Aasu Gen Secy Sankarjyoti Baruah:
সদৌ অসম ছাত্র সস্থা (আছু)ৰ ইতিহাসত নজিৰ বিহীন ঘটনাৰ সৃষ্টি কৰিলে সাধাৰণ সম্পাদক শংকৰজ্যোতি বৰুৱাৰ বিৰুদ্ধে সংগঠনৰে এগৰাকী নেত্ৰীয়ে অনা প্ৰেমত প্ৰতাৰণাৰ অভিযোগে। ইয়াকে লৈ চৰম অস্বস্তিত পৰিছে সংগঠনটোৰ অন্যান্য নেতা- কর্মীসকল। বিষয়টো ব্যক্তিগত বুলি একাংশই ক’বলৈ চেষ্টা কৰিছে যদিও এটা সংগঠনৰ শীর্ষ পদবীধাৰীজনৰ বিৰুদ্ধে উত্থাপিত অভিযোগ ব্যক্তিগত পর্যায়ত নাথাকে।
একেবাৰে বিয়াৰ পৰ্যায়লৈ যোৱাৰ পাছতো আন এগৰাকী যুৱতী গায়িকাৰ লগত গোপনে সম্পৰ্ক ৰক্ষা কৰি চলা বুলি সাধাৰণ সম্পাদকজনৰ বিৰুদ্ধে যি অভিযোগ বিশ্ববিদ্যালয়ৰ ছাত্ৰীগৰাকীয়ে উত্থাপন কৰিছে, তাৰ প্ৰভাৱ দেওবাৰে সংগঠনটোৱে উদযাপন কৰা সুধাকণ্ঠ ড° ভূপেন হাজৰিকাৰ জন্ম দিৱসৰ কেন্দ্ৰীয় অনুষ্ঠানতো পৰে। প্ৰেমত প্ৰতাৰণাৰ অভিযোগত সাঙোৰ খাই পৰা বাবেই দেওবাৰে শংকৰজ্যোতি বৰুৱাই এই অনুষ্ঠানত উপস্থিত থকাৰ সাহস গোটাব নোৱাৰিলে। তাৰ বিপৰীতে আত্মৰক্ষাৰ দৌৰতহে অবতীর্ণ হয়।
পৰিতাপৰ বিষয় যে ভুক্তভোগী ছাত্ৰীগৰাকীয়ে আছুৰ সাধাৰণ সম্পাদকজনৰ বিৰুদ্ধে মহানগৰীৰ দিছপুৰ আৰক্ষী থানাত এখন এজাহাৰ দাখিল কৰাৰ ৪৮ ঘণ্টা উকলি যোৱাৰ পাছতো বহস্যজনকভাবে আৰক্ষীয়ে এজাহাৰৰ ভিত্তিত গোচৰ ৰুজু নকৰিলে। আছু নেতাজনক ৰক্ষণাবেক্ষণ দিয়াৰ গুৰুতৰ অভিযোগ উত্থাপন হৈছে। নাৰী সুৰক্ষাৰ কথা কোৱা আছু নেতাৰ বিৰুদ্ধেই এনে গুৰুতৰ অভিযোগ উত্থাপনৰ পাছত কোনে ৰক্ষণাবেক্ষণ দিছে, তাকে লৈ বিভিন্ন প্রশ্নৰ উদ্রেক ঘটিছে। গোচৰ ৰুজু কৰি আছু নেতাজনক সোধপোছ কৰাৰ পূৰ্বেই তেওঁ আগতীয়া জামিন লাভৰ বাবে চেষ্টা অব্যাহত ৰাখিবলৈ আৰক্ষীৰ বদান্যতাতে সক্ষম হ’ল বুলিও বিভিন্ন মহলত চর্চা চলিছে। ছাত্র নেতাজনে অৱশেষত আগতীয়া জামিন লাভ কৰিবলৈও সক্ষম হয়।
ইপিনে, সমগ্র বিষয়টোক আছুৰ শীর্ষ নেতৃবৃন্দই এৰাই চলিব বিচাৰিছে নেকি বুলি ছাত্র সংগঠনটোতে চর্চা আৰম্ভ হৈছে। সংগঠনৰ ৰাজ্যিক কার্যনির্বাহকৰ কে’বাজনো নেতাই আজি আক্ষেপেৰে কয় যে এনে ঘটনা আছুৰ ইতিহাসত প্রথম। এনে ক্ষেত্ৰত অভিযোগৰ ভিত্তিত শংকৰজ্যোতি বৰৱাক লৈ তাৎক্ষণিক পদক্ষেপ ল’ব লাগিছিল। তাৰ বিপৰীতে গা এবা ভূমিকাহে লোৱা দেখা গৈছে। তেওঁলোকে ক্ষোভেৰে কয়, ‘অভিযোগটো গুৰুতৰ।
