Illegal Coal Mining: ৰাজ্যত কয়লাৰ অবৈধ বেহা স্বীকাৰ কৰিলে স্বয়ং আৰক্ষী প্রধানেও
- সাতদিনৰ ভিতৰত লিডু-মাৰ্ঘেৰিটা- লেখাপানী-উমৰাংছ’ত ‘ৰেট হ’ল মাইনিং’ বন্ধৰ হুংকাৰ জি পিৰ
- দৃষ্টিগোচৰ নহ’ল দুবছৰে
- ‘দৈনিক অগ্রদূত’ত ধাৰাবাহিকভাবে প্রকাশ অবৈধ কয়লা খনন-সৰবৰাহৰ তথ্য
ৰাজ্যত অবৈধ কয়লা খনন (ৰেট হ’ল মাইনিং) আৰু অবাধ সৰবৰাহ চলি অহা বুলি ‘দৈনিক অগ্রদূত’-এ ধাৰাবাহিকভাৱে প্ৰকাশ কৰি অহা বাতৰিৰ সত্যতা মুখ্যমন্ত্রী ড: হিমন্ত বিশ্ব শৰ্মাৰ পাছত স্বীকাৰ কৰিলে অসম আৰক্ষীৰ সঞ্চালক প্রধান (ডিজিপি) জিপি সিঙেও।
কালি কেন্দ্ৰীয় চৰকাৰে কেন্দ্ৰীয় সংৰক্ষিত আৰক্ষী বাহিনী (চিআৰপিএফ)ৰ সঞ্চালকপ্রধানৰূপে নিযুক্তি লাভ কৰা ডিজিপি সিঙে সম্প্ৰতি পূব অসমৰ ডিব্ৰুগড়, শিৱসাগৰ আদি জিলা ভ্রমণ কৰে। এই ভ্ৰমণৰ সময়ত তেওঁ আজি সাংবাদিকৰ আগত ৰাজ্যৰ বিভিন্ন স্থানত ‘ৰেট হ’ল মাইনিং’ চলি থকাৰ কথা স্বীকাৰ কৰে। মুখ্যমন্ত্ৰীৰ নির্দেশমৰ্মে ‘ক’লা হীৰা’ৰ এই অবৈধ খনন সাতদিনৰ ভিতৰত বন্ধ কৰা হ’ব বুলিও তেওঁ কয়।
লক্ষ্যণীয় যে যোৱা ছয় জানুৱাৰীত ডিমা হাছাও জিলাৰ উমৰাংছ’ৰ এটা অবৈধ কয়লা খনিত কৰ্মৰত অৱস্থাত এক জল দুর্যোগত কমেও নজন শ্রমিক আবদ্ধ হোৱা তথা পৰৱৰ্তী সময়ত ইয়াৰে
চাৰিজনৰ মৃতদেহ উদ্ধাৰ হোৱা ঘটনাই ৰাজ্যজুৰি তোলপাৰ লগায়।
কার্যতঃ এই ঘটনাই অবৈধ কয়লা খনি কেনে বিপজ্জনক আৰু প্ৰাণৰ প্ৰতি প্রতিমুহূর্ততে শংকা থকাৰ পাছতো একমাত্ৰ দৰিদ্ৰতাৰ বাবেই যে একাংশ লোকে এনে কয়লা খনিত কাম কৰিবলৈ যায় সেয়াও প্ৰতিপন্ন কৰে। উমৰাংছ’ৰ কয়লা খনিৰ ঘটনাটোৱে উন্নয়নৰ চৰকাৰী ধ্বনিকো একপ্ৰকাৰ সাৰশূন্য প্ৰতিপন্ন কৰে।
