Arvind Kejriwal:
বিজেপিয়ে প্ৰাৰ্থী ক্ৰয় কৰিবলৈ চেষ্টা কৰিছে ! আম আদমী পাৰ্টিৰ (আপ) মুৰব্বী অৰবিন্দ কেজৰিৱালৰ অভিযোগে বিধানসভা নিৰ্বাচনৰ ফলাফলৰ পূৰ্বে দিল্লীৰ ৰাজনীতিত এক আলোড়নৰ সৃষ্টি কৰিছে ।
ইয়াৰ মাজতে দিল্লীৰ লেফটেনেণ্ট গৱৰ্ণৰ ভি কে ছাক্সেনাই বিষয়টোৰ তদন্তৰ অনুমতি প্ৰদান কৰিছে। তেওঁ কয় যে নিৰ্বাচনৰ ফলাফলৰ পূৰ্বে উত্থাপিত অভিযোগসমূহ নিশ্চিতভাৱে তদন্তৰ যোগ্য। সংশ্লিষ্ট কৰ্তৃপক্ষই অভিযোগ সমূহৰ তদন্ত কৰিব লাগে। দিল্লীৰ প্ৰাক্তন মুখ্যমন্ত্ৰী কেজৰিৱালে বৃহস্পতিবাৰে বিজেপিৰ বিৰুদ্ধে ভোট গণনাৰ আগতেই তেওঁৰ দল বিভাজনৰ চেষ্টা কৰাৰ অভিযোগ উত্থাপন কৰে।
আপৰ ‘সম্ভাৱ্য বিজয়ী’ প্ৰাৰ্থীৰ স’তে যোগাযোগ কৰিবলৈ আৰম্ভ কৰিছে। দল সলনি কৰিবলৈ সকলোকে ১৫ কোটি টকাৰ উৎকোচ দিয়া হৈছে ! আপৰ মুৰব্বী গৰাকীয়ে অভিযোগ কৰি কয় যে, “আমাৰ দলৰ ১৬ জন প্ৰাৰ্থীক ফোন কৰি কোৱা হৈছে যে তেওঁলোকে বিজেপিত যোগদান কৰিলে ১৫ কোটি টকা দিয়া হ’ব। তাৰ লগে লগে পাব মন্ত্ৰীৰ পদ ।”
কেৱল কেজৰিৱালেই নহয়, তেওঁৰ দলৰ সদস্যসকলেও একে অভিযোগ ছ’চিয়েল মিডিয়াত প্ৰকাশ কৰে। তেওঁলোকে দাবী কৰে যে তেওঁলোকক টকাৰ লোভ দি দল সলনি কৰাৰ প্ৰস্তাৱ দিয়া হৈছে । বিজেপিয়ে পোনপটীয়াকৈ অস্বীকাৰ কৰিলে আপৰ এই অভিযোগ। কেজৰিৱালে অভিযোগ কৰিছে যে পদ্ম শিবিৰে দিল্লীত আপৰ পৰাজয় হ’ব বুলি দাবী কৰিছে।
আপ নেতাৰ অভিযোগৰ কথা উল্লেখ কৰি শুকুৰবাৰে বিজেপিৰ দিল্লী ৰাজ্যিক সভাপতি বীৰেন্দ্ৰ সাচদেৱে কয় যে ,আমি নিৰপেক্ষ সংখ্যাগৰিষ্ঠতা লাভ কৰিম। আন দলৰ বিধায়কক সহায়ৰ প্ৰয়োজন নাথাকিব।’ কেৱল সেয়াই নহয়, আপৰ এনে প্ৰচাৰে তেওঁলোকৰ দলক বদনাম কৰা বুলিও অভিযোগ উত্থাপন কৰে বিজেপিয়ে।
নিৰ্বাচনৰ ফলাফলৰ পূৰ্বে বিজেপিৰ ভাবমূৰ্তি ধ্বংস কৰিবলৈ চেষ্টা কৰিছে আপে! ইয়াৰ পাছতে দিল্লীৰ ৰাজ্যপালে বিষয়টোৰ তদন্তৰ অনুমোদন জনায় । বুধবাৰে দিল্লী বিধানসভাৰ ৭০ খন আসনৰ বাবে ভোটদান অনুষ্ঠিত হয়। আয়োগৰ মতে, ৬০.৪২ শতাংশ ভোট দান কৰা হৈছে ।
যদিও দুয়োটা শিবিৰে শনিবাৰে গণনাৰ আগতে বিজয় দাবী কৰে , বেছিভাগ এক্সিট প’লে ভৱিষ্যতবাণী কৰে যে বিজেপিয়ে আপৰ স্থান ল’ব। অৱশ্যে এক্সিট প’লৰ ভৱিষ্যতবাণী হওক বা দিল্লীত তৃতীয়বাৰৰ বাবে আপে চৰকাৰ গঠন কৰিব নে নাই, সেইয়া শনিবাৰে ভোট গণনাৰ পাছতহে স্পষ্ট হ’ব।
