Assam Budget 2023-24:
আজি অসম বিধানসভাৰ পঞ্চম দিনটোত সদনত বিত্তমন্ত্রী অজন্তা নেওগে আজি দাখিল কৰে ২০২৩-২৪ বিত্তীয় বৰ্ষৰ বাজেট। এই বাজেটখন একত্ৰীকৰণ আৰু সম্প্ৰসাৰণ বিষয়ক বাজেট বুলি উল্লেখ কৰে বিত্তমন্ত্ৰীয়ে।
চৰকাৰৰ অবিৰত প্ৰচেষ্টাৰ ফলস্বৰূপে ৰাজ্যখনৰ অৱস্থাৰ উল্লেখযোগ্যভাৱে উন্নতি ঘটিছে বুলি বাজেট ভাষণত উল্লেখ। মুঠ ঘৰুৱা উৎপাদন- ৫.৫০ লাখ কোটি টকাৰ সীমা অতিক্ৰম কৰাৰ লগে লগে ২০২৩–২৪ বৰ্ষত এক নতুন ইতিহাস ৰচনা কৰিবলৈ সক্ষম হ’ব বুলি উল্লেখ কৰে বিত্তমন্ত্ৰীয়ে।
ব্যয়ৰ ক্ষেত্ৰত বিগত বৰ্ষত এক লাখ কোটি টকাৰ সীমা অতিক্ৰম কৰা বুলি উল্লেখ কৰি এই বৰ্ষত অর্থাৎ ২০২২-২৩ বৰ্ষত অধিক ব্যয় কৰিবলৈ সক্ষম হ’ব বুলি উল্লেখ কৰে বাজেট ভাষণত ।
বিত্তমন্ত্ৰী গৰাকীৰ ভাষ্য অনুসৰি ৰাজ্যত বৃদ্ধি পাইছে জনমূৰি আয় । বৰ্তমান ৰাজ্যৰ জমা আৰু ঋণৰ অনুপাত ৫৭.৫ শতাংশলৈ বৃদ্ধি হোৱা বুলিও উল্লেখ কৰে বিত্তমন্ত্ৰী গৰাকীয়ে ।
কিন্তু এই সকলোৰে মাজত বিত্তমন্ত্ৰী গৰাকীয়ে উল্লেখ নকৰা বিষয়টি হ’ল ৰাজ্যত ক্ৰমাৎ বৃদ্ধি পায় অহা জনমূৰি ঋণৰ পৰিমাণ । ৰাজ্যৰ প্ৰতিজন লোকৰ মূৰত আছে ৩৮ হেজাৰ টকাৰ ঋণ । ১৪ মাৰ্চ, ২০২৩ লৈ ৰাজ্য চৰকাৰে লোৱা ঋণৰ পৰিমাণ হ’ল ১ লাখ ৩১ হাজাৰ ২৭৩ কোটি টকা ।
বিত্তমন্ত্ৰী গৰাকীৰ পূৰ্বৰ ভাষ্য অনুসৰিয়েই, ২০২২ বৰ্ষৰ মে’ মাহৰ পৰা নৱেম্বৰ মাহলৈ কেৱল ৮ মাহতেই ৰাজ্য চৰকাৰে ১৯ হাজাৰ ৩৫৩ কোটি টকা ঋণ লৈছিল ।
মনকৰিবলগীয়া যে,অজন্তা নেওগে দাখিল কৰা ২০২৩-২৪ বিত্তীয় বৰ্ষৰ ৰাজ্যৰ বাজেটত একত্ৰীকৃত নিধিত মুঠ ১৩৯৪৪৩.৮৮ কোটি টকাৰ প্ৰাপ্তিৰ প্ৰদৰ্শন কৰা হৈছে।
ইয়াৰে ১১৪০৮৪.৬৯ কোটি টকা ৰাজহ শিতানত আৰু বাকী ধন ২৫৩৫৯.১৯ কোটি টকা মূলধনী শিতানৰ। বিভিন্ন উৎসৰ পৰা অহা একত্ৰীকৃত নিধিৰ আনুমানিক প্ৰাপ্তিৰ তালিকা অনুসৰি ৰাজ্যিক কৰৰ পৰা ৩০০০১.৬৬ কৰহীন ৰাজহ, ৭০১০.৮৪ কোটি টকা কেন্দ্ৰীয় চৰকাৰে দিয়া ৰাজহ, ৩১৯৫০.৮৯ কোটি টকা কেন্দ্ৰীয় চৰকাৰে পৃষ্ঠপোষকতা কৰা আঁচনিৰ বাবত ৩১১৩০.৪৮ কোটি টকা বিত্তীয় আয়োগৰ অনুদান, ১০১৮৬.৩৯ কোটি টকা।
