biplab sarma Committee Report Pdf
Biplab Sharma Commission report released:
অৱশেষত ৰাজহুৱা হ’ল অসম চুক্তিৰ ছয় নম্বৰ দফা কাৰ্যকৰী কৰাৰ সন্দৰ্ভত ভাৰত চৰকাৰে গঠন কৰা অৱসৰপ্ৰাপ্ত ন্যায়াধীশ বিপ্লব কুমাৰ শৰ্মা নেতৃত্বাধীন আয়োগৰ প্ৰতিবেদন। এই আয়োগ গঠনৰ সময়ৰ পৰাই ৰাজ্যজুৰি ইয়াকে লৈ চৰ্চা আৰু উৎসুকতা আৰম্ভ হয়। ২০২২ত অৱসৰপ্ৰাপ্ত ন্যায়াধীশ শর্মাই ৰাজ্য চৰকাৰক প্রতিবেদন দাখিল কৰাৰ পাছত উৎসুকতা অধিক বৃদ্ধি পায় যদিও দুবছৰ পাছতহে শুক্ৰবাৰে এই প্রতিবেদন অসম চৰকাৰে ৱেবছাইটযোগে প্রকাশ কৰে।
অসমীয়া মানুহৰ অধিকাৰ তথা স্বাৰ্থ সুৰক্ষিত কৰাৰ উদ্দেশ্যে সংসদে লোকসভাত অসমৰ বাবে আৱণ্টন কৰিবলগীয়া আসন সংৰক্ষণ কৰিব লাগে, যিসমূহ পূৰণ কৰিব পাৰিব কেৱল অসমীয়া মানুহে। লগতে সমষ্টিসমূহৰ সীমা পুনৰ নিৰ্ধাৰণ কৰিব লাগে, য’ৰ পৰা অসমৰ লোকসভা সমষ্টিসমূহৰ নিৰ্বাচনত কেৱল অসমীয়া প্রার্থীয়েহে প্রতিদ্বন্দ্বিতা কৰিব পাৰিব। একেদৰে সংসদে অসম বিধানসভাত আসন সংৰক্ষণৰ ব্যৱস্থা কৰিব লাগে যিসমূহ আসন প্ৰতিদ্বন্দ্বিতা কৰি পূৰণ কৰিব কেৱল অসমীয়া মানুহে। বিধানসভা সমষ্টিসমূহৰ পুনৰ সীমা নির্ধাৰণ কৰিব লাগে, য’ৰ পৰা অসমৰ বিধানসভা নির্বাচনত কেৱল অসমীয়া মানুহেহে প্রতিদ্বন্দ্বিতা কৰিব পাৰিব।
একেদৰে অসমৰ গাঁও পঞ্চায়ত, পৌৰসভা আৰু অন্যান্য স্থানীয় নিকায়-নিগমত সংৰক্ষিত আসনৰ সংখ্যা নির্ণয় কৰিব লাগে অসম বিধানসভাই, যিসমূহ অসমীয়াইহে পূৰণ কৰিব পাৰিব। কেৱল অসমীয়া প্রার্থীয়ে এনে গাঁও পঞ্চায়ত, পৌৰসভা আৰু স্থানীয় নিকায়-নিগমৰ নিৰ্বাচনত প্রতিদ্বন্দ্বিতা কৰিব পাৰিব। অৱসৰপ্ৰাপ্ত ন্যায়াধীশ শৰ্মাৰ নেতৃত্বৰ আয়োগে দাখিল কৰা প্রতিবেদনে সাংবিধানিক ৰক্ষা কবচৰ জৰিয়তে অসমীয়া মানুহৰ স্বাৰ্থ ৰক্ষাৰ উদ্দেশ্যে এইদৰে একাধিক পৰামর্শ আগবঢ়ায়। আজি ৰাজ্য চৰকাৰৰ অসম চুক্তি ৰূপায়ণ বিভাগৰ ৱেবছাইটত ৰাজহুৱা কৰা প্ৰতিবেদনত সাংবিধানিক ৰক্ষা কবচৰ বিষয়টোত লগতে উল্লেখ কৰে যে ভাৰতৰ সংবিধানৰ ১৬ অনুচ্ছেদ (৩)ৰ অধীনত সংসদে এখন আইন প্রস্তুত কৰিব লাগে, য’ত ৰাজ্য চৰকাৰ অথবা অসমৰ যিকোনো স্থানীয় অথবা অন্যান্য প্ৰাধিকৰণৰ ৮০ শতাংশ খালী পদ কেৱল অসমীয়া মানুহৰ দ্বাৰা পূৰণৰ ব্যৱস্থা থাকিব।
