Dr. Tara Prasad Das:
দৈনিক অগ্ৰদূত ডিজিটেল ডেক্স:–বিপদত ড:তাৰা প্ৰসাদ দাস ৷ যিকোনো মুহূৰ্ততে বাতিল হ’ব পাৰে পাকাবেতবাৰীৰ অগপ প্ৰাৰ্থী ড:তাৰা প্ৰসাদ দাসৰ মনোনয়ন ৷ ড:দাসৰ বিৰুদ্ধে উদ্থাপিত হৈছিল ভুৱা অনুসূচিত জাতি প্ৰমাণ পত্ৰ লৈ নিৰ্বাচন খেলা ৷ ইতিমধ্যে উদ্থাপিত অভিযোগৰ ভিত্তিত ড: তাৰাপ্ৰসাদ দাসৰ জাতিগত প্রমাণপত্র অবৈধ ঘোষণা সামাজিক ন্যায় আৰু সৱলীকৰণ বিভাগৰ ৷
সামাজিক ন্যায় আৰু সৱলীকৰণ বিভাগৰ ৰাজ্যিক ভিত্তিক উচ্চ পৰ্যায়ৰ তদন্ত সমিতিয়ে বৰপেটা জিলা আয়ুক্তৰ প্ৰতিবেদন আৰু চিআইডিৰ তদন্তৰ প্ৰতিবেদনৰ ভিত্তিত পাকাবেতবাৰীৰ অগপ প্রার্থী তথা প্ৰাক্তন বিধায়ক ড: দাসৰ জাতিগত প্রমাণপত্র অবৈধ ঘোষণা কৰে ৷
তদন্তৰ প্ৰতিবেদনত উল্লেখ কৰা মতে, বৰপেটা জিলা অনুসূচিত জাতি পৰিষদৰ নামত ভুৱা পত্ৰ ব্যৱহাৰ কৰাৰ লগতে বৰপেটা জিলা আয়ুক্তৰ কাৰ্যালয়ক বিপথে পৰিচালনা কৰি অনুসূচিত জাতিৰ প্ৰমাণপত্ৰ লাভ কৰিছিল৷ সোমবাৰে এই কথা স্পষ্ট কৰিছে সামাজিক ন্যায় আৰু সৱলীকৰণ বিভাগৰ ৰাজ্যিক ভিত্তিক উচ্চ পৰ্যায়ৰ তদন্ত সমিতিয়ে৷ প্ৰাক্তন বিধায়ক তথা অগপ নেতা ড: তাৰাপ্ৰসাদ দাসে অনুসূচিত জাতিৰ বাবে সংৰক্ষিত বৰপেটা বিধানসভা সমষ্টিত নিৰ্বাচন খেলিবলৈ অনুসূচিত জাতিৰ প্ৰমাণপত্ৰ সংগ্ৰহ কৰাৰ পিছতে অনুসূচিত জাতি সংগ্ৰামী যুৱ পৰিষদকে ধৰি কেইবাটাও সংগঠনে দিয়া অভিযোগৰ ভিত্তিত সামাজিক ন্যায় আৰু সৱলীকৰণ বিভাগৰ ৰাজ্যিক ভিত্তিক উচ্চ পৰ্যায়ৰ তদন্ত সমিতিয়ে তদন্ত ঘোষণা কৰিছিল ৷
সামাজিক ন্যায় আৰু সৱলীকৰণ বিভাগৰ নিৰ্দেশ মতে, অসম আৰক্ষীৰ চিআইডিয়ে তদন্ত কৰে৷ তদন্তত তাৰা প্ৰসাদ দাস অথবা তেওঁৰ পৰিয়ালৰ কোনো সদস্য যেনে ভাতৃসকলৰ কোনো বৈধ অনুসূচিত জাতিৰ প্ৰমাণ পত্ৰৰ অধিকাৰী নহয় বুলি ওলাই পৰে। বৰপেটা জিলা অনুসূচিত জাতি পৰিষদে তেওঁ অনুসূচিত জাতিৰ লোক বুলি প্ৰমাণপত্ৰ দিয়া নাছিল৷ বৰপেটা জিলা অনুসূচিত জাতি পৰিষদৰ ২২/০২/২০২৫ তাৰিখৰ AAJP/BAR/1312 পত্ৰ যোগে তাৰা প্ৰসাদ দাসে অনুসূচিত জাতিৰ প্ৰমাণপত্ৰ লাভ কৰিছিল৷ কিন্তু তাৰা প্ৰসাদ দাসক বৰপেটা জিলা অনুসূচিত জাতি পৰিষদে AAJP/BAR/1312 নম্বৰৰ কোনো পত্ৰই দিয়া নাছিল৷ পৰিষদৰ তথ্য মতে AAJP/BAR/1312 ছিৰিয়েল নম্বৰটো আন এজন ব্যক্তি মাইনা মণ্ডলক দিয়া হৈছিল। চিআইডিয়ে স্পষ্ট কৰিছে যে তাৰা প্ৰসাদ দাস অনুসূচিত জাতিৰ লোক নহয়।
