Fish:
অসমীয়াই উলহ-মালহেৰে উদ্যাপন কৰিলে ভোগালী বিহু। এই সময়ত চহা অসমীয়াৰ ভঁৰাল সোণগুটিৰে ভৰি পৰে। ভোগৰ অন্যান্য সামগ্রীও উভৈনদী হৈ পৰে। এনেদৰেই সূচনা হৈছিল কৃষিভিত্তিক উৎসৱ ভোগালী বিহুৰ। সেই অসমীয়াই এতিয়া উদ্যাপন কৰা ভোগালী বিহুৰ নামত বহিঃৰাজ্যলৈ হোৰাহোৰে ওলাই গৈছে কোটি কোটি টকা।
সকলো থাকিও একো নথকাৰ দৰে হৈছে। আত্মনিৰ্ভৰশীল হোৱাৰ দিশত বহু পিছপৰি থকা ৰাজ্যই সেয়েহে ভোগালীৰ ভোগ কৰিবলৈও এতিয়া আন ৰাজ্যৰ ওপৰত নিৰ্ভৰ কৰিবলগীয়া হৈছে। চৰকাৰৰ আত্মনিৰ্ভৰ অসম গঢ়াৰ ধ্বনিও এনেদৰে ধোঁৱাচাঙত উঠিছে।
এইবাৰৰ ভোগালী বিহুত অসমে ভোগৰ বিভিন্ন খাদ্য সম্ভাৰ আমদানিৰ বিনিময়ত আদায় দিছে কমেও দুশ কোটি টকা। ইয়াৰে অকল মাছৰ নামতে আধা ধন ব্যয় হয়। ভোগালী বিহুত মাছৰ চাহিদা সর্বাধিক হয়। অসমৰ চাহিদা পূৰণ কৰিবলৈ দেশৰ কে’বাখনো ৰাজ্যৰ পৰা দুহেজাৰ মেট্রিক টনৰো অধিক মাছ আমদানি কৰা হয়। অথচ ৰাজ্যত মাছ উৎপাদনৰ প্ৰচুৰ
সুবিধা আছে। উদাহৰণ স্বৰূপে চৰকাৰৰ তথ্য অনুসৰি অসমত বিল আছে ২,০৭২ খন। ইয়াৰে ১৮৬ খন বিল পঞ্জীয়নভুক্ত। এইসমূহ মীন উন্নয়ন নিগম আৰু ৰাজহ বিভাগৰ অধীনত পঞ্জীয়ন হৈ আহিছে। ইয়াৰ বিপৰীতে ডেৰ হেজাৰৰো অধিক
বিলৰ পঞ্জীয়ন নাই। সেইবোৰত কিদৰে আৰু কিমান পৰিমাণৰ মাছ উৎপাদন চলি আহিছে তাৰ আনুষ্ঠানিক তথ্য নাই।
ঘাটি চাহিদাৰ বাবেই ভোগালী বিহু উদ্যাপন কৰিবলৈ অসমীয়াই অনুপ্রদেশ, বিহাৰ আৰু পশ্চিমবংগৰ মাছ উৎপাদক তথা ব্যৱসায়ীৰ ওপৰত নিৰ্ভৰ কৰিবলৈ বাধ্য হয়। ফলস্বৰূপে অসমৰ পৰা বহিঃৰাজ্যলৈ এশ কোটিৰো অধিক টকা ওলাই যায়।
আনহাতে, অসমলৈ মূলতঃ অন্ধ্রপ্রদেশৰ পৰা কণীৰ আমদানি হয়। তদুপৰি কৰ্ণাটকৰ পৰাও কণী ৰাজ্যলৈ আহে। ভোগালী বিহুত চাহিদা পূৰাবলৈ বৃহৎ সংখ্যক ট্রাক কণী অসমলৈ আমদানি কৰা হয়। ইয়াৰ ফলত অসমৰ পৰা কমেও ১২ কোটি টকা আন ৰাজ্যলৈ ওলাই যায়।
ভোগালী বিহুত বিবিধ প্ৰকাৰৰ মাংসৰ চাহিদাও বৃদ্ধি পায়। অসমত চাহিদাৰ বিপৰীতে ছাগলী, হাঁহ, কুকুৰা আৰু গাহৰিৰ মাংস বহু কম পৰিমাণত উৎপাদন হয়। অসমলৈ হাৰিয়ানা, পশ্চিমবংগ আদি ৰাজ্যৰ পৰা নিয়মীয়াভাৱে হাঁহ, কুকুৰা আৰু গাহৰি আমদানি হয়। বৈধ তথা অবৈধভাৱে এই সামগ্ৰীবোৰৰ যোগান অসমলৈ ঘটি আহিছে।
অসমত চাহিদাৰ বিপৰীতে ছাগলীৰ মাংসৰ যোগান ৩০ শতাংশ, হাঁহ-কুকুৰাৰ ৪০ শতাংশ আৰু গাহৰিৰ মাংসৰ যোগান ৪০ শতাংশ কম। পশুপালন বিভাগৰ তথ্য অনুসৰি ভোগালী বিহুৰ নামত ৰাজ্যলৈ আমদানি হোৱা ছাগলী, হাঁহ, কুকুৰা আৰু গাহৰিৰ নামত এক বৃহৎ পৰিমাণৰ ধন বহিঃৰাজ্যলৈ ওলাই যায়। এই পৰিমাণ সামগ্রিকভাৱে বহুকোটি টকা হোৱাটো নিশ্চিত বুলি সূত্রটোৱে উল্লেখ কৰে।
এনেদৰে ভোগৰ উপাচাৰ তথা মাছ-মাংস আৰু কণী আদিৰ বাবদ ভোগালী বিহুৰ সময়ত কমেও দুশ কোটি টকা ৰাজ্যৰ পৰা বাহিৰলৈ ওলাই যোৱাটো একপ্ৰকাৰ নিশ্চিত হৈছে। একাংশৰ মতে, যুৱ শক্তি উৎপাদনমুখী কামত নিয়োজিত হ’লেই অসম মাছ-মাংস আদি উৎপাদনত আত্মনিৰ্ভৰশীল হ’ব পাৰিব।