একেদৰে ৰাজ্য বিধানসভাই আইন গৃহীত কৰিব লাগে, য’ত অসম চৰকাৰৰ অধীনত অথবা অসমৰ যিকোনো স্থানীয় আৰু অন্যান্য প্ৰাধিকৰণত সকলো ধৰণৰ নিযুক্তিৰ বাবে অসমীয়া অথবা অন্যান্য খিলঞ্জীয়া ভাষাৰ জ্ঞান বাধ্যতামূলক হয়। একে সময়তে প্রতিবেদনত কোৱা হৈছে যে অসমত চৰকাৰী কাম-কাজৰ বাবে অসমীয়া ভাষা ব্যৱহাৰ হ’ব লাগে। তদুপৰি বিটিএডি আৰু কার্বি আংলং, ডিমা হাছাও, কাছাৰ, কৰিমগঞ্জ আৰু হাইলাকান্দি জিলাত ২০২২ৰ সংবিধান সংশোধনীৰ পূৰ্বে ব্যৱহাৰ হৈ থকা ভাষা জিলা পর্যায়কে ধৰি প্ৰশাসনিক আৰু অন্যান্য চৰকাৰী কাম-কাজত ব্যৱহাৰ কৰিব পাৰিব।
প্রতিবেদনত অসম বিধান পৰিষদ গঠনৰ ক্ষেত্ৰত কোৱা হৈছে যে ভাৰতৰ সংবিধানৰ অনুচ্ছেদ ১৬৮ (১) (ক)ত অসম শব্দটো অন্ধ্রপ্রদেশ আৰু বিহাৰৰ মাজত সংযোজন কৰিব লাগিব। অসম বিধান পৰিষদৰ সদস্যৰ সংখ্যা ৰাজ্যৰ বিধানসভাৰ মুঠ সদস্যৰ কোনো কাৰণতে অর্ধেকতকৈ কম হ’ব নালাগে। প্রতিবেদনত এই অসম বিধান পৰিষদৰ গাঁথনি কেনেদৰে হ’ব, সেই বিষয়েও উল্লেখ কৰা হৈছে।
আনহাতে, সংবিধানৰ অনুচ্ছেদ ৩৩০ (১) (গ)ত নিৰ্ধাৰিত আসন সংৰক্ষণৰ অতিৰিক্ত আসন অসমীয়া মানুহৰ বাবে এই অনুচ্ছেদত সংজ্ঞায়িত কৰা অনুসৰি অসমৰ বাবে আবণ্টিত লোকসভা আসনৰ পৰা অসমীয়া মানুহৰ বাবে আসন সংৰক্ষণ কৰিব লাগে। কেন্দ্ৰীয় চৰকাৰ আৰু কেন্দ্ৰীয় চৰকাৰৰ অধীনস্থ অনুষ্ঠান-প্রতিষ্ঠানত নিযুক্তিৰ ক্ষেত্ৰত সংসদে এখন আইন প্ৰস্তুত কৰিব লাগে, যাৰ জৰিয়তে অসমত তৃতীয় আৰু চতুৰ্থ শ্ৰেণীৰ চাকৰিৰ খালী পদৰ ৮০ শতাংশই অসমীয়া মানুহৰ বাবে সংৰক্ষিত হ’ব লাগে। একেদৰে অসম চৰকাৰৰ অধীনৰ, অসম চৰকাৰৰ অধীনস্থ অনুষ্ঠান- প্ৰতিষ্ঠানত খালী পদৰ ৮০ শতাংশ আৰু ব্যক্তিগত খণ্ড তথা ৰাজহুৱা-ব্যক্তিগত খণ্ডৰ অংশীদাৰিত্বৰ অনুষ্ঠান-প্ৰতিষ্ঠানত খালী পদৰ ৭০ শতাংশ অসমীয়া মানুহৰ বাবে সংৰক্ষিত হ’ব লাগে।
বিধায়িনী ৰক্ষা কবচৰ প্ৰসংগত প্রতিবেদনত কোৱা হৈছে যে ১৯৫০ৰ জনপ্রতিনিধি আইনৰ ধাৰা আঠ (ক) আদি সংশোধনী কৰিব লাগিব। এইমর্মে উপ-দফা দুই (গ)ৰ পাছত সংবিধানৰ ৩৭১ (ক) অনুচ্ছেদত সংজ্ঞায়িত কৰাৰ দৰে ৮০ শতাংশ আসন অসমীয়া মানুহৰ বাবে সংৰক্ষিত হ’ব লাগে। এই ক্ষেত্রত পূৰ্বৰ পৰা থকা অনুসূচিত জাতি আৰু অনুসূচিত জনজাতিৰ আসনৰ সংখ্যাৰ সংৰক্ষণৰ অন্তৰ্ভুক্ত হ’ব। অসমীয়া মানুহৰ বাবে আসন সংৰক্ষণৰ ক্ষেত্ৰত অসমীয়া মানুহৰ সংজ্ঞাৰ আওতাধীন অসমৰ যিকোনো বর্ণ-জাতি-জনজাতি অথবা সম্প্ৰদায়ৰ পুৰুষ অথবা মহিলা সদস্য হ’ব আৰু অসমৰ যিকোনো বিধানসভা সমষ্টিৰ ভোটাৰ হ’ব। প্রতিবেদনত অসম পঞ্চায়ত আইন-১৯৯৪, অসম পৌৰ আইন-১৯৫৬ আদিৰ সংশোধনীৰো পৰামর্শ আগবঢ়োৱা হৈছে।