এই ক্ষেত্ৰত ততোধিক লক্ষ্যণীয় দিশটো হ’ল যে মুখ্যমন্ত্রী ড: শৰ্মাৰে ঘনিষ্ঠতা থকা উত্তৰ কাছাৰ স্বায়ত্তশাসিত পৰিষদৰ মুখ্য কার্যবাহী সদস্য দেৱোলাল গলোছাৰ সন্মতিত তেওঁৰ পত্নী কণিকা হোজায়ে এই অবৈধ খনিটো পৰিচালনা কৰি অহাৰ অভিযোগ উত্থাপিত হৈছে। তৎসত্ত্বেও গর্লোছা দম্পতীৰ বিৰুদ্ধে ব্যৱস্থা গ্ৰহণৰ পৰা ৰাজ্য চৰকাৰ বিৰত আছে।
আনহাতে, মাৰ্ঘেৰিটা, লিডু আৰু লেখাপানীতো কয়লাৰ অবৈধ খনন চলি থকাৰ বাতৰি ‘দৈনিক অগ্রদূত’-এ ধাৰাবাহিকভাৱে প্ৰকাশ কৰি আহিছে। স্বয়ং ডিজিপি সিঙেওকাৰ্যতঃ এই বাতৰিৰ সত্যতা স্বীকাৰ কৰি অবৈধ কয়লা খনি বন্ধ কৰাৰ পদক্ষেপ গ্ৰহণ কৰা হৈছে বুলি সদৰী কৰে।
ইতিমধ্যে দুই-এটা অবৈধ কয়লা খনি বন্ধ কৰা হৈছে বুলিও তেওঁ সদৰী কৰে। উল্লেখ্য যে সিঙে দুবছৰ পূৰ্বে ২০২৩ৰ ৩১ জানুৱাৰীত অসম আৰক্ষীৰ সঞ্চালক প্ৰধানৰ দায়িত্ব গ্রহণ কৰে। ১৯৯১ৰ বেটছৰ আইপিএছ বিষয়া সিঙে ২০২৭ৰ ৩০ নৱেম্বৰত অৱসৰ গ্ৰহণ কৰিব।
লক্ষ্যণীয় যে অসম আৰক্ষীৰ সঞ্চালকপ্ৰধানৰূপে দুবছৰ কাৰ্যনিৰ্বাহ কৰাৰ সময়ত তেওঁৰ কিয় ৰাজ্যত চলি থকা অবৈধ কয়লা খনি দৃষ্টিগোচৰ নহ’ল, সেয়া ৰহস্যজনক। আজি তেওঁ ডিব্ৰুগড়ত সাংবাদিকৰ আগত কয়, ‘মাৰ্ঘেৰিটা, লিডু আৰু লেখাপানীত কয়লাৰ অবৈধ খনন চলি আছে।
মুখ্যমন্ত্রীয়ে মোক এই তিনি ঠাইৰ বিষয়ে অবগত কৰে। সেইমৰ্মে এই তিনি ঠাইৰ প্রশাসনিক বিষয়াবর্গ, বন বিভাগ আৰু কয়লা প্রাধিকৰণৰ বিষয়াবৰ্গৰ স’তে আলোচনা অনুষ্ঠিত হয়। সাতদিনৰ ভিতৰত কয়লাৰ অবৈধ খনন বন্ধ কৰিবলৈ নিৰ্দেশ দিয়া হৈছে।’
ডিজিপি সিঙে লগতে কয় যে আজি পুৱাৰ পৰা সমগ্ৰ উমৰাংছ’ অঞ্চলত কয়লাৰ অবৈধ খননৰ জৰীপ চলোৱা হয়। অৱশ্যে বিশেষ খনন পোৱা নাই বুলি সদৰী কৰি তেওঁ আৰু কয়, ‘পূৰ্বৰ খননৰ ফলত পৰিত্যক্ত হৈ থকা কয়লা জব্দ কৰাৰ নিৰ্দেশ দিয়া হৈছে। অবৈধ কয়লা খনি বন্ধৰ কাম সাতদিনৰ ভিতৰত সম্পন্ন হ’ব।’
