Salary account:✒️আপুনি এটাৰ পাছত আনটো ভাল চাকৰিৰ সুযোগ পাইছে নেকি? নতুন চাকৰিৰ স’তে দৰমহাৰ একাউণ্টো সলনি কৰিছে নেকি? প্রকৃততে ইয়াৰ প্রয়োজন আছেনে বাৰু? বিত্তীয় পৰামর্শদাতা তথা বিনিয়োগ বিশেষজ্ঞই অৱশ্যে এনে কৰাৰ কোনো প্রয়োজন নাই বুলি পৰামৰ্শ দিয়ে। বৰঞ্চ নতুন চাকৰিৰ স’তে দৰমহাৰ একাউণ্ট সলনি কৰিলে আপুনি জৰিমনা পৰিশোধ কৰিব লগাহে হ’ব পাৰে।
সঘনাই চাকৰি সলনি কৰি একাধিক বেংক একাউন্ট খুলিলে অধিক সতর্কতা অৱলম্বন কৰিব লাগে। নিয়ম অনুসৰি, যদি এজন ব্যক্তিৰ কোনো এটা বেংকত একাউন্ট এটা আগৰে পৰাই থাকেই, তেন্তে তেওঁক সেইটো বেংকত দ্বিতীয়টো একাউন্ট খুলিবলৈ অনুমতি দিয়া নহয়।
তদুপৰি, যদি দৰমহা একাউণ্টত নিয়মীয়াকৈ টকা জমা কৰা নহয়, আপুনি একাউন্টটো পুনৰ আৰম্ভ কৰিবলৈ এক বৃহৎ পৰিমাণৰ জৰিমনাও পৰিশোধ কৰিব লগা হয়। সকলো দৰমহা একাউন্ট হৈছে ‘শূন্য বেলেন্স একাউন্ট’।
একেৰাহে তিনি মাহ ধৰি যদি সেই একাউন্টত টকা নোসোমায়, তেন্তে তেনে একাউন্ট জমা একাউন্টলৈ ৰূপান্তৰিত হয়। প্রতিটো জমা একাউন্টত যিহেতুকে ন্যূনতম বেলেন্স জমা ৰখাৰ নিয়ম, গতিকে এনে পৰিস্থিতিত উপভোক্তাৰ সমস্যা বাঢ়িব পাৰে।
একাউন্টৰ ধৰণ অনুযায়ী ন্যূনতম ৫০০ টকাৰ পৰা ১০ হেজাৰ টকা পর্যন্ত ন্যূনতম বেলেন্স ৰাখিবলগীয়া হ’ব পাৰে উপভোক্তাই। যদিহে একাউণ্টত সিমান পৰিমাণৰ নিম্নতম বেলেন্স নাথাকে, তেন্তে জৰিমনা হিচাপে একাউণ্টৰ পৰা প্ৰতি মাহে এক নিৰ্দিষ্ট পৰিমাণৰ ধন কৰ্তন কৰা হয়।
ইয়াৰ বাহিৰেও, একাউন্টটো খুলিবলৈ বেংকে গ্ৰাহকৰ পৰা অতিৰিক্ত একো মাচুল নল’লেও, ডেবিট কার্ড-চেকবুককে ধৰি একাধিক সেৱাৰ বাবে বছৰি কিছু টকা কর্তন কৰে।
গতিকে চাকৰি সলনিৰ লগে লগে পৰাপক্ষত ছেলাৰী একাউন্ট সলনি নকৰিবলৈ পৰামৰ্শ দিয়ে বিশেষজ্ঞসকলে।