ইপিনে বৰপেটা জিলা আয়ুক্তই ০৪/১০/২০২৫ তাৰিখৰ CAG-1/2022/324 নম্বৰৰ এক প্ৰতিবেদন দিয়ে৷ জিলা আয়ুক্তৰ প্ৰতিবেদনত কোৱা হৈছে যে তাৰা প্ৰসাদ দাসে লাভ কৰা জাতিগত প্ৰমাণ পত্ৰ জাল নথিৰ ওপৰত আধাৰিত৷ তেওঁ জাল নথিপত্ৰ দাখিল কৰি জিয়া আয়ুক্তৰ কাৰ্যালয়ৰ পৰা অনলাইন জাতিগত প্ৰমাণ পত্ৰ লাভ কৰিবলৈ প্ৰশাসনক বিভ্ৰান্ত কৰিছিল। আজি ৰাজ্যিক ভিত্তিক উচ্চ পৰ্যায়ৰ তদন্ত সমিতিয়ে চিআইডিৰ প্ৰতিবেদন, বৰপেটা জিলা আয়ুক্তৰ প্ৰতিবেদনসমূহ পৰীক্ষা কৰি তাৰা প্ৰসাদ দাস অনুসূচিত জাতিৰ লোক নহয় বুলি স্পষ্ট কৰে৷ লগতে জাতিগত প্ৰমাণপত্ৰ জাৰি কৰা কৰ্তৃপক্ষক শীঘ্ৰে শ তাৰা প্ৰসাদ দাসৰ প্ৰমাণপত্ৰখন বাতিল কৰিবলৈ পৰামৰ্শ দিছে৷ অনুসূচিত জাতি সংগ্ৰামী যুৱ পৰিষদে এক বিবৃতিত কয় যে ,সংশ্লিষ্ট কৰ্তৃপক্ষক তাৰা প্ৰসাদ দাসৰ জাতিগত প্ৰমাণ পত্ৰ ভুৱা সন্দৰ্ভত এক অভিযোগ দাখিল কৰা হৈ’ যাৰ ফলস্বৰূপে শুনানিৰ আয়োজন কৰা হৈছিল ৷
সোমবাৰে জনতা ভৱনত অনুষ্ঠিত অন্তিম শুনানিত উপস্থিত থাকে অনুসূচিত জাতি সংগ্ৰামী যুৱ পৰিষদ সহ আন কে’বাটাও অনুসূচিত জাতীয় সংগঠন ৷ শুনানিত সকলো নথি উত্থাপন দাখিল কৰা হয় ৷ এই নথিপত্ৰৰ ভিত্তিতে দুৰ্নীতিৰ সদাগৰ ৰূপে পৰিচিত অসম লোকসেৱা আয়োগৰ প্ৰাক্তন অধ্যক্ষ ড:তাৰা প্ৰসাদ দাসৰ জাতিগত প্ৰমাণপত্ৰখন বাতিল কৰা হয়৷ সংগঠনটোৰ সভাপতি সঞ্জীৱ দাসে এক বিবৃতিত কয় যে কেইবাটাও স্তৰত তদন্ত চলি থকাৰ সময়তে নিজকে ধোৱা তুলসীৰ পাত সজাবলৈ উঠিপৰি লাগিছিল ড: তাৰা প্ৰসাদ দাসে। অনুসূচিত জাতিৰ লোক নোহোৱাৰ পিছতো নিশাৰ ভিতৰতে ভুৱা অনুসূচিত জাতিৰ প্ৰমাণপত্ৰ উলিয়াই নিৰ্বাচন খেলিব খোজা ড: তাৰাপ্ৰসাদ দাসক শীঘ্ৰে গ্ৰেপ্তাৰ কৰি মনোনয়ন বাতিল দাবী কৰো ৷
সংগঠনটোৰ সভাপতি গৰাকীয়ে আৰু কয় যে ড: দাসে যে ভুৱা নথিৰে জালিয়াতি কৰি জাতিগত প্ৰমাণপত্ৰ উলিয়াইছিল সেই কথা চিআইডিৰ তদন্তত প্ৰমাণিত হৈছে ৷