Ed Raid In Coal Mafias Residence:
বেলতলাৰ কমেও আধা ডজন কয়লা ব্যৱসায়ীৰ বিৰুদ্ধে মঙলবাৰে প্রৱর্তক সঞ্চালকালয় (ইডি)ৰ দলে তালাচী অভিযান চলোৱাৰ পাছত এই দুর্ধর্ষ কয়লা মাফিয়া জালত পৰিবনে বুলি প্রশ্ন উত্থাপিত হৈছে। বেলতলাত ইডিৰ দিনজোৰা অভিযানৰ পাছত পোহৰলৈ অহা তথ্য অনুসৰি, মেঘালয়ৰ কোক কয়লাৰ কৰ জালিয়াতিৰ গোচৰত সাঙোৰ খাইছে ধৰ্মবীৰ বাঞ্চাল ওৰফে ধর্মু তথা তেওঁৰ পুত্ৰ সুনীল বাঞ্চাল, সত্যনাৰায়ণ আৰু মহাবীৰ বাগলা, সঞ্জয় ঘিৰীয়া, মহাবীৰ মীনা, পৱন আগৰৱালা, ঋষি আগৰৱালা, প্রদীপ মিট্টল, আনন্দ গোয়েল, শিৱ মিটল, বাবু সিং আৰু জ’ মাৰাক আদিকে ধৰি বহুসংখ্যক কয়লা মাফিয়া।
প্রাপ্ত তথ্য অনুসৰি, কালি ইডিৰ দলে বেলতলাৰ কে’বাজনো ব্যৱসায়ীৰ ঘৰ আৰু কার্যালয়ত তালাচী অভিযান চলায়। দিনজোৰা অভিযানৰ অন্তত ইডিৰ দলে সুনীল বাঞ্চালৰ ঘৰৰ পৰা প্রিণ্টাৰ, কম্পিউটাৰকে ধৰি বিভিন্ন নথিপত্র তথা বেংকৰ একাউণ্টৰ কাগজ-পত্ৰ সম্বলিত নথি জব্দ কৰে। সূত্ৰত প্ৰকাশ যে বাঞ্চালেই কয়লাৰ বিভিন্ন ক’লা ব্যৱসায়ৰ স’তে জড়িত। কয়লা ছিণ্ডিকেটৰ অন্যতম মাফিয়া বাঞ্চালৰ দিছপুৰৰ বৰঘৰৰ স’তে পোনপটীয়া যোগাযোগ থকা বুলি ব্যবসায়ীজনে বিভিন্ন সময়ত নানাজনক ভয়-ভাবুকি প্রদর্শন কৰি অহা বুলিও চর্চা আছে।
এতিয়া ইডিৰ অভিযানৰ পাছত লে মেঘালয়ৰ ছালাঙত কোক উদ্যোগৰ উ নামত শ শ কোটি টকাৰ জালিয়াতিৰ আশ্রয় লৈ আত্মসাৎ কৰা বাঞ্চাল তথা তেওঁৰ সাংগো-পাংগ জালত পৰিবনে বুলি প্রশ্ন উত্থাপন হৈছে।
মন কৰিবলগীয়া যে মেঘালয়ৰ ছালাঙত চৰকাৰৰ ‘ছিংগল উইণ্ড’ ব্যৱস্থাৱলীৰ অধীনত বেলতলাৰ কে’বাজনো কয়লা ব্যৱসায়ীয়ে কোক উদ্যোগ স্থাপন কৰি বৃহৎ পৰিমাণৰ কোক কয়লাৰ ব্যৱসায় কৰি আহিছে। দৰাচলতে এই ব্যৱসায়ীসকলৰ সিংহভাগেই ছালাঙত প্রৱঞ্চনাৰ আশ্রয় লৈ শশ কোটি টকা আত্মসাৎ কৰে। পৰৱৰ্তী পৰ্যায়ত এই বৃহৎ জালিয়াতিৰ তথ্য পোহৰলৈ আহে।
তথ্য অনুসৰি, বৃহৎসংখ্যক কোক কয়লা ব্যৱসায়ীয়ে একাংশ বিষয়াৰ স’তে চক্রান্ত কৰি চৰকাৰক কোটি কোটি টকাৰ কৰ ফাকি দিয়ে। এই জালিয়াতিত কোক কয়লাৰ বাবে ভুৱা চালান, জিএছটিৰ ভুৱা বিল আদি ব্যৱহাৰৰো তথ্য পোহৰলৈ আহে। এই সমস্ত জালিয়াতিৰ মূল অভিযুক্তৰূপে সঞ্জয় বাঞ্চালৰ নাম চর্চিত হৈ আহিছে।
মেঘালয়ৰ কোক জালিয়াতিৰ গোচৰ পৰৱৰ্তী সময়ত আদালতৰ মজিয়ালৈ যায়। আদালতে সম্পূর্ণ বিষয়ৰ শুনানিৰ অন্তত তথ্য লাভকৰে যে ছালাঙৰ কে’বাটাও কোক উদ্যোগ অবৈধ। এইসমূহ কোনো ধৰণৰ বৈধ কাগজ-পত্র অবিহনে চলি আছে। ইয়াৰ ভিতৰত কে’বাটাও কোক উদ্যোগ আদালতৰ নিৰ্দেশত বন্ধ কৰি দিয়া হয়। আদালতৰ মজিয়াত এই তথ্য উদ্ঘাটন হয় যে মেঘালয়ত কয়লা খনন সম্পূৰ্ণৰূপে নিষেধ হোৱাৰ পাছত কোক বনাবলৈ বৃহৎ সংখ্যক কয়লা ক’ৰ পৰা সৰবৰাহ কৰা হ’ল।
সূত্রত প্রকাশ যে কে’বা ডজন কয়লা ব্যৱসায়ীয়ে প্রবঞ্চনাৰ আশ্রয় লৈ ছালাঙৰ পৰা শশ কোটি টকা আত্মসাৎ কৰে। সমগ্র জালিয়াতিৰ ঘটনা পোহৰলৈ অহাত মেঘালয় আৰক্ষীয়ে এই গোচৰত কে’বাজনো ব্যৱসায়ীক গ্ৰেপ্তাৰ কৰে। অৱশ্যে এই জালিয়াতিৰ মূল নায়ক আজি পর্যন্ত জালত পৰা নাই। মঙলবাৰে বেলতলাত ইডিৰ অভিযানৰ পাছত প্রশ্ন উঠিছে যে এইবাৰ জালত পৰিব নে জালিয়াতিৰ অন্যতম হোতা নে অদৃশ্যজনৰ আশীর্বাদপুষ্ট সুনীল বাঞ্চালৰ দৰে কয়লা মাফিয়া মুকলি আকাশৰ তলতে দপদপাই থাকিব ৷