There are serious allegations of violations of election rules in Asom Sahitya Sabha:
সভাপতি আৰু প্ৰধান সম্পাদক নির্বাচনক লৈ অসম সাহিত্য সভাত অব্যাহত থকা তীব্র বিতর্কই এইবাৰ যেন নতুন ৰূপ ধাৰণ কৰিছে। বিশেষকৈ প্রধান সম্পাদক নির্বাচনক লৈ এইবাৰ সভাৰ মজিয়াতে মুকলি বিদ্রোহ আৰম্ভ হৈছে। তাৰেই আনুষ্ঠানিক ৰূপ দিয়ে অসম সাহিত্য সভাৰ কেন্দ্ৰীয় সমিতিৰ কৰ্ণধাৰ সমিতিৰ প্ৰাক্তন সদস্য তথা বৰ্তমানৰ তথ্য-চিত্র কোষৰ আহ্বায়ক নুৰুল চুলতানে।
জাতীয় অনুষ্ঠানটোৰ কেন্দ্ৰীয় সমিতিৰ জ্যেষ্ঠ বিষয়ববীয়াজনে অসম সাহিত্য সভা বৰ্তমান কিদৰে চলিছে, আগন্তুক দিনত কি হ’বলৈ গৈ আছে আৰু ইয়াৰ অন্তৰালত কোন কোন জড়িত আছে, তাকে লৈ সৰৱ হয়। বর্তমান অব্যাহত থকা নির্বাচনী প্ৰক্ৰিয়াৰ অন্তৰালত গভীৰ ষড়যন্ত্র থকা বুলি অভিযোগ কৰি চুলতানে সমালোচনাৰ লক্ষ্য কৰি লয় প্রধান সম্পাদক ড: উপেন্দ্রজিৎ শর্মাক।
আনহাতে, সভাত বর্তমান অচলাৱস্থা বিৰাজ কৰা বুলি মন্তব্য কৰি চুলতানে ইয়াৰ কাৰণ সভাপতি, উপ- সভাপতি আৰু প্রধান সম্পাদকৰ মাজত কোনো সমন্বয় নথকা বুলি কয়। প্রধান সম্পাদক বাছনিক লৈ বর্তমান যি নির্বাচনী প্ৰক্ৰিয়া আৰম্ভ হৈছে তাৰ অন্তৰালত বহু ন্যস্তস্বার্থ জড়িত বিষয় থকা বুলিও উল্লেখ কৰি চুলতানে ভোটদান কৰিবলগীয়া শাখা সভা সমিতিসমূহকো এই ক্ষেত্ৰত নিজৰ দায়বদ্ধতা প্রকাশ কৰিবলৈ আহ্বান জনাইছে। সমান্তৰালভাৱে ৰাইজৰ মনৰ কথাক গুৰুত্ব দি ড° উপেন্দ্রজিৎ শর্মাক নির্বাচনী সকলো কামৰ পৰা আঁতৰি থাকিবলৈ আহ্বান জনায়। নির্বাচনতো স্বচ্ছ আৰু নিৰপেক্ষ হোৱাৰ স্বাৰ্থতে ড° শর্মাক নির্বাচনী কামৰ পৰা আঁতৰি থাকিবলৈ তেওঁ পৰামৰ্শ দিয়ে।
প্রধান সম্পাদক ড° শৰ্মাক সম্বোধন কৰি লিখা এখন পত্রত চুলতানে উল্লেখ কৰে যে প্ৰধান সম্পাদকৰ দৰে গুৰু গম্ভীৰ পদবী লাভ কৰাৰ পাছৰে পৰা ড° শৰ্মাৰ ভিতৰৰ কুটিলতাপূর্ণ মানুহজন ওলাই পৰে। তেনে কুটিল চক্ৰান্তৰ বলি উপ-সভাপতি ডাঃ গিৰিশ সন্দিকৈ হোৱা বুলিও পত্ৰখনত উল্লেখ কৰিছে। সভাপতি হোৱাৰ লক্ষ্য আগত ৰাখি কাম কৰি থকা বুলি ড° শৰ্মাৰ বিৰুদ্ধে অভিযোগ কৰা চুলতানে পত্ৰখনত লিখে এনেদৰে, ‘ডাঃ সন্দিকৈক নিঃশেষ কৰাৰ পাছত এইবাৰ আপুনি কাক বধৰ পৰিকল্পনা ৰচিছে, যাৰ বাবে সভাৰ কাম-কাজ কৰিবলৈ ছুটী ল’ব নোৱৰা মানুহজনে জিলাই জিলাই এতিয়া অবৈধভাবে সাংগো-পাংগ লগত লৈ বেলট বিতৰণ কৰি ফুৰিছে।
