Mou Signing Ceremony:
মহানগৰীৰৰ খানাপাৰাস্থিত পৰিবহন আয়ক্তৰ কাৰ্যালয়ৰ সভাকক্ষত শণিবাৰে পৰিবহন মন্ত্ৰী পৰিমল শুক্লবৈদ্যৰ উপস্থিতিত অসম চৰকাৰৰ পৰিবহন বিভাগ আৰু টাটা পাৱাৰ ইভি চার্জিং চলিউচন লিমিটেডৰ মাজত এক বুজাবুজিৰ চুক্তি স্বাক্ষৰ কৰা হয়।
অসম চৰকাৰৰ হৈ এই বুজাবুজিৰ চুক্তি স্বাক্ষৰ কৰে পৰিবহন আয়ুক্ত ড° ৰবীন কুমাৰ আৰু টাটা পাৱাৰ ইভি চার্জিং চলিউচন লিমিটেডৰ পৰা স্বাক্ষৰ কৰে এই গ্ৰুপৰ ব্যৱসায়িক উন্নয়ন মুৰব্বী বীৰেন্দ্ৰ গোৱেলে ৷
উল্লেখ্য যে, এই পদক্ষেপে সদাব্যস্ত গুৱাহাটী মহানগৰীত ইভি চার্জিং আন্তঃগাঁথনিৰ ক্ষেত্ৰত বিশেষ সুবিধা আগবঢ়াব। এই পদক্ষেপৰ অংশ হিচাবে টাটা পাৱাৰে চহৰৰ ভিতৰত পাইলট প্রজেক্ট হিচাপে গুরুত্বপূর্ণ স্থানত ১০টা উন্নত ইভি চাৰ্জাৰৰ নেটৱৰ্ক স্থাপন কৰিবলৈ সাজু হৈছে।
ইডি চাৰ্জাৰৰ এই নেটৱৰ্কে পথসমূহত ইলেক্ট্রিক বাহন ব্যৱহাৰ বৃদ্ধিৰ সম্ভাৱনাৰ পথ প্ৰশক্ত কৰিব যিয়ে আমাৰ বহনক্ষম নগৰ উন্নয়ন আৰু পৰিবেশ সংৰক্ষণৰ সৈতে মিল থকা বায়ু প্ৰদূষণ হ্ৰাস কৰাৰ ক্ষেত্ৰত ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই যোৱা দিনবোৰত গ্ৰহণ কৰা পদক্ষেপৰ সাকাৰ ৰূপ দিয়াত সহায় কৰিব।
স্মতৰ্ৱ্য যে, এই একেটা অনুষ্ঠানতে পথ সুৰক্ষা ম’বাইল এপ আৰু কৃত্রিম বুদ্ধিমত্তা সক্ষম হোৱাটছএপ ভিত্তিক “পথ সুৰক্ষা সহযোগী” নামৰ এটা এপ অসমৰ পৰিবহন মন্ত্ৰী পৰিমল শুক্লবৈদ্যই মুকলি কৰে। এই এপৰ জৰিয়তে প্ৰতিজন নাগৰিকে পথ সুৰক্ষাৰ বিভিন্ন অভিযোগসমূহ উপস্থাপন কৰিব পাৰিব।
এই প্রযুক্তিগত পদক্ষেপে ৰাজ্যত পথ সুৰক্ষাৰ সজাগতাৰ লগতে পথ দূৰ্ঘটনা আৰু মৃত্যুৰ হাৰ হ্ৰাস কৰাৰ ক্ষেত্ৰত বিশেষভাৱে সহায় কৰিব। আনহাতে এই কাৰ্যসূচীৰ পূৰ্বে পৰিবহন মন্ত্ৰী পৰিমল শুক্লবৈদ্যই আজি পৰিবহন আয়ুক্তৰ কাৰ্যালয়ৰ এটা অত্যাধুনিক সভাগৃহও উদ্বোধন কৰে।
বুজাবুজিৰ চুক্তি স্বাক্ষৰ অনুষ্ঠানত অংশগ্ৰহণ কৰি পৰিবহন মন্ত্রী পৰিমল শুক্ল বৈদ্যই প্রদূষণ নিয়ন্ত্ৰণৰ ক্ষেত্ৰত টাটা পাৱাৰ ইভি চার্জিং চলিউচন লিমিটেডে লোৱা এনে পদক্ষেপৰ শলাগ লয়।
প্রায় ৫৪ শতাংশ প্ৰদূষণ যান-বাহনৰ পৰা হয় বুলি উল্লেখ কৰি তেওঁ ৰাজহুৱা স্থানত ইলেক্ট্রিক বাহনৰ চার্জিং ষ্টেচন স্থাপনে মহানগৰী তথা ৰাজ্যখনৰ জনসাধাৰণক এই বাহন অনাৰ প্ৰতি বিশেষভাবে আকৰ্ষিত কৰি পৰিবেশ সম্ভলন বজাই ৰখাৰ দিশত অৰিহণা যোগাব বুলি কয়। মন্ত্ৰীগৰাকীয়ে ষ্টেচন কেইটা সোনকালে স্থাপন কৰাৰ পদক্ষেপ ল’বলৈ প্ৰতিষ্ঠানটোক আহ্বান জনায়।
অনুষ্ঠানত বক্তব্য প্ৰদান কৰি টাটা পাৱাৰ ইভি চার্জিং চলিউচন লিমিটেডৰ বাণিজ্যিক উন্নয়নৰ মুৰব্বী বীৰন্দ্র গোৱেলে প্রাথমিক অৱস্থাত মহানগৰীৰ বিভিন্ন স্থানত ১০টা এনেকুৱা ষ্টেচন স্থাপনৰ পিছত ৰাজ্যখনৰ ৰাষ্ট্ৰীয় ঘাইপথ তথা অন্যান্য নগৰসমূহত প্ৰতিস্থানটোৱে ইয়াৰ প্ৰসাৰ বৃদ্ধি কৰিব বুলি কয়।
অনুষ্ঠানত পৰিবহন বিভাগৰ সচিব আদিল খানে বিভাগে পথ দুর্ঘটনা হ্ৰাস কৰাৰ ক্ষেত্ৰত লোৱা বিভিন্ন পদক্ষেপৰ বিষয়ে ব্যাখ্যা কৰে। অনুষ্ঠানত পৰিবহন বিভাগৰ উচ্চ পদস্থ বিষয়া, টাটা পাৱাৰ ইভি চার্জিং চলিউচন লিমিটেডৰ বিষয়ৱৰীয়াৰ লগতে প্ৰাগ নিউজৰ মুখ্য পৰিচালন সঞ্চালক ড” সঞ্জীৱ নাৰায়নে অংশ লয়। আনহাতে পথ সুৰক্ষা সহযোগী এপ মুকলি অনুষ্ঠানত ৰাজ্যৰ বিশেষ আৰক্ষী সঞ্চালক প্রধান হৰমীত সিঙেও বক্তব্য প্ৰদান কৰে।
