Shocking murder in Gitanagar:
ইটোৰ পাছত সিটোকৈ সংঘটিত হৈছে অপৰাধজনিত ঘটনা। ক্ৰমাৎ গুৱাহাটী পৰ্যবেশিত হৈছে অপৰাধীৰ মহানগৰীলৈ ৷ কৰবাত যদি চিলনী চোৰ,আন কৰবাত আকৌ চোৰৰ চাফাই অভিযান ৷ তাৰ সমান্তৰালভাৱে সংঘটিত হৈছে লোমহৰ্ষক হত্যাকাণ্ড ৷ অপৰাধীৰ টিঘিলঘিলনীত সন্ত্ৰস্ত হৈছে মহানাগৰিক ৷ নিৰাপত্তাহীনতাত মহানগৰবাসী ৷ স্মাৰ্ট আৰক্ষীৰ ওপৰত আস্থা হেৰুৱাইছে ৰাইজে। এনেবোৰ ঘটনা ক্ৰমৰ মাজতে যোৱা নিশা পুনৰ সংঘটিত হ’ল আন এক চাঞ্চল্যকৰ হত্যাকাণ্ড |
পুনৰ এক নৃশংস হত্যাকাণ্ডই জোকাৰি গ’ল মহানগৰ ৷ গীতানগৰ আৰক্ষী থানাৰ অন্তৰ্গত ভাস্কৰ নগৰত যোৱা নিশা সংঘটিত হয় এক নৃশংস হত্যাকাণ্ডৰ ঘটনা। একেটা পৰিয়ালৰ দুগৰাকী বোৱাৰীৰ মাজত সূত্রপাত হোৱা সংঘাতে তীব্র ৰূপ ধাৰণ কৰাৰ পাছত এগৰাকীয়ে আন গৰাকীক কেঁচিৰে আক্ৰমণ কৰি হত্যা কৰে।
ঘটনাত জড়িত থকাৰ অভিযোগত হাচিনা বেগম নামৰ মহিলা গৰাকীক গ্ৰেপ্তাৰ কৰা হৈছে বুলি গীতানগৰ আৰক্ষীয়ে সদৰী কৰিছে। আনহাতে, আক্রমণত মৃত্যুক আঁকোৱালি লোৱা নাজমা খাতুন নামৰ মহিলাগৰাকীৰ মৃতদেহ আৰক্ষীয়ে উদ্ধাৰ কৰি মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰে।
উল্লেখ্য যে ভুক্তভোগী আৰু অভিযুক্ত মহিলা দুগৰাকী একেটা পৰিয়ালৰে বোৱাৰী। প্রাথমিক তদন্তত আৰক্ষীয়ে লাভ কৰা তথ্য অনুসৰি, ভাস্কৰ নগৰৰ দুই নম্বৰ উপ-পথৰ এটা গৃহত মাতৃৰ স’তে দুই পুত্ৰ-বোৱাৰীয়ে বাস কৰিছিল। ইয়াৰে মৃত মহিলাগৰাকী পৰিয়ালটোৰ জ্যেষ্ঠ পুত্ৰ আকলি আলীৰ পত্নী।
কর্মসূত্রে আলী বহিঃৰাজ্যত থাকে। আনহাতে, অভিযুক্ত ধৃত মহিলাগৰাকী কনিষ্ঠ পুত্ৰৰ পত্নী। এই দুই বোৱাৰীৰ মাজত প্ৰায়ে কাজিয়াৰ সূত্রপাত হয় বুলি স্থানীয় লোকে আৰক্ষীৰ আগত সদৰী কৰিছে। আজিও কোনো কথাক লৈ দুয়োৰে মাজত কাজিয়াৰ সূত্রপাত হৈছিল। ইয়াৰ পাছতে নিশা প্রায় ৭-৪০ বজাত ঘৰৰ সমীপৰ পথত নাজমা পৰি থকা প্ৰত্যক্ষ কৰে স্থানীয় লোকে। তেজেৰে লুতুৰি-পুতুৰি হৈ পৰি থকা মৃতদেহটো দেখাৰ লগে লগে স্থানীয় লোকে আৰক্ষীক খবৰ দিয়ে।
ঘটনাস্থলীত ততাতৈয়াকৈ শীর্ষ বিষয়াসহ আৰক্ষী, চিআইডি আৰু ফৰেনচিকৰ দল উপস্থিত হৈ মৃতদেহটো উদ্ধাৰ কৰাৰ লগতে তদন্ত আৰম্ভ কৰে। ইয়াৰ পাছতে আৰক্ষীয়ে হাচিনা বেগমক সোধপোছ কৰাৰ পাছতে এই হত্যাকাণ্ডত জড়িত থকাৰ অভিযোগত গ্ৰেপ্তাৰ কৰে।
উল্লেখ্য যে ধৃত হাচিনাই এখন কেঁচিৰে হানি-খুঁচি নাজমাক হত্যা কৰা বুলি প্রাথমিক তদন্তৰ ভিত্তিত আৰক্ষীয়ে সন্দেহ কৰিছে।
