উৎসৱৰ বতৰত প্ৰতি বছৰে দেশত অনলাইন শ্ব’পিং যথেষ্ট জনপ্রিয় হৈ আহিছে। উপভোক্তাই সম্প্রতি আলু, পিয়াঁজৰ দৰে অনলাইন প্লেটফ’র্মত নানা সামগ্ৰীৰ ক্রয়-বিক্রয় কৰিছে। প্রকাশিত বাতৰি অনুসৰি, উৎসৱৰ এই বতৰত প্ৰথমটো সপ্তাহতে এমেজন আৰু ফ্লিপকাৰ্টৰ ব্যৱসায়ে ৬০,৭০০ কোটি টকাৰ সীমা অতিক্ৰম কৰিলে।
এই সময়ছোৱাত ম’বাইল ফোন, ঘৰুৱা উপভোক্তা সামগ্রী আৰু গেলামালৰ সা-সামগ্ৰীৰ সৰ্বাধিক বিক্ৰী হ’ল। কেন্দ্ৰৰ চৰকাৰে সামগ্ৰী আৰু সেৱা কৰ (জিএছটি) হ্রাস কৰাৰ কাৰণতো এইবাৰ উৎসৱৰ বতৰত অনলাইন শ্ব’পিঙৰ জনপ্রিয়তা অধিক বাঢ়িছে বুলি বিশেষজ্ঞই মত প্রকাশ কৰিছে। এমেজনৰ দা গ্রেট ইন্ডিয়ান ফেষ্টিভেল আৰু ফ্লিপকাৰ্টৰ বিগ বিলিয়ন ডেইজৰ বিক্ৰী আৰম্ভকৰাৰ লগে লগে দেশৰ অনলাইন ক্রেতাসকলে অভূতপূর্ব সঁহাৰি আগবঢ়াইছে।
এমেজন আৰু ফ্লিপকার্টে এই বিশেষ আঁচনিৰ অধীনত বিক্ৰী আৰম্ভ কৰাৰ এসপ্তাহত এই দুটা অনলাইন বাণিজ্যৰ প্লেটফ’ৰ্মত ৬০,৭০০ কোটি টকাৰ সা-সামগ্রী বিক্রী হ’ল। যোৱা বছৰৰ তুলনাত এইবাৰ এমেজন আৰু ফ্লিপকাৰ্টৰ উৎসৱৰ বতৰত বিক্ৰী ২৯ শতাংশ বৃদ্ধি পালে। গৱেষক সংস্থাই ডাটোম ইন্টেলিজেন্সৰ পূর্বানুমানত উল্লেখ কৰা অনুসৰি, চলিত বৰ্ষত উৎসৱৰ বতৰত অনলাইন সংস্থা দুটাৰ বিক্ৰীৰ পৰিমাণ ১.২ লাখ কোটি টকাৰ অধিক হোৱাৰ সম্ভাৱনা আছে।
উৎসৱৰ এই বতৰত সর্বাধিক বিক্রী হৈছে স্মার্ট ফোন। মুঠ বিক্ৰীৰ ৪২ শতাংশ হৈছে স্মার্ট ফোন। একেদৰে ঘৰুৱা বিভিন্ন সামগ্ৰীৰ বিক্ৰী ৪১ শতাংশ আৰু গেলামালৰ সামগ্ৰীৰ বিক্ৰী ৪৪ শতাংশ বৃদ্ধি পালে। ২২ ছেপ্টেম্বৰত কেন্দ্ৰৰ চৰকাৰে নতুন জিএছটি নীতি প্ৰৱৰ্তন কৰিছিল আৰু ইয়াৰ প্ৰভাৱ অনলাইন বাণিজ্যত ইতিবাচক হোৱা বুলি বিশেষজ্ঞই তথ্য সদৰী কৰিছে।
ফ্লিপকাৰ্টৰ তথ্য অনুসৰি বিগ বিলিয়ন ডেইজৰ প্ৰথম ৪৮ ঘণ্টাত ৬০৬ নিযুত লোকে ৱেবছাইট ভিজিট কৰিছিল আৰু ইয়াৰে এক তৃতীয়াংশ আছিল জেনজি প্ৰজন্মৰ। এই সময়ছোৱাত এমেজনৰ ভিজিটৰ আছিল ৩৮০ নিযুত আৰু ইয়াৰে ৭০ শতাংশ ক্ষুদ্ৰ চহৰৰ বাসিন্দা আছিল।
উৎসৱৰ বতৰত ভাৰতৰ অনলাইন বজাৰত স্মার্টফোনৰ লগতে স্মার্ট টিভি, প্রিমিয়াম ঘড়ী, অলংকাৰ, গৃহসজ্জাৰ সামগ্রী, বৈদ্যুতিক সামগ্ৰীৰ বিক্ৰী বৃদ্ধি পাইছে বুলিও এমেজন আৰু ফ্লিপকার্টে তথ্য সদৰী কৰিছে।