সংসদত প্ৰধানমন্ত্ৰী নৰেন্দ্ৰ মোদীৰ বক্তব্যত ছিংঘু সীমান্তৰ প্ৰতিবাদী কৃষকসকলে সমস্যা সমাধানৰ কোনো বাৰ্তা লাভ নকৰাত বুজি উঠিছে যে আন্দোলন দীৰ্ঘস্থায়ী হ’ব । সেয়ে নিজৰ মাজত যোগাযোগ বৃদ্ধি কৰিবৰ বাবে নতুন পৰিকাঠামো গ্ৰহণ কৰিছে কৃষকসকলে । আসন্ন গৃষ্মৰ স’তে যুঁজ দিয়াৰ বিষয়েও চিন্তা কৰিছে তেওঁলোকে ।
লগতে ছিংঘু সীমান্তত দৃষ্টি নিক্ষেপ বৃদ্ধি কৰিছে প্ৰতিবাদী কৃষক সংগঠন সংযুক্ত কিষান মৰ্চাই । এই দল ছশ জন স্বেচ্ছাসেৱীৰ দ্বাৰা সংগঠিত । কৃষক নেতাসকলে আশংকা কৰে যে বিশ্ৰামৰ সময়ত দুষ্কৃতিকাৰীয়ে আক্ৰমণ কৰিব পাৰে । সেয়ে ২৪ ঘণ্টাই পহৰা দিব এই স্বেচ্ছাসেৱীসকলে । সেয়ে আন্দোলনৰ মূল মঞ্চৰ লগতে গুৰুত্বপূৰ্ণ অঞ্চলসমূহত এশটা চিচি টিভি কেমেৰা আৰু শক্তিশালী ভিডিঅ’ ৰেকৰ্ডাৰ স্থাপন কৰিছে কৃষক নেতাসকলে ।
মঞ্চৰ পিছফালে এখন মনিটৰিং কোঠালীও নিৰ্মাণ কৰা হৈছে । মঞ্চত অনুষ্ঠানৰ সময়ত যাতে সকলোৱে একে ঠাইতে গোট নাখায়, সেয়ে ১০ টা গুৰুত্বপূৰ্ণ স্থানত এলচিডি স্থাপনৰো পৰিকল্পনা কৰা হৈছে । লগতে দিল্লীৰ উত্তপ্ত গৰমক প্ৰত্যাহ্বান দিবৰ বাবে পৰ্যাপ্ত ফেন আৰু এয়াৰকুলাৰ স্থাপনৰ বাবেও সিদ্ধান্ত গ্ৰহণ কৰা হৈছে ।
চৰকাৰে অৱশ্যে কৃষক নেতাসকলৰ বিৰুদ্ধে প্ৰতিহিংসামূলক পদক্ষেপ জাৰি ৰাখিছে । কিছুদিন পূৰ্বে তিনি কৃষি আইন সম্পূৰ্ণ প্ৰত্যাহাৰৰ দাবী জনাই আলিগড়ত যি মহাপঞ্চায়ত অনুষ্ঠিত হয়, তাতে ৰাষ্ট্ৰীয় লোক দলৰ নেতা জয়ন্ত চৌধুৰীয়ে কৃষকসকলৰ এই দাবীক সমৰ্থন জনায় । চৌধুৰী নিজেও কৃষক নেতা । ইয়াৰ পাছতেই আৰক্ষীয়ে চৌধুৰী আৰু তেওঁৰ পাঁচ হেজাৰ সমৰ্থকৰ বিৰুদ্ধে এফআইআৰ দাখিল কৰে । ২২ জন নেতাৰ নাম প্ৰকাশ কৰিছে আৰক্ষীয়ে, বাকীসকলৰ পৰিচয় অজ্ঞাত বুলি কোৱা হৈছে । তেওঁলোকৰ বিৰুদ্ধে অতিমাৰী আইন ভংগৰ অভিযোগ উত্থাপন কৰা হৈছে । আৰক্ষীৰ অভিযোগ সামাজিক দূৰত্ব অৱলম্বন নকৰাকৈ এই সভা অনুষ্ঠিত কৰা হৈছে ।
আন্দোলন অব্যাহত ৰাখিবলৈ পৰ্যায়ক্ৰমে হাজিৰীৰ ব্যৱস্থা কৰিছে কৃষকসকলে । অৰ্থাৎ এখন গাঁওৱে আহি আন্দোলনত যোগ দিলে আন এখন গাঁও উভতি যায় । ১৫ দিন পাছত পুনৰ আন্দোলনত উভতি আহিলে আন এটা দল গৃহমুখী হয় । আন্দোলনকাৰীসকলৰ যুক্তি কৃষি কাৰ্যত অৱহেলা কৰাৰ অৱকাশ নাই । আন্দোলনৰ ফলত কৃষি কাৰ্য থাকি গ’লে পৰিয়ালবৰ্গ যিদৰে বিপদত পৰিব, থিক সেইদৰে সমগ্ৰ দেশেই মূল্য বৃদ্ধিৰ কৱলত পৰিব ।
