Costume show for wimbledon tennis tournament:
বিশ্বখ্যাত উইম্বলডন ! বিশ্বৰ আগশাৰীৰ টেনিছ তাৰকাসকলে ভিৰ কৰা এইবাৰৰ উইম্বলডনত এক অভূতপূর্ব দৃশ্য দেখা গ’ল। যোৱা ১৩ জুলাইত এইবাৰৰ উইম্বলডন অপেন টেনিছৰ অন্ত পৰে। তেতিয়ালৈ দেখা গ’ল এই অভূতপূর্ব দৃশ্য। এই অভূতপূর্ব দৃশ্য আন একো নাছিল।
সেয়া আছিল এইবাৰৰ উইম্বলডনৰ প্রতিযোগিতাত ভিৰ কৰে বলিউদৰ কে’বাগ্ৰাকী অভিনেত্রীয়ে। জাকজমকীয়া সাজপাৰ পৰিধান কৰি বলিউদৰ এই অভিনেত্রীসকলে উইম্বলডনকে একপ্ৰকাৰ কান বা তেনে চলচ্চিত্র মহোৎসৱৰ ৰূপ দিয়ে। অথচ উইলম্বডন এক টেনিছ প্রতিযোগিতাহে, চলচ্চিত্র মহোৎসৱ নহয়। এইবাৰৰ উইম্বলডনত বলিউদৰ তাৰকাৰ ভিৰ দেখি একাংশই সামাজিক মাধ্যমত মন্তব্য কৰিছে যে এই অভিনেত্রীসকলেনো টেনিছৰ বিষয়ে কি জানে ! তেওঁলোকে কেতিয়াবা ঘৰত টেনিছ চাই পাইছেনে ! একাংশই আকৌ মন্তব্য কৰিছে বলিউদৰ এইসকল অভিনেত্ৰীয়ে সাজপাৰ প্ৰদৰ্শন কৰিবলৈ উইম্বলডনক বাছি ল’লে ! অৱশ্যে হলিউদৰ অভিনেতা-অভিনেত্রীসকলে প্রায়ে ষ্টেডিয়ামত উপস্থিত হৈ উইম্বলডনৰ খেল উপভোগ কৰে।
এইবাৰৰ উইম্বলডনত ভিৰ কৰা বলিউদৰ তাৰকাসকলৰ অন্যতম আছিল অনুষ্কা শর্মা, সোনম কাপুৰ, প্রীতি জিন্টা, প্রিয়ংকা চোপ্রা, জাহ্নবী কাপুৰ, মাছাবা গুপ্তা আৰু নীনা গুপ্তা, জেকলিন ফার্নান্ডেজ, উর্বশী ৰৌতেলা, অবনীত কৌৰ আদি। সম্প্রতি সামাজিক মাধ্যমত চর্চা হৈছে এইসকল তাৰকাই উইম্বলডনত পৰিধান কৰা সাজপাৰৰ কথাও। উইম্বলডনৰ সেউজ ঘাঁহনিত হোৱা এই ১৪ দিনীয়া টেনিছ প্রতিযোগিতা স্টেডিয়ামৰ পৰা উপভোগ কৰা বলিউদৰ তাৰকাসকলে পৰিধান কৰা সাজপাৰ আছিল:
#বিৰাট কোহলি আৰু অনুষ্কা শর্মা: এইবাৰো ক্রিকেট তাৰকা বিৰাট কোহলি আৰু অনুষ্কা শর্মাক উইম্বলডনত দেখা গ’ল। ২০১৫ তো এই তাৰকা দম্পতীয়ে উইম্বলডনৰ প্ৰতিযোগিতা উপভোগ কৰিছিল। এইবাৰ বগা ব্লেজাৰপেন্ট আৰু ৰাল্ফ লৰেনেৰ টুপী পৰিধান কৰা অৱস্থাত অনুষ্কাক দেখা গ’ল। তেওঁৰ স্বামী কোহলিয়ে পৰিধান কৰিছিল বিস্কুট ৰঙা ছ্যুট। ২০১৫ত অনুষ্কাক বগা পোছাকৰ আৰু কোহলিক নীলা ছু্যুট পৰিহিত অৱস্থাত দেখা গৈছিল।
#সোনম কাপুৰ: অভিনেত্রী সোনমক এইবাৰ উইম্বলডনত ৰাল্ফ লৰেনেৰ অফ হোৱাইট ছ্যুট পৰিধান কৰা অৱস্থাত দেখা গ’ল। এই ছ্যুটৰ স’তে মিলাই তেওঁ নীলা চোলা আৰু প্রিন্টেড নীলা স্কার্ফ মেৰিয়াই থাকে। এই পোছাকৰে তেওঁ বহুতৰে দৃষ্টি আকৰ্ষণ কৰিবলৈ সক্ষম হয়।
#প্রীতি জিন্টা: উইম্বলডনত সেউজীয়া শোভাৰ মাজত প্রীতি জিন্টাক নীলা ৰঙৰ সাজপাৰ পৰিধান কৰা দেখা গ’ল। তেওঁৰ স্বামী জেন গুডএনাফে পত্নীৰ পোছাকৰ স’তে মিলাই ব্লেজাৰ আৰু চোলা পৰিন্ধান কৰে।
#প্রিয়ংকা চোপা আৰু নিক জোনাছ : প্রিয়ংকাই এক ক্লাছিক হাইনেক টপ আৰু তাৰ স’তে মিলাই বগা ফ্লেয়ার্ড স্কার্ট পৰিধান কৰে। তেওঁৰ এই পোছাকক বহুতে ৰুচিশীল আৰু স্মার্ট আখ্যা দিছে। তেওঁৰ স্বামী নিক জোনাছে পৰিন্ধান কৰে গাঢ় নীলা ৰঙৰ ব্লেজাৰৰ স’তে বগা পেন্ট।
#জাহ্নৱী কাপুৰ: শ্রীদেৱীৰ কন্যা জাহ্নবী কাপুৰে পাতল নীলা চেক থকা শ্লিভলেছ ফ্রক পিন্ধে। তেওঁৰ কঁকালত সৰু ক’লা বেল্টো দেখা গ’ল। অৱশ্যে ফেশ্বন বিশেষজ্ঞসকলৰে মতে জাহ্নবীৰ এই সাজপাৰে কোনো ফেশ্বনক তুলি নধৰিলে।
#জাভেদ আখতাৰ আৰু সপত্নীক ফাৰহান আখতাৰ : এইবাৰ উইম্বলডন উপভোগ কৰে প্ৰখ্যাত কবি-গীতিকাৰ জাভেদ আখতাৰেও। তেওঁৰ স’তে পুত্ৰ-বোৱাৰী ফাৰহান আখতাৰ আৰু শিৱানী দণ্ডকাৰেও টেনিছ মেচ উপভোগ কৰে। সম্ভৱতঃ তেওঁলোকে উইম্বলডন অপেনৰ দুখন মেচ উপভোগ কৰে। এই দুদিনত শিৱানী আৰু ফাৰহানক সুকীয়া পোছাকত দেখা গ’ল। অৱশ্যে জাভেদ আখতাৰক পৰিচিত পায়জামা আৰু পাঞ্জাবী পৰিহিত অৱস্থাতে দেখা গ’ল।
# মাছাবা গুপ্তা আৰু নীনা গুপ্তা: তাৰকা মাতৃ-কন্যায়ো এইবাৰ উইম্বলডনৰ মেচ উপভোগ কৰে। মাছাবাক শ্বৰ্ট স্কার্ট পৰিহিত অৱস্থাত দেখা গ’ল। আনহাতে, মাতৃ নীনাই বগা শাৰী পৰিধান কৰে।
# জেকলিন ফার্নান্ডেজ: এইবাৰ জেকলিনে কান চলচ্চিত্র মহোৎসৱতো অংশগ্ৰহণ কৰে। উইম্বলনডত তেওঁ বগা ট্রাউজাৰৰ স’তে বগা ৰেষ্টকোট পৰিধান কৰে।
#সপত্নীক মিলিন্দ সুমন: এইবাৰ মিলিন্দ সুমন আৰু তেওঁৰ পত্নী অংকিতা কোঁৱৰেও উইম্বলডনৰ খেল উপভোগ কৰে। অংকিতাক মিডি ড্রেছত দেখা গ’ল। মিলিন্দে চাহ ৰঙী ট্ৰেক ছ্যুট পৰিধান কৰে।
#উর্বশী ৰৌতেলা: উইম্বলডনত এক অফ হোৱাইট লেচ থকা সাজ পৰিধান কৰে উৰ্বশীয়ে। এই পোছাকৰ স’তে তেওঁ ইণ্টাৰনেটত ভাইৰেল হৈছে।
অবনীত কৌৰ: অবনীত কৌৰৰ কাম-কাজৰ স’তে বহুতৰে পৰিচিতি নাই। অৱশ্যে অবনীত সামাজিক মাধ্যমত অতি সক্রিয় থাকে। চলচ্চিত্ৰ আৰু ৱেব ছিৰিজত তেওঁক দেখা যায়। এইবাৰ অবনীতে বগা স্কার্ট আৰু বগা ফিটেড টপ পৰিধান কৰি উইম্বলডনৰ মেচ উপভোগ কৰে। তেওঁৰ ডিঙিত এখন ৰুমালো মেৰিয়াই ৰাখে।