Registration fee for building purchase increased to 40 per cent:
অসমত ভূমি সংস্কাৰৰ ক্ষেত্ৰত এক স্বর্ণিল যুগৰ সুচনা কৰিছে বুলি মুখ্যমন্ত্রী ড: হিমন্ত বিশ্ব শর্মাই দাবী কৰাৰ লগতে দেওবাৰে ‘মিছন বসুন্ধৰা-৩’ উদ্বোধনী ভাষণত ঘোষণা কৰা ব্যৱস্থাৱলীয়ে নগৰাঞ্চলৰ লোকসকলক আশংকিত কৰিছে।
মুখ্যমন্ত্ৰীয়ে মহানগৰীৰ শ্ৰীমন্ত শংকৰদেৱ কলাক্ষেত্র প্রেক্ষাগৃহত আয়োজিত এক অনুষ্ঠানত ‘মিছন বসুন্ধৰা-৩’ৰ আৰম্ভণি কৰি কয় যে নগৰাঞ্চলসমূহত বহু লোকক মাটিৰ পট্টা দিয়াৰ পাছতো আদায় দিবলগীয়া প্রিমিয়ামৰ বাবে মাটিৰ সুবিধা গ্রহণ কৰিব পৰা নাই।
তেওঁ কয় যে প্রিমিয়াম প্ৰদানৰ বাবে বিভিন্ন সা-সুবিধা দিয়া হৈছিল। জনসাধাৰণে এই ক্ষেত্ৰত সম্মুখীন হোৱা সমস্যা অৱগত কৰিছিল আৰু এই দিশত চৰকাৰে বিবেচনাৰ আশ্বাস দিছিল। এই কথা প্রকাশ কৰি তেওঁ কয়, ‘জনসাধাৰণৰ প্রিমিয়ামৰ বোজা লাঘৱৰ বাবে নগৰাঞ্চলৰ লোকসকলে মাটিৰ পট্টা পাবৰ বাবে অট্টালিকা থকাসকলