Union Minister At The Guwahati Rozgar Mela:
প্রধানমন্ত্রী নৰেন্দ্ৰ মোদীয়ে আজি ভিডিঅ’ কনফাৰেন্সৰ জৰিয়তে নৱনিযুক্ত ১ লাখতকৈও অধিক প্রার্থীক নিযুক্তি পত্ৰ বিতৰণ কৰে। নতুন দিল্লীৰ সমন্বিত কমপ্লেক্স ‘কর্মযোগী ভৱন’ৰ প্ৰথম পৰ্যায়ৰ আধাৰশিলাও স্থাপন কৰে। প্রধানমন্ত্রীয়ে আজি নৱনিযুক্ত প্রার্থী আৰু সমবেত লোকসকলক সম্বোধন কৰি কয় যে ভাৰত চৰকাৰে চৰকাৰী চাকৰিত যুৱপ্ৰজন্মৰ সংস্থাপনৰ অভিযান পূর্ণগতিত অব্যাহত ৰাখিছে। প্ৰধানমন্ত্ৰীয়ে কয় যে বৰ্তমানৰ চৰকাৰে নিৰ্ধাৰিত সময়ৰ ভিতৰতে নিযুক্তি প্রক্রিয়া সম্পূর্ণ কৰাৰ লগতে সমগ্ৰ প্ৰক্ৰিয়াটো স্বচ্ছ কৰি তুলিছে। ইয়াৰ ফলত যুৱক- যুৱতীয়ে মেধা আৰু যোগ্যতাৰ ভিত্তিত তেওঁলোকৰ সামর্থ্য প্ৰদৰ্শন কৰাৰ সুযোগ পাইছে।
প্রধানমন্ত্রীয়ে জনাই যে বৰ্তমানৰ চৰকাৰে যোৱা ১০ বছৰত পূৰ্বৰ চৰকাৰতকৈ ১.৫ গুণ বেছি চাকৰিত যুৱপ্ৰজন্মক নিযুক্ত কৰিছে। প্রধানমন্ত্রীয়ে বাজেট প্রসংগত প্রায় ১ কোটি ছাদৰ সৌৰ প্ৰকল্পৰ কথা উল্লেখ কৰে যিয়ে পৰিয়ালসমূহৰ বিদ্যুতৰ বিল হ্রাস কৰিব আৰু তেওঁলোকে গ্রিডলৈ বিদ্যুৎ যোগান ধৰি ধন উপাৰ্জন কৰিবলৈ সক্ষম হ’ব। এই আঁচনিয়ে লাখ লাখ নতুন চাকৰিও সৃষ্টি কৰিব বুলি প্রধানমন্ত্রীয়ে কয়।
প্রায় ১.২৫ লাখ ষ্টার্টআপৰ সৈতে ভাৰত বিশ্বৰ তৃতীয় সর্ববৃহৎ ষ্টার্টআপ পৰিস্থিতিতন্ত্ৰলৈ ৰূপান্তৰিত হোৱা বুলি প্রধানমন্ত্রী মোদীয়ে আনন্দ প্রকাশ কৰে। যিহেতু এই ষ্টার্টআপবোৰে নতুন চাকৰিৰ সুযোগ সৃষ্টি কৰিছে, সেয়ে শেহতীয়া বাজেটত ষ্টার্টআপবোৰৰ বাবে কৰ ৰেহাই অব্যাহত ৰখাৰ কথা ঘোষণা কৰা হৈছে। প্রধানমন্ত্রীয়ে গৱেষণা আৰু উদ্ভাৱনৰ প্ৰসাৰৰ বাবে বাজেটত ঘোষণা কৰা ১ লাখ কোটি পুঁজিৰ কথাও উল্লেখ কৰে।
সংযোগৰ সুদূৰপ্ৰসাৰী প্ৰভাৱৰ কথা উল্লেখ কৰি প্ৰধানমন্ত্ৰীয়ে নতুন বজাৰ, পৰ্যটনৰ সম্প্ৰসাৰণ, নতুন ব্যৱসায় আৰু উন্নত সংযোগৰ ফলত লাখ লাখ চাকৰি সৃষ্টিৰ কথা উল্লেখ কৰে। “উন্নয়ন ত্বৰান্বিত কৰাৰ বাবে আন্তঃগাঁথনিৰ ক্ষেত্ৰত বিনিয়োগ বৃদ্ধি কৰা হৈছে”, প্ৰধানমন্ত্ৰীয়ে কয় যে শেহতীয়া বাজেটত আন্তঃগাঁথনিৰ ক্ষেত্ৰত বিনিয়োগৰ বাবে ১১ লাখ কোটি টকা ধাৰ্য কৰা হৈছে। নতুন ৰে’ল, পথ, বিমানবন্দৰ আৰু জলপথ প্রকল্পই নতুন চাকৰিৰ সুযোগ সৃষ্টি কৰিব বুলি তেখেতে কয়।,