বাজেটখনত মুল বিষয় কেইটামান সন্নিৱিষ্ট কৰা হৈছে ৷ উজ্জীৱিত অসমৰ ভেটি নিৰ্মাণৰ লক্ষ্য বাজেটত। দৰিদ্ৰতা, নিবনুৱা সমস্যা দূৰ কৰাৰ লক্ষ্য বাজেটত।
মুঠ ৰাজ্যিক ঘৰুৱা উৎপাদন ৫.৫ লাখ কোটিৰ সীমা অতিক্ৰমৰ লক্ষ্য। চলিত বৰ্ষত ১০ লাখ মেট্ৰিকটন ধান ক্ৰয় কৰাৰ লক্ষ্য। নিষ্পত্তি নোহোৱা গোচৰৰ বাবে সদ্ভাৱনা অভিযান আৰম্ভ।
বিত্তমন্ত্ৰীয়ে কয়,চৰকাৰী চাকৰিত এক লাখ নিযুক্তি প্ৰতিশ্ৰুতিৰে চৰকাৰে প্ৰাৰম্ভিক পদক্ষেপ হিচাপে ইতিমধ্যে ২০২১ চনৰ ১০ মে’ৰ পৰা চৰকাৰী খণ্ডত ৪১,৯২০ গৰাকী প্ৰাৰ্থীক নিযুক্তি দিয়া হৈছে।
ইয়াৰ উপৰি চৰকাৰে আৰু ৪০ হাজাৰ চাকৰিত নিযুক্তিৰ প্ৰক্ৰিয়া অব্যাহত ৰাখিছে। শীঘ্ৰে এই পর্যায়ো সমাপ্ত হ’ব ৷ মে’ মাহত দিয়া হ’ব ৪০ হেজাৰ নতুন নিযুক্তি ৷
আনহাতে স্বাস্থ্য খণ্ড ব্যাপক অগ্ৰগতিৰ দিশত আগবঢ়াই নিয়াৰ লক্ষ্যৰে ৰেচন কাৰ্ড থকা প্ৰায় ২৭ লাখ লোকে ৫ লাখকৈ নগদবিহীন বিনামূলীয়া চিকিৎসা সেৱা লাভ কৰাৰ বিষয়ে বাজেট খনত উল্লেখ কৰিছে মন্ত্ৰী গৰাকীয়ে একেদৰে
ৰাজ্য চৰকাৰে ২০২৬ চনৰ ভিতৰত অসমক উত্তৰ-পূৰ্বাঞ্চলৰ চিকিৎসা সেৱাৰ হাব হিচাপে গঢ়ি তোলাৰ লক্ষ্য স্থিৰ কৰিছে চৰকাৰে।
ইতিমধ্যে তিনিচুকীয়া চিকিৎসা মহাবিদ্যালয়ৰ নিৰ্মাণকাৰ্য শেষ পর্যায়ত উপনীত হোৱাৰ লগতে চৰাইদেউ আৰু বিশ্বনাথত দুখন চিকিৎসা মহাবিদ্যালয় স্থাপনৰ কাম আৰম্ভ হৈছে ।
তামুলপুৰ, ধেমাজি, গোলাঘাট, বঙাইগাঁও আৰু মৰিগাঁৱত ৫খন নতুন চিকিৎসা মহাবিদ্যালয়ৰ আধাৰশিলা স্থাপন কৰা হৈছে। গুৱাহাটীত স্বাস্থ্য ভৱন নিৰ্মাণৰ কাম হাতত লোৱা হৈছে ।
বাজেট খনত শিক্ষা খণ্ড সম্পৰ্কত বাজেট ভাষণত বিত্তমন্ত্ৰীয়ে উল্লেখ কৰে যে ৰাজ্য চৰকাৰে ২১৪খন উচ্চ মাধ্যমিক বিদ্যালয়ক উচ্চতৰ মাধ্যমিক বিদ্যালয়লৈ উন্নীত কৰিছে আৰু আন ৭১৬খন বিদ্যালয়কো উচ্চতৰ মাধ্যমিকলৈ উন্নীত কৰাৰ লক্ষ্য নিৰ্ধাৰণ কৰা হৈছে ।
তিনি বছৰীয়া অংগনৱাড়ী শিক্ষাক নিম্ন প্ৰাথমিক বিদ্যালয়ৰ দুবছৰীয়া পাঠ্যক্ৰমৰ সৈতে সংমিশ্ৰিত কৰি পাঁচ শ্ৰেণীৰ বুনিয়াদী শিক্ষা হিচাপে নামকৰণ কৰাত অনুমোদন চৰকাৰৰ ১১৯খন আদর্শ বিদ্যালয় স্থাপনৰ বাবে ব্যৱস্থা হাতত লৈছে চৰকাৰে।
