Beef-eating majority state Nagaland denies permission to hold ‘Gau Mahasabha’:
খ্ৰীষ্টান ধৰ্মাৱলম্বী অধ্যুষিত ৰাজ্য নগালেণ্ডত গো মহাসভা আয়োজন কৰাক লৈ একপ্ৰকাৰ উত্তাল হৈছে ৰাজ্যখন। অহা ২৮ ছেপ্টেম্বৰত ৰাজধানী কোহিমাত অনুষ্ঠিত হ’ব লগা এই গো মহোৎসৱ জ্যোতিৰ মঠৰ শংকৰাচাৰ্য স্বামীঅভিমুক্তেশ্বৱাৰানন্দই সভাপতিত্ব কৰাৰ কথা আছে।
ইপিনে, আগন্তুক এই গো মহোৎসৱক লৈ ৰাজ্যখনৰ বিভিন্ন সংগঠন সৰৱ হৈ উঠে। ৰাজ্যখনৰ অধিকাংশ লোকেই গো মাংসহাৰী হোৱাৰ পৰিপ্ৰেক্ষিতত মহোৎসৱৰ বিৰোধিতাও প্ৰৱল হৈ উঠিছে। এনে পৰিস্থিতিত ৰাজ্য চৰকাৰেও এই মহোৎসৱ আয়োজনৰ বিৰোধিতা কৰিছে।
লক্ষ্যণীয় যে নগালেণ্ডৰ শাসকীয় এনডিপিপিৰ অন্যতম অংশীদাৰ হৈছে বিজেপি। বিজেপিৰ ৰাজ্যিক সমিতিয়েও এই মহোৎসৱৰ বিৰোধিতা কৰিছে। এনে পৰিস্থিতিত মুখ্যমন্ত্রী নেইফিঅ’ ৰিঅ’ৰ অধ্যক্ষতাত অনুষ্ঠিত কেবিনেট বৈঠকে এই গো মহোৎসৱলৈ অনুমতি নিদিয়াৰ সিদ্ধান্ত গ্রহণ কৰিছে। সংবাদ মাধ্যমৰ আগত এই কথা সদৰী কৰি ৰাজ্য চৰকাৰৰ মুখপাত্র তথা মন্ত্রী চি এল জ’নে কয় যে কেবিনেটে ৰাজ্যখনৰ অধিকাংশ লোক গো মাংসহাৰী হোৱাৰ পৰিপ্ৰেক্ষিতত এই গো মহোৎসৱৰ বিৰোধিতা কৰিছে।
ভাৰতীয় সংবিধানৰ ৩৭১ (এ) অনুচ্ছেদে নগাসকলক নিজৰ পৰম্পৰা তথা ধর্মীয় আৰু সামাজিক ৰীতি-নীতি বৰ্তাই ৰখাৰ অধিকাৰ দিয়াৰ কথাও মুখ্যমন্ত্রী ৰিঅ’ৰ অধ্যক্ষতাত অনুষ্ঠিত কেবিনেট বৈঠকত আলোচিত হয় বুলি মন্ত্রীজনে সদৰী কৰে। কাজেই কোহিমাত অনুষ্ঠিতব্য আগন্তুক গো মহোৎসৱক লৈ অনিশ্চয়তাৰ সৃষ্টি হৈছে। উক্ত কেবিনেট বৈঠকত এই কথাও আলোচিত হয় যে ৰাজ্যখনৰ অধিকাংশ সামাজিক আৰু নাগৰিক সংগঠনে গো মহোৎসৱৰ বিৰোধিতা কৰিছে।
আনকি ৰাজ্যিক বিজেপিয়েও এই গো মহোৎসৱ আয়োজনক মানি লোৱা নাই। এই সম্পর্কত মন্ত্রী জ’নে লগতে কয়, ‘ৰাজহুৱা শৃংখলা বৰ্তাই ৰখাৰ স্বাৰ্থত কেবিনেটে এই অনুষ্ঠান আয়োজনৰ অনুমতি নিদিয়াৰ সিদ্ধান্ত গ্রহণ কৰে।’
আনহাতে এই সম্পৰ্কত ৰাজ্যিক বিজেপিৰ সভাপতি বেঞ্জামিন য়েপথম্পিয়ে কয়, ‘এই মহোৎসৱক লৈ বিজেপিয়ে কৰিব লগা একো নাই। নগালেণ্ডৰ সামাজিক-ধর্মীয় আৰু সাংস্কৃতিক গাঁথনিৰ প্রেক্ষাপটত বিষয়টো বিবেচনা কৰা উচিত।’ বিজেপিৰ উপৰি এই মহোৎসৱৰ বিৰুদ্ধে সৰৱ হোৱা ৰাজনৈতিক দলসমূহৰ অন্যতম হৈছে বিজেপিৰ সহযোগী তথা শাসকীয় এনডিপিপি (নেছনেলিস্ট ডেম’ক্রেটিক প্রগ্রেছিভ পার্টি)ৰ অংশীদাৰ নগা পিপ’লছ পার্টি (এনপিপি)।
আনহাতে, কোহিমাৰ গো মহোৎসৱৰ বিৰোধিতা কৰা সামাজিক সংগঠনসমূহৰ মাজত আছে নগা মাদাৰ্ছ এছ’চিয়েছন আৰু নগা স্টুডেণ্টছ ফেডাৰেছনো। বিষয়টো সম্পর্কত নগা মাদাৰ্ছ এছ’চিয়েছনৰ অধ্যক্ষা ভিলানো ৱাইহ’মে কয়, ‘ইতিহাসে ঢুকি নোপোৱা সময়ৰ পৰা গো মাংসই নগা খাদ্য তালিকাত স্থান পাই আহিছে।’ গতিকে এই গো মহোৎসৱ আয়োজনৰ সিদ্ধান্ত গ্রহণযোগ্য নহয় বুলি নগা মাদাৰ্ছ এছ’চিয়েছনৰ মুৰব্বী গৰাকীয়ে ইংগিত দিয়ে।
