Atal Bihari Vajpayee 100 Birth Anniversary:
ভাৰতৰত্ন প্রাক্তন প্রধানমন্ত্রী অটল বিহাৰী বাজপেয়ীৰ ১০০ সংখ্যক জন্মদিন উপলক্ষে আজি ৰাজ্যিক বিজেপিৰ মুখ্য কাৰ্যালয় অটল বিহাৰী বাজপেয়ী ভৱনত আয়োজন কৰা হয় সু-শাসন দিৱস ৷
দিৱসত অংশ লয় মুখ্যমন্ত্রী ড:হিমন্ত বিশ্ব শৰ্মাই ৷ মুখ্যমন্ত্ৰী গৰাকীয়ে মহান নেতা গৰাকীৰ প্ৰতিচ্ছবিত শ্রদ্ধাঞ্জলি জ্ঞাপন কৰে ৷ এই উপলক্ষে আয়োজিত সভাত মুখ্যমন্ত্ৰী শৰ্মাই ভাষণ প্ৰসংগত কয় নিষ্ঠা আৰু সততাৰ ৰাজনীতিৰে দেশৰ সৰ্বস্তৰৰ জনতাৰ হৃদয় জয় কৰা এইগৰাকী মহানায়কে এখন শক্তিশালী ভাৰত নিৰ্মাণৰ বাবে আজীৱন সেৱাৰ মানসিকতাৰে কাম কৰি দেখুৱাই যোৱা উচ্চ আদর্শই উত্তৰ পুৰুষৰ বাবে বহু সম্ভাৱনাৰ দুৱাৰ মুকলি কৰিছে। অসাধাৰণ বাগ্মিতা, পাণ্ডিত্য, ৰাজনৈতিক বিচক্ষণতাই মহান নেতাগৰাকীৰ ব্যক্তিসত্তাক মহীয়ান কৰি তুলিছিল ৷ তেওঁ প্ৰতিজন ভাৰতীয়ৰ অন্তৰত সদায় সজীৱ হৈ থাকিব ৷
অনুষ্ঠানত ৰাজ্যিক বিজেপিৰ সভাপতি ভৱেশ কলিতা,মন্ত্ৰী ডা:ৰণোজ পেগু,জয়ন্তমল্ল বৰুৱা,অশোক সিংহাল সহ বহু কেই গৰাকী দলীয় নেতা- কৰ্মীও উপস্থিত থাকে।
আনহাতে মহানগৰীৰ আদাবাৰীৰ অটল উদ্যানত আজি মহান নেতাগৰাকীৰ এটি প্রতিমূর্তি উন্মোচন কৰে মুখ্যমন্ত্রী ড: হিমন্ত বিশ্ব শর্মাই উন্মোচন কৰে। এই উপলক্ষে অটল উদ্যানত আয়োজিত সভাত অংশ লৈ মুখ্যমন্ত্ৰী ড:শৰ্মাই কয়, তিনিবাৰকৈ দেশৰ প্ৰধানমন্ত্ৰী হিচাপে দায়িত্ব পালন কৰি অটল বিহাৰী বাজপেয়ীয়ে ৰাষ্ট্ৰক সমৃদ্ধ কৰাৰ লগতে প্ৰগতিৰ নতুন বাট ৰচনা কৰিছিল এইগৰাকী জনদৰদী নেতাই অসম তথা উত্তৰ-পূৰ্বাঞ্চলৰ আর্থ-সামাজিক উত্তৰণৰ দিশত অপৰিসীম অৱদান যোগাই গৈছে। তেখেত আছিল এগৰাকী শান্তিৰ দূত। ভাৰতৰ অখণ্ডতা ৰক্ষাৰ বাবে যুঁজ দিবলৈ তেখেতে কেতিয়াও পিছুৱাই অহা নাছিল। তেখেতৰ নীতি আৰু আদর্শই অসমক বিকাশৰ দিশত আগুৱাই যোৱাৰ বাবে সদায়ে প্ৰেৰণা যোগাব।
সভা খনত উপস্থিত থাকে ৰাজ্যিক বিজেপিৰ সভাপতি ভৱেশ কলিতা, গুৱাহাটীৰ সাংসদ বিজুলী কলিতা মেধি,মন্ত্ৰী ডা:ৰণোজ পেগু,জয়ন্তমল্ল বৰুৱা,অশোক সিংহাল, ৰূপেশ গোৱালা, জিএমচিৰ মেয়ৰ মৃগেন শৰণীয়া,জিএমডি এৰ অধ্যক্ষ নাৰায়ণ ডেকা সহ কে’বাগৰাকী বিশিষ্ট ব্যক্তি উপস্থিত থাকে ৷
