Sarbanandra Sonowal:
কেন্দ্ৰীয় বন্দৰ, জাহাজ পৰিবহণ আৰু জলপথ তথা আয়ুষ মন্ত্ৰী সৰ্বানন্দ সোণোৱালে আজি অযোধ্যাৰ ৰাম মন্দিৰৰ প্ৰাণ প্ৰতিষ্ঠাৰ সৈতে সংগতি ৰাখি ডিব্ৰুগড়ৰ থানা চাৰিআলিৰ হনুমান মন্দিৰ আৰু ৰামদেৱ মন্দিৰ দৰ্শন কৰে আৰু লগতে আউনীআটী শাখা সত্ৰ ভ্ৰমণ কৰি ভক্তিপ্ৰাণ ৰাইজৰ সৈতে ভার্চুৱেলী অযোধ্যাৰ ৰাম মন্দিৰৰ প্ৰাণ প্ৰতিষ্ঠাৰ অনুষ্ঠানত যোগদান কৰে।
কেন্দ্ৰীয় মন্ত্ৰীগৰাকীয়ে ‘স্বচ্ছ তীৰ্থ অভিযান’ৰ অংশ হিচাপে হনুমান মন্দিৰ আৰু ৰামদেৱ মন্দিৰত স্বচ্ছতাৰ অভিযানা হাতত লয়। এই সময়ছোৱাত স্থানীয় বিধায়ক প্রশান্ত ফুকনো উপস্থিত থাকে।
এই সন্দর্ভত কেন্দ্রীয় মন্ত্রী সর্বানন্দ সোণোৱালে কয়, “অযোধ্যাৰ ৰাম মন্দিৰৰ প্ৰাণ প্ৰতিষ্ঠাৰ পৱিত্ৰ ক্ষণত আমি দেশবাসী একত্ৰিত হোৱাৰ এই গৌৰৱোজ্জ্বল সময়ত আমাৰ মহান ৰাষ্ট্ৰক সংজ্ঞায়িত কৰা একতা আৰু সহিষ্ণুতাৰ ভাৱনাক আঁকোৱালি লওঁ আহক। ৰাম মন্দিৰ কেৱল আস্থা- বিশ্বাসৰে প্ৰতীক নহয়, এয়া সনাতনী সভ্যতা-সংস্কৃতি, সম্প্রীতি আৰু মূল্যবোেধৰো যুগমীয়া প্ৰতীক। ৫০০ বছৰৰ অপেক্ষাৰ অন্তত এই
ঐতিহাসিক ক্ষণে প্ৰতিগৰাকী সনাতনীক আহ্লাদিত কৰিছে। ইয়াৰ সৈতে জড়িত হৈ আছে অলেখ ভক্তিপ্রাণ লোকৰ সংগ্ৰাম, কষ্ট, ত্যাগ আৰু প্ৰাণাহুতিৰ ইতিহাস। প্ৰভু শ্ৰীৰামচন্দ্ৰ অযোধ্যাত বিৰাজমান হোৱাৰ মাহেন্দ্ৰ ক্ষণ উদযাপনৰ মাজেৰে আমি অনাগত দিনবোৰত দেশক প্ৰগতিৰ নতুন শিখৰত উপনীত কৰিবলৈ পণ লওঁ আহক। প্ৰভু শ্ৰীৰামচন্দ্ৰৰ আশীৰ্বাদ সকলোৰে জীৱনত বৰ্তি থাকক আৰু মৰ্যাদা পুৰুষোত্তমৰ আশীর্বাদে ৰাষ্ট্ৰ নিৰ্মাণৰ যাত্ৰাত সমর্পিত সেৱা আগবঢ়াই যাবলৈ সকলোকে উদ্বুদ্ধ কৰক, তাৰেই কামনা কৰিলোঁ।
এই ঐতিহাসিক ক্ষণত পূর্ণোদ্যমে চামিল হৈ গৌৰৱোজ্জ্বল সময়ক উদযাপন কৰা ভক্তিপ্ৰাণ ৰাইজলৈ মোৰ আন্তৰিক ধন্যবাদ জনালোঁ।”
প্ৰধানমন্ত্ৰী নৰেন্দ্ৰ মোদীয়ে প্ৰাণ প্ৰতিষ্ঠাৰ অনুষ্ঠানত মুখ্য যজমান হিচাপে অংশগ্ৰহণ কৰে। কেন্দ্ৰীয় মন্ত্ৰী সৰ্বানন্দ সোণাৱালে ডিব্ৰুগড়ৰ লক্ষী নগৰৰ আউনীআটী শাখা সত্ৰৰ পৰা ভার্চুৱেলী অযোধ্যাৰ ৰাম মন্দিৰৰ প্রাণ প্রতিষ্ঠা অনুষ্ঠানত চামিল হয়।
লগতে সোণোৱালে কয়, “ৰাম মন্দিৰৰ প্ৰাণ প্ৰতিষ্ঠাৰ গৌৰৱময় অনুষ্ঠানৰ জৰিয়তে কোটি কোটি ভক্তিপ্রাণ লোকৰ আশা-আকাংক্ষা বাস্তৱত পৰিণত হ’ল। ৰাম মন্দিৰ আমাৰ সকলোৰে বাবে আৰু চিৰদিনলৈ আমাৰ বাবে। এই ঐতিহাসিক ক্ষণটোলৈ দেশবাসীৰ সৈতে ময়ো অধীৰ আগ্ৰহেৰে বাট চাই আছিলোঁ আৰু আজি সেই ক্ষণ পূৰ্ণ হোৱাত ধন্য অনুভৱ কৰিছোঁ।