নতুন নিযুক্তিসমূহৰ বহু অর্ধসামৰিক বাহিনীত সম্পন্ন হৈছে বুলি উল্লেখ কৰি প্ৰধানমন্ত্ৰীয়ে অর্ধসামৰিক বাহিনীৰ বাবে বাছনি প্ৰক্ৰিয়াৰ সংস্কাৰত গুৰুত্ব দিয়া বুলি জানিবলৈ দিয়ে আৰু কয় যে বিগত জানুৱাৰীৰ পৰা হিন্দী আৰু ইংৰাজীৰ বাহিৰেও আন ১৩টা ভাৰতীয় ভাষাতো পৰীক্ষা অনুষ্ঠিত কৰা হ’ব। ইয়াৰ ফলত লাখ লাখ প্রার্থী উপকৃত হ’ব।
কেন্দ্ৰীয় বন্দৰ, জাহাজ পৰিবহণ আৰু জলপথ তথা আয়ুষ মন্ত্রী সর্বানন্দ সোণোৱালে গুৱাহাটীৰ আজাৰাৰ সমীপৰ বিএছএফ-ৰ সীমান্ত মুখ্য কার্যালয়ত অনুষ্ঠিত ৰোজগাৰ মেলাত অংশগ্ৰহণ কৰি প্রধানমন্ত্রী নৰেন্দ্ৰ মোদীৰ অনুষ্ঠানৰ সৈতে ভার্চুৱেলী চামিল হয়। এই ৰোজগাৰ মেলাখনত ভাৰত চৰকাৰৰ বিভিন্ন বিভাগত যোগদান কৰা ১৫৮ জন প্রার্থীক সোণোৱালে আনুষ্ঠানিকভারে নিযুক্তি পত্ৰ বিতৰণ কৰে। কেন্দ্ৰীয় মন্ত্রী সর্বানন্দ সোণোৱালে প্রার্থীসকলক উষ্ম অভিনন্দন জনাই মত বিনিময় কৰে।
অনুষ্ঠানত ভাষণ প্ৰদান কৰি কেন্দ্ৰীয় মন্ত্রী সর্বানন্দ সোণোৱালে কয়, “প্ৰধানমন্ত্ৰী নৰেন্দ্ৰ মোদীৰ প্ৰেৰণাদায়ক নেতৃত্বত ২০৩০ চনৰ ভিতৰত ভাৰত বিশ্বৰ তৃতীয় বৃহত্তম অর্থনীতি হোৱাৰ দিশত ক্ষিপ্ৰতাৰে আগবাঢ়িছে। কংগ্ৰেছ চৰকাৰৰ অন্ধকাৰ যুগত ভাৰতে দৰিদ্ৰতাৰ সৈতে যুঁজিবলগীয়া হৈছিল।
কিন্তু মোদীৰ বলিষ্ঠ আৰু দূৰদৰ্শী নেতৃত্বত ভাৰতৰ জনসাধাৰণৰ বাবে এতিয়া এক নতুন যুগৰ সূচনা হৈছে, য’ত সৰ্বস্তৰৰ লোকৰ সম-কল্যাণ আৰু বিকাশ, অৰ্থনীতিৰ দ্রুত উন্নতি সাধন হৈছে। ষ্টার্টআপ ইণ্ডিয়াৰ দৰে অভিনৱ পদক্ষেপ আৰম্ভ কৰি ভাৰতে বিশ্বৰ তৃতীয় সর্ববৃহৎ ষ্টার্টআপ পৰিস্থিতিতন্ত্ৰৰ সূচনা কৰিছে যিয়ে দেশৰ যুৱপ্ৰজন্মৰ বাবে অগণন সুযোগ সৃষ্টি কৰিছে।
প্রকৃত কর্মযোগী হৈ ৰাষ্ট্ৰ নিৰ্মাণৰ উদ্দেশ্যৰ প্ৰতি প্রতিশ্রুতিবদ্ধ হ’বলৈ নতুনকৈ নিযুক্তিপ্রাপ্তসকলক বিশেষ আহ্বান জনাইছোঁ। অমৃতকালৰ শেষৰফালে ভাৰতক সম্পূৰ্ণৰূপে আত্মনিৰ্ভৰ আৰু বিশ্বৰ আগশাৰীৰ শক্তিশালী ৰাষ্ট্ৰ হিচাপে গঢ় দিয়াৰ মোদীৰ দৃষ্টিভংগীক আমি সকলোৱে মিলি বাস্তৱায়িত কৰিব লাগিব। এইক্ষেত্ৰত যুৱচামৰ অৱদান হ’ব আটাইতকৈ গুৰুত্বপূৰ্ণ।”