এই ছেগতে নির্বাচনী সমিতিৰ পৰা জানিব খুজিছো আপোনালোকে সভাত চাহ-তামোল খাই (মাননি লৈছে নে নাজানো; কিন্তু দিয়াৰ পৰম্পৰা আছে) ড° উপেন্দ্ৰজিৎ শৰ্মাৰ কথাত চকু মুদি আছে। ড° শর্মা, এই নির্বাচনটোত আপুনি যিমান তৎপৰতা দেখুৱাইছে, যোৱা ২২ টা মাহৰ এমাহো যদি সক্রিয়তা দেখুৱালেহেঁতেন, তেন্তে আমি আজি লিখিব লগা নহ’লহেঁতেন। সভাপতি মহোদয়ৰো কৌশলী স্থিতি ধৰা পৰি গৈছে। আপোনাৰ সন্মতি বা স্বাক্ষৰ নোহোৱাকৈ প্রধান সম্পাদকে কেনেকৈ – বেলট নিব।’
প্রসংগক্রমে চুলতানে কয় যে ড° শর্মাই প্রধান সম্পাদক হৈ থকাৰ পাছত উপ-সভাপতি হ’ব আৰু তাৰ পাছত সভাপতি হ’ব। এয়া তেওঁৰ পৰিকল্পনা। সভাপতি আৰু প্রধান সম্পাদকৰ মাজত অৰিয়া-অৰি চলাৰ ফলত অসম সাহিত্য সভাৰ ক্ষতি হৈছে বুলিও মন্তব্য কৰা চুলতানে পত্ৰখনত আন এক বিষয়ো উল্লেখ কৰে। সেই অনুসৰি উল্লেখ কৰা হৈছে এনেদৰে, ‘ভাষা গৌৰৱ আঁচনিৰ কোটি টকা জমা দিয়াৰ পাছতো অৰিয়া-অৰি কৰি দুবছৰত এখনো গ্রন্থ প্ৰকাশ কৰিব নোৱাৰিলে। সভাপতিৰ গ্ৰন্থ প্ৰকাশৰ দক্ষতা আছে, অথচ তেওঁৰ পৰামৰ্শ গ্রহণ অথবা শুনাৰ ইচ্ছা নকৰিলে।
৯০ লাখ টকাৰ গ্ৰন্থ প্ৰকাশৰ লেখক/সম্পাদক, কিতাপৰ নামৰ তালিকাখন অনুগ্ৰহ কৰি এবাৰ ৰাজহুৱা কৰিবচোন।’ ড° শৰ্মাই শাখা সাহিত্য সভাৰ ক্ষেত্ৰতো জালিয়াতি সংঘটিত কৰাৰ এক ইংগিত পত্ৰখনত দিয়া হৈছে। এই ক্ষেত্রত লিখা হৈছে এনেদৰে, ‘ধুবুৰী আপোনাৰ চাকৰি কৰা ঠাই, মানে জিলা। ধুবুৰীত ৬৫ টা ভোট থকা মানে স্বীকৃত শাখা আছে। আপোনাৰ সাহস আছে যদি সেই সভাবোৰৰ কাৰ্যনিৰ্বাহকখনৰ ভিডিঅ’ ৰেকর্ডিং কৰাওক, যিখন সভাত আগন্তুক সভাপতি, উপ-সভাপতি আৰু প্ৰধান সম্পাদকৰ বাবে বেলট পেপাৰত ভোট দিব। যদি নোৱাৰে পইচা মই দিম।
আপুনিও মোৰ লগত ওলাব, সন্মানিত কেইটামান শাখাৰ বাদে বাকী ধুবুৰীৰ শাখাবোৰৰ ওপৰত এখন তথ্যচিত্র বনাম।’ সময়ে কাকো ক্ষমা নকৰে বুলি সকীয়নি দি চুলতানে পত্রখনত প্রধান সম্পাদক ড° শৰ্মাক প্ৰত্যাহ্বানো জনায় এনেদৰে, ‘এনেদৰে লিখাৰ বাবে মোলৈ এখন কৈফিয়ৎ তলবৰ পত্ৰ আপুনি দিব। পত্র পোৱাৰ পিছদিনাই মুখত ক’লা কাপোৰ, ক’লা চোলা পিন্ধি সাহিত্য সভাৰ কাৰ্যালয়ত, নির্বাচনী সমিতিৰ বিষয়ববীয়াৰ ঘৰৰ পদূলিত আৰু ধুবুৰীৰ বি এন কলেজৰ গেটৰ মুখত ওলামগৈ দেই।’