিল।
কিন্তু বৈশ্যই চিকিৎসাজনিত কাৰণত হাস্পতালত চিকিৎসাধীন হৈ থকাৰ সুযোগত বিল্ডাৰজনে বৈশ্যৰ নামত থকা আন চাৰি লেচা মাটিও দখল কৰি লৈছিল। ইয়াৰ উপৰিও বৈশ্যক দিবলগীয়া ২৫ লাখ টকাও আজিলৈ আদায় দিয়া নাই।
আনহাতে,পৌৰ নিগমৰ নিয়ম মতে চেপটিক টেঙ্ক নিৰ্মাণ নকৰি বৈশ্যৰ ব্যক্তিগত ভূমিত পূৰ্বৰে পৰা থকা চেপটিক টেঙ্কটোকে এতিয়াও ব্যৱহাৰ কৰি আছে। আনহাতে বিল্ডাৰে বৈশ্যৰ পৰা এটা পার্কিং ভাৰা লৈছিল। আজি ৮ বছৰে মুঠ তিনি লাখ টকা পার্কিঙৰ বাবদ এতিয়াও দিবলৈ বাকী আছে।
আন এক গুৰুত্বপূৰ্ণ অভিযোগ অনুসৰি বিল্ডাৰে পৌৰ নিগমৰ অনুমতি উলংঘা কৰি ১২৭০ বর্গফুট এলেকা অবৈধ ভাৱে নিৰ্মাণ কৰিছিল। যাৰ ফলত উক্ত অবৈধ নির্মাণ ভাঙিবলৈ পৌৰ নিগমে বৈশ্যক জাননী জাৰী কৰিছে।
যোৱা ২৯ জুলাই আৰু আৰু ৭ আগষ্টত বিল্ডাৰৰ নামত দুজন অজ্ঞাত লোকে বৈশ্যক হত্যাৰ চেষ্টাও কৰিছিল। ঘটনা সম্বন্ধে দিশপুৰ থানাত এজাহাৰ দাখিল কৰাও হৈছিল।বিল্ডাৰে আজিলৈ পৌৰনিগমৰ পৰা অট্টালিকাটো নির্মাণ সম্পূৰ্ণ হোৱা প্ৰমাণ পত্রও লোৱা নাই।
অসমীয়া যুৱ মঞ্চৰ গুৱাহাটী মহানগৰ সমিতিয়ে বিবৃতিটোত আৰু উল্লেখ কৰে যে,বিল্ডাৰৰ এই দুষ্কাৰ্যৰ প্ৰধান সহযোগী হৈছে বিতর্কিত শিক্ষয়িত্ৰী তথা চিবিআইৰ জালত বন্দী গায়ত্রী শইকীয়া আৰু তেওঁৰ স্বামী হেমচন্দ্ৰ বৰা। হেম চন্দ্ৰ বৰা উত্তৰ-পূৱ সীমান্ত ৰেলৰ অতিৰিক্ত মুখ্য অভিযন্তা আছিল। বহু কোটি টকা আত্মসাৎ কৰা অভিযোগত চিবিআইয়ে গ্ৰেপ্তাৰ কৰি বৰাক তিহাৰ জেলত ৰাখিছিল। সম্প্রতি জামিনত মুক্তি লাভ কৰি বৰ্তমান ঘৰতে আছে আৰু শেহতীয়াকৈ বিল্ডাৰৰ সৈতে লগ লাগি সমাজবিৰোধী কাম কৰি আছে।
আনহাতে,গায়ত্ৰী শইকীয়া ভাস্কৰ বিদ্যাপীঠত শিক্ষয়িত্ৰী কাম কৰে যদিও স্বামী হেমচন্দ্ৰ বৰাৰ অবৈধ ধনৰ সৰবৰাহ কৰা অভিযোগত চিবিআইৰ জালত বন্দী হৈ আছে। এই দম্পতি হালে বৈশ্যক অবর্ণনীয় মানসিক হাৰাশাস্তি কৰি আহিছে আৰু বৈশ্যৰ নামত থকা পার্কিং দখল কৰিবলৈ চেষ্টা চলাই আছে।
বিল্ডাৰে এই দুষ্কাৰ্য সমূহ সংঘটিত কৰি বৰ্তমান পলাতক অবস্থাত আছে। বিল্ডাৰে সৃষ্টি কৰা এক অৰাজক আৰু আতংকময় পৰিস্থিতিৰ বিৰুদ্ধে চৰকাৰব্যৱস্থা লবলৈ আহ্বান দাবী জনায় সংগঠনটোৱে ৷
ইতিমধ্যে বিল্ডাৰৰ এই দুষ্কাৰ্য সমূহৰ বিৰুদ্ধে ৰাজকুমাৰ বৈশ্যই দিশপুৰ থানাত এখন এজাহাৰ দাখিল কৰিছে। অসমীয়া যুৱ মঞ্চৰ গুৱাহাটী মহানগৰ সমিতিয়ে তিনিটা দাবী কৰে ৷ দাবী তিনিটা হ’ল -১) ৰাজকুমাৰ বৈশ্যক দিবলৈ বাকী থকা সমুদায় ধন ক্ষতিপুৰণ সহ অহা ২৪ ঘণ্টাৰ ভিতৰত আদায় দিবলৈ দাবী। ২) বিল্ডাৰে পৌৰ নিগমৰ বিধি উলংঘা কৰি যি বিবাদ সৃষ্টি কৰিছে তাক নিষ্পত্তি কৰাৰ দাবী। ৩) বৈশ্যৰ ব্যক্তিগত ভূমিৰ পৰা চেপটিক টেঙ্ক স্থানান্তৰ কৰা হওক ।
