Pm Modi Speech In Parliament:
বিৰোধীয়ে ২৬ জুলাইত মোডী চৰকাৰৰ বিৰুদ্ধে অনাস্থা প্ৰস্তাৱ উত্থাপন কৰিছিল যাক লোকসভাৰ অধ্যক্ষ ওম বিৰলাই গ্ৰহণ কৰিছিল। দ্বিতীয়বাৰৰ বাবে মোডীয়ে বিৰোধীৰ অনাস্থা প্ৰস্তাৱৰ সন্মুখীন হোৱাৰ পাছত আজি বিয়লি প্ৰস্তাৱৰ অন্তিম দিনটোত বহু প্ৰতিক্ষাৰ অন্তত অনাস্থা প্ৰস্তাৱক লৈ প্ৰধানমন্ত্ৰী নৰেন্দ্ৰ মোদীৰ প্ৰত্যুত্তৰ আৰম্ভ কৰে ৷
২০ জুলাইত বৰ্ষাকালীন অধিৱেশনৰ আৰম্ভণিৰ পৰা মণিপুৰৰ হিংসাত্মক ঘটনাকে ধৰি কেইবাটাও বিষয়ত সংসদত কংগ্ৰেছ সহ বিৰোধী দল সমূহক একজোঁট হোৱা দেখা গৈছিল ৷
আনহাতে প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে অনাস্থা প্ৰস্তাৱ সন্দৰ্ভত হোৱা বিতৰ্কৰ উত্তৰৰ সময়ত বিৰোধী দলে সদন উত্তাল কৰি তোলে ৷
বিতৰ্কৰ সময়ত প্ৰধানমন্ত্ৰী মোডীয়ে কয় যে বিৰোধী নেতাসকলে গোপন আশীৰ্বাদ লাভ কৰিছে, যাৰ ফলত সদনৰ শাসক পক্ষৰ পৰা হাঁহি ৰোল উঠে ৷
প্ৰধানমন্ত্ৰীয়ে কয় , যেতিয়াই বিৰোধী নেতাসকলে কাৰোবাৰ ওপৰত বেয়া কামনা কৰে, তেতিয়াই সেই ব্যক্তিজনে সদায় লাভান্বিত হয়। “মই ইয়াৰ অন্যতম উদাহৰণ।
প্ৰধানমন্ত্ৰী মোডীয়ে তেতিয়া নিজৰ কথা প্ৰমাণ কৰিবলৈ আন তিনিটা উদাহৰণ দিছিল। প্ৰধানমন্ত্ৰীয়ে কয় , বিৰোধীয়ে ভাৰতৰ বেংকিং খণ্ডক প্ৰশ্ন কৰাৰ চেষ্টা কৰিছিল কিন্তু তেতিয়াৰ পৰা তেওঁলোকৰ লাভ দুগুণ হৈছে, তেওঁলোকে কয় যে বেংকিং খণ্ড চূৰ্ণ-বিচূৰ্ণ হ’ব, ই ধ্বংস হ’ব, ৰাষ্ট্ৰ ৰৈ যাব। তেওঁলোকে তেওঁলোকৰ নেতিবাচক বৰ্ণনা বিয়পাবলৈ বিদেশৰ পৰা গোপন উদ্গনি পাইছিল। যেতিয়া তেওঁলোকে আমাৰ বেংকসমূহৰ বাবে বেয়া কামনা কৰিছিল, আমাৰ ৰাজহুৱা খণ্ডৰ বেংকবোৰ বিকশিত হৈছিল বুলি উল্লেখ কৰে ৷
একেদৰে প্ৰধানমন্ত্ৰী মোডীয়ে কয় যে ,বিৰোধীয়ে এইছ এ এল আৰু এল আই চিক লৈ দেশত ভুৱা প্ৰচাৰ চলাইছিল ৷ এক প্ৰকাৰ এইচ.এ.এল.-ক ডিক্ৰিপ্ট কৰিবলৈ চেষ্টা কৰিছিল কিন্ত এতিয়া এইচ.এ.এল. সৰ্বাধিক ৰেকৰ্ড কৰিছে আৰু বিকশিতৰ দিশে গতি কৰিছে। এইচ.এ.এল. এতিয়া দেশৰ গৌৰৱ হৈ পৰিছে বুলি মন্তব্য কৰে প্ৰধানমন্ত্ৰীয়ে ।
তেওঁ কয় যে বিৰোধীয়ে এলআইচিকো সমালোচনা কৰিবলৈ চেষ্টা কৰিছিল কিন্তু এতিয়া এলআইচি দিনক দিনে শক্তিশালী হৈ উঠিছে ।
কাশ্মীৰৰ জনতাক বিশ্বাস নকৰি পাকিস্তানৰ পতাকা লৈ ফুৰাসকলক বিশ্বাস কংগ্ৰেছে কৰিছিল বুলি মন্তব্য কৰি প্ৰধানমন্ত্ৰীয়ে কয়,ভাৰতে তৈয়াৰ কৰা ক’ভিড ভেকচিনতো বিশ্বাস নাছিল কংগ্ৰেছ দলৰ ৷
ফিল্ডিং বিৰোধীয়ে সজাইছিল, কিন্তু চেঞ্চুৰি আমি মাৰিলোঁ বুলি উল্লেখ কৰি প্ৰধানমন্ত্ৰীয়ে কয় যে তেওঁৰ চৰকাৰৰ বিৰুদ্ধে অনাস্থা প্ৰস্তাৱ তেওঁৰ বাবে শুভ আৰু ২০২৪ চনত এন ডি এ- এ বৃহৎ জনাদেশৰ সৈতে শাসনলৈ তৃতীয়বাৰৰ বাবে উভতি আহিব বুলি দৃঢ়তাৰে কয়।
এই বাতৰি প্ৰস্তুত কৰালৈকে সদনত সুদীৰ্ঘ ভাষণ অব্যাহত ৰাখে প্ৰধানমন্ত্ৰীয়ে ৷ অনাস্থা প্ৰস্তাৱ সন্দৰ্ভত ভোটদান নিশাৰ ভাগলৈ হোৱাৰ সম্ভাৱনা আছে ৷
উল্লেখ্য যে,সদনত বিজেপি সহ সকলো এন ডি এ সাংসদ সকল উপস্থিত থকাৰ হুইপ জাৰি কৰিছিল দলীয় চীফ হুইপে ৷ আনহাতে কংগ্ৰেছ সহ বিৰোধীৰ উমৈহতীয়া মঞ্চ ইণ্ডিয়াৰ সাংসদ সকলো উপস্থিত থাকে সদনত ৷