আছুৰ সাংবিধানিক দিশেবেও বিষয়টো অতি স্পৰ্কাতৰ। গতিকে আমাৰ সংগঠনৰ এটা বার্তা ৰাইজে ইতিমধ্যে পাব লাগিছিল। অভিযোগ অনা ছাত্ৰীগৰাকীও আমাৰে সতীর্থ।’ আছুৰ মজিয়াত চলা এনে চর্চাতে স্পষ্ট হৈছে যে সংগঠনটোৱে নিজৰে এগৰাকী নেত্রীক ন্যায় প্রদান কৰিবলৈ কোনো চেষ্টাই কৰা নাই। আদ্ভুত মহিলাক উপযুক্ত স্থান দিয়া নহয় বুলি বিভিন্ন সময়ত অভিযোগ আছে। সাম্প্রতিক ঘটনাই পুনৰ এনে প্রশ্নৰ উত্থাপন কৰিলে।
উল্লেখ্য যে গুৱাহাটী বিশ্ববিদ্যালয়ৰ আইন বিভাগৰ ছাত্র একতা সভাৰ বিষয়ববীয়া ছাত্ৰী গৰাকীয়ে শংকৰজ্যোতিৰ প্ৰতাৰণাৰ বলি হৈ তিনি দিন পূর্বে আত্মহননৰো চেষ্ট চলাইছিল। অভিযোগ অনুসৰি, বিগত পাঁচ বছৰে থকা প্ৰেমৰ সম্পর্ক ঘৰৱা পৰ্যায়লৈ যোৱাৰ পাছতো শংকৰজ্যোতিয়ে বিগত দুবছৰৰ পৰা এগৰাকী গায়িকাৰ লগত প্ৰেমৰ সম্পৰ্ক গঢ়ি তোলে। ইয়াকে লৈ ছাত্রী গৰাকী আৰু তেওঁৰ পৰিয়াল চৰম মানসিক অশান্তিত ভুগি আছে।
উপায়ন্ত হৈ শেষত মানসিক চাপ বহন কৰিব নোৱাৰি একেলগে বহুকেইটা টেবলেট সেৱন কৰিছিল বুলি চিকিৎসক আৰু আৰক্ষীৰ আগত ছাত্ৰী গৰাকীয়ে সদৰী কৰে। আছুৰ সাধাৰণ সম্পাদক শংকৰজ্যোতিয়ে তেওঁক মাৰণাস্ত্র প্রদর্শন কৰি ভাবুকি দিয়া বুলি অতি গুৰুতৰ অভিযোগ উত্থাপন হোৱাৰ পাছতো ৰহস্যজনকভাৱে আজিলৈকে ছাত্র নেতাজনৰ বাসগৃহত আৰক্ষী তালাচীৰ বাবে কিয় উপস্থিত নহ’ল, তাক লৈও প্রশ্নও উত্থাপন হৈছে।
# অৱশেষত মুখ খুলিলে শংকৰজ্যোতিয়ে
শংকৰজ্যোতি বৰুৱাৰ বিৰুদ্ধে সংগঠনৰে এগৰাকী নেত্ৰীয়ে অনা প্ৰেমত প্ৰতাৰণাৰ অভিযোগ সন্দৰ্ভত যোৱা কেইদিন ধৰি অব্যাহত থকা ব্যাপক চৰ্চাৰ মাজতে আজি শংকৰজ্যোতি বৰুৱাই আগবঢ়াই নিজৰ প্ৰতিক্ৰিয়া ৷ মোৰ বিৰুদ্ধে অনা অভিযোেগ মই মানি লৈছো।
কিন্তু মোৰ হাততো অভিযোগ তথা প্রমাণ আছে’৷ যুৱতী গৰাকীৰ লগত প্ৰেমৰ সম্পৰ্ক আছিল ৷কিন্তু তেঁওলোকৰ মাজত প্ৰায় ১ বছৰ ধৰি চলিছিল সংঘাত৷ আনহাতে ইতিমধ্যে যুৱতী গৰাকী থানাত দিয়া গোচৰমৰ্মে অগ্ৰিম জামিন লোৱাৰ কথা উল্লেখ কৰি আছুৰ সাধাৰণ সম্পাদক গৰাকীয়ে কয় ,যুৱতী গৰাকী কোৱাৰ দৰে মোৰ হাতত কোনো ৰাইফল নাই ৷ যদি মোৰ হাতত তেনে অস্ত্ৰ আছে ৷ তেন্তে আমছ গোচৰ ৰজু হ’ব। আনহাতে এই সন্দৰ্ভত অধিক নকও যিহেতুকে গোটেই বিষয়টো আদালতৰ বিচাৰাধীন ৷ যি ক’ব লগা আছে আদালতত কম ৷ মুঠৰ ওপৰত দোষীয়ে শাস্তি পাব ৷
