North -East Small Finance Bank:
উত্তৰ-পূৱৰ নাম লৈ ব্যৱসায়ী কৰি অহা বিত্তীয় প্রতিষ্ঠান নর্থ-ইষ্ট স্মল ফাইনেন্স বেংক (এনইএছএফবি) কর্তৃপক্ষই উত্তৰ-পূৱবাসীকে ৰামটাঙোন শোধাইছে। প্রতিষ্ঠানটোৰ মালিকীস্বত্ব বাংগালুৰুৰ ‘শ্লাইছ’ নামৰ কোম্পানীটোৰ হাতলৈ যোৱাৰ পাছৰে পৰা উত্তৰ-পূবৰ গ্ৰাহক আৰু কৰ্মচাৰীসকলৰ মাজত হাহাকাৰ পৰিস্থিতিৰ সৃষ্টি হৈছে।
৯৫ শতাংশ থলুৱা কৰ্মচাৰীৰ জৰিয়তে একমাত্ৰ উত্তৰ-পূৱত ব্যৱসায়ী কৰি অহা বেংকটো শ্লাইছৰ হাতলৈ যোৱাৰ পাছত এতিয়া কোম্পানীটোৱে বিভিন্ন অজুহাত প্রদর্শন কৰি ইজনৰ পাছত সিজন থলুৱা কৰ্মচাৰীক চাকৰিৰ পৰা খেদি বহিঃৰাজ্যৰ কৰ্মচাৰীক নিযুক্তি প্ৰদানৰ প্রস্তুতি চলাইছে বুলি অভিযোগ উঠিছে। সমান্তৰালভাৱে বেংকটোৰ গুৱাহাটীস্থিত মুখ্য কার্যালয় বাংগালুৰুলৈ স্থানান্তৰিত কৰা প্রক্রিয়া অব্যাহত আছে।
উল্লেখ্য যে শ্লাইছ নামৰ কোম্পানীটোরে নর্থ-ইষ্ট স্মল ফাইনেন্স বেংকটো ক্ৰয় কৰাৰ সময়ত বেংকটোৰ নাম সলনি কৰা নহয় বুলি উত্তৰ-পূৱৰ প্ৰায় দুই কোটি গ্রাহকক আশ্বাস প্রদান কৰিছিল যদিও সম্প্রতি কোম্পানীটোৱে বেংকটোৰ নাম সলনি কৰিবলৈ তৎপৰতা অব্যাহত ৰাখিছে। ইয়াক লৈ বেংকটোৰ গ্ৰাহকসকলে ভৱিষ্যতক লৈ চিন্তিত হৈ পৰিছে।
উল্লেখ্য যে ৰাষ্ট্ৰীয় সংবাদ মাধ্যমত প্রকাশ পোৱা অনুসৰি, কোম্পানীটোৱে বেংকটোৰ নাম ‘শ্লাইছ স্মল ফাইনেন্স বেংক’ কৰাৰ বাবে চূড়ান্ত পৰ্যায়ত উপনীত হৈছে। নাম সলনিৰ বাবে ইতিমধ্যে বেংকটোৱে ৰিজার্ভ বেংকৰ পৰা আপত্তিবিহীন প্রমাণপত্র লাভ কৰিছে।
ইফালে, কোম্পানীটোৰ শেহতীয়া কার্যকলাপে বেংকটোৰ ভিতৰচ’ৰাত জোঁকাৰণিৰ সৃষ্টি কৰিছে। বেংকটোৰ শীৰ্ষ সূত্ৰই সদৰী কৰা অনুসৰি, উত্তৰ-পূৱৰ গ্ৰাহকৰ ওপৰত নিৰ্ভৰ কৰিয়েই বেংকটোৱে নিজৰ ব্যৱসায় অব্যাহত ৰাখিছিল। উত্তৰ-পূৱত বেংকটোৰ ২১৪টা শাখা আছে আৰু অসমত ১৩৯টা শাখা আছে। অসম তথা উত্তৰ-পূৱৰ দুই কোটি গ্ৰাহকৰ বিনিয়োগৰ জৰিয়তে বেংকটোৰ শেহতীয়া সম্পত্তিৰ পৰিমাণ হৈছে প্রায় এহেজাৰ কোটি টকা।
এই বেংকটোৱে উত্তৰ-পূবৰ দুহেজাৰৰো অধিক শিক্ষিত যুৱক-যুৱতীৰ সংস্থাপনৰ বাট প্রশস্ত কৰি আহিছে বুলি সূত্ৰটোৱে সদৰী কৰি কয় যে শেহতীয়াকৈ বেংকটোৰ নতুন কর্তৃপক্ষই বেংকটোত দীর্ঘদিন ধৰি কাম কৰি অহা বহুজনক চাকৰি এৰি যাবলৈ নিৰ্দেশনা জাৰি কৰিছে। বিভিন্ন অজুহাতত অসমৰ বহু যুৱক-যুৱতীক বেংক কর্তৃপক্ষই চাকৰিৰ পৰা খেদি পঠিয়াইছে বুলি সূত্রটোরে প্ৰকাশ কৰি এই পদসমূহত উত্তৰ-পূৱৰ বাহিৰৰ যুৱক-যুৱতীক নিযুক্তি প্ৰদানৰ প্ৰস্তুতি চলোৱাৰ অভিযোগ তোলে।
সূত্রত প্রকাশ যে নামত বেংকটোৰ মূখ্য কাৰ্যালয় গুৱাহাটীত আছে যদিও সকলো কাম বাংগালুৰুৰ পৰা সম্পাদন হৈছে। বহিঃৰাজ্যৰ যুৱক-যুৱতীক নিযুক্তি দিয়ক ক’বলগীয়া নাই; কিন্তু থলুৱা যুৱক-যুৱতীসকলক ছাটাই কৰাটো গ্রহণযোগ্য নহয়। কিয়নো বেংকটোৰ শাখা কেৱল উত্তৰ-পূবত আছে আৰু উত্তৰ-পূৱৰ জনতাৰ ধনেৰে বেংকটো চলি আছে। প্রথম অৱস্থাত বেংকটোৰ নাম সলনি নহয় বুলি শ্লাইছ কর্তৃপক্ষই সদৰী কৰিছিল যদিও সকলোকে আচৰিত কৰি বেংকটোৰ নাম সলনি কৰা প্ৰক্ৰিয়া ৯০ শতাংশ সম্পন্ন কৰা হৈছে।
উল্লেখ্য যে বেংকটোৱে থলুৱা কৰ্মচাৰীক কামৰ পৰা উলিয়াই দিয়া বিষয়ক লৈ সৰৱ হৈ পৰিছে জাতীয় দল-সংগঠনসমূহ। শীঘ্রে বেংকটোরে সিদ্ধান্ত সলনি নকৰিলে আন্দোলন গঢ়ি তোলাৰো হুংকাৰ প্ৰদান কৰিছে।