ইফালে, মঙলদৈত ১০১৬ কোটি টকাৰ প্ৰকল্প ব্যয়েৰে দক্ষতা বিশ্ববিদ্যালয়ৰ কাম চলি আছে বুলিও উল্লেখ কৰে অজন্তা নেওগে।
পলকতে বাজেট খনৰ কিছু কিয়দাংশ :
আত্মসহায়ক গোট সমূহৰ প্ৰতিগৰাকী মহিলা সদস্যৰ একাউণ্টলৈ দিয়া হ’ব এহেজাৰ টকা ৷ অৰুণোদয় আঁচনিৰ ধন ১৪০০ টকালৈ বৃদ্ধি ৷
অৰুণোদয় ২.০ত ১০ লাখ নতুন হিতাধিকাৰী অন্তৰ্ভুক্তিৰ প্ৰক্ৰিয়া চলি আছে ৷ ১৭ লাখৰ পৰা হিতাধিকাৰীৰ সংখ্যা বৃদ্ধি পাব ২৭.৫ লাখলৈ ৷ আঁচনিখনৰ বাবত বাজেটত ধাৰ্য ৩,৪২০ কোটি টকা ৷
কৃষি আয়কৰ ৰেহাই দি অহা তিনিবৰ্ষলৈ কৃষি আইকৰ ৰেহাই ৷
বাল্য বিবাহ সম্পৰ্ক বাজেটত উল্লেখ কৰা হৈছে প্ৰতি ছমাহৰ মুৰে মুৰে বাল্য বিবাহৰ বিৰুদ্ধে অভিযান অব্যাহত থাকিব ৷২০২৬ ৰ ভিতৰত বাল্যবিবাহ বিহীন অসম গঢ়ি তোলাৰ লক্ষ্য স্থিৰ কৰিছে চৰকাৰে ৷
ৰাজ্যৰ শতবৰ্ষ গৰকা নামঘৰ,মন্দিৰ,মছজিদ,গীৰ্জা আৰু গুৰুদ্বাৰলৈ চৰকাৰে আগবঢ়াব ১৫ লাখ টকাৰ অনুদান ৷
অৰুণোদয় হিতাধিকাৰী সকলে চলিত বৰ্ষৰ শেষৰ ফালে লাভ কৰিছে ১৪০০ টকা ৷
ৰাজ্যৰ যুৱক- যৱতীৰ বাবে এটা ভাল খবৰ ৷ এই বৰ্ষৰ মাজ মাহত ৪০ হেজাৰ চাকৰিৰ বিজ্ঞাপন দিব চৰকাৰে ৷
নিবনুৱালৈ স্ব-নিয়োজনৰ বাবে বৃহৎ প্ৰস্তাৱ ৷
১লাখ যুৱক-যুৱতীলৈ ২লাখ টকাৰ এককালীন সাহাৰ্য ৷ ২লাখ নিৱনুৱাৰ বাবে তিনি বছৰত বিনিয়োগ কৰা হ’ব ৫০০০ কোটি টকা ৷
স্ব-নিয়োজনৰ এই বৃহৎ আঁচনিৰ বাবে ১০০০ কোটি আবন্টন বাজেটত ৷ বৈদ্যুতিক বাহনৰ গৰাকীয়ে পাব পঞ্জীয়ন মাচুল ৰেহাই ৷ ২ শতাংশ ৰেহাই পাব যান-বাহননৰ কৰ ৷
৫০০ খন উচ্চ মাধ্যমিক বিদ্যালয়ক দিব এক কোটি টকাকৈ ৷ চৰকাৰী আৰু প্ৰাদেশীকৃত মাধ্যমিক বিদ্যালয়ৰ নৱম শ্ৰেণীৰ শিক্ষাৰ্থীলৈ বিনামূলীয়া চাইকেল ৷
ৰাজ্যৰ আঠ খন মহাবিদ্যালয়ক বিশ্ববিদ্যালয়লৈ উন্নীত কৰাৰ কথা ঘোষণা বাজেটত ৷ মহাবিদ্যালয় কেইখন হ’ল নগাঁও মহাবিদ্যালয়,শিৱসাগৰ মহাবিদ্যালয়, গুৱাহাটীৰ সন্দিকৈ ছোৱালী মহাবিদ্যালয়,কোকোৰাঝাৰ চৰকাৰী মহাবিদ্যালয়,বঙাইগাঁও মহাবিদ্যালয়,যোৰহাট জে বি মহাবিদ্যালয়,উত্তৰ লখিমপুৰ মহাবিদ্যালয়,শিলচৰৰ গুৰুচৰণ মহাবিদ্যালয় ৷ উল্লেখ্য যে গহপুৰতো হ’ব কনকলতা বৰুৱা ৰাজ্যিক বিশ্ববিদ্যালয় ৷