ইপিনে, আন্তঃৰাজ্যিক অনুজ্ঞাপত্ৰ ব্যৱস্থা প্ৰৱৰ্তনৰ প্ৰস্তাৱো প্ৰদান কৰা হৈছে প্রতিবেদনত। সমিতিয়ে অসম প্রাচীন স্মৃতিসৌধ আৰু ৰেকৰ্ড আইন-১৯৫৯ৰ বিধায়িনী সংশোধনীৰ ক্ষেত্ৰত কয় যে এই আইনত সংৰক্ষিত অঞ্চলৰ অতি প্রাচীন ভরন বা সম্পদ সম্পর্কীয় এটা অধ্যায় সংযোজন কৰিব লাগে। এই ক্ষেত্রত আয়োগে বিশদ ব্যাখ্যা আগবঢ়াইছে। তদুপৰি এই আইনৰ আওতাত সাংস্কৃতিক ঐতিহ্য তত্ত্বাৱধান পৰিষদ এখন গঠন কৰিব লাগে বুলিও পৰামৰ্শ আগবঢ়াই আয়োগে। এই ক্ষেত্ৰত পৰিষদৰ কাঠামো কেনে ধৰণৰ হ’ব লাগে, সেই বিষয়ে বিস্তৃত বিৱৰণ উল্লেখ কৰা হৈছে প্ৰতিবেদনত।
ইপিনে, সাংস্কৃতিক ঐতিহ্য তত্ত্বাৱধান আৰু উন্নয়ন পুঁজিৰ বিষয়েও বিশদভারে পৰামর্শ দিয়ে আয়োগে। উল্লেখ্য যে গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাৰ অধ্যক্ষতাত কেন্দ্ৰীয় চৰকাৰৰ গৃহ পৰিক্ৰমা মন্ত্রণালয়ে অসম চুক্তিৰ ছয় নম্বৰ দফা ৰূপায়ণ সন্দৰ্ভত পৰামৰ্শ আগবঢ়াবলৈ গঠন কৰি দিছিল আয়োগ। মুঠ ১৩জনীয়া এই উচ্চ পৰ্যায়ৰ আয়োগে বিভিন্ন পক্ষৰ স’তে আলোচনা সম্পন্ন কৰাৰ অন্তত প্রতিবেদনযোগে পৰামৰ্শ আগবঢ়াইছে।
উল্লেখ্য যে বিপ্লৱ শৰ্মাৰ প্রতিবেদনে অসমীয়া মানুহৰ সংজ্ঞাও আগবঢ়াইছে। সেইমর্মে ১৯৫১ৰ পহিলা জানুৱাৰী অথবা ইয়াৰ পূৰ্বৰে পৰা অসমত বাস কৰাসকল অসমীয়া সম্প্রদায়, ১৯৫১ৰ পহিলা জানুৱাৰী অথবা ইয়াৰ পূৰ্বৰে পৰা অসমত বসবাস কৰা খিলঞ্জীয়া জনজাতীয় সম্প্রদায়, একেটা ভিত্তি বর্ষতে অসমত বসবাস কৰা যিকোনো খিলঞ্জীয়া সম্প্রদায়ক বা একেটা ভিত্তি বৰ্ষৰ ভিতৰতে অসমত বাস কৰা ভাৰতীয় নাগৰিক আৰু তেওঁলোকৰ উত্তৰসূৰী হৈছে ‘অসমীয়া মানুহ’। এইদৰে অসমীয়া মানুহৰ সংজ্ঞা নিরূপণ কৰি দিয়ে আয়োগে।
উল্লেখ কৰা হৈছে যে খিলঞ্জীয়া জনজাতি সম্প্রদায় আৰু অসমৰ অন্যান্য খিলঞ্জীয়া সম্প্রদায়ৰ অৰ্থ হৈছে সকলো জাতি-জনজাতি, ভাষিক সম্প্রদায়, অনুসূচিত জনজাতি, অনুসূচিত জাতি, পিছপৰা আৰু অন্যান্য পিছপৰা সম্প্রদায়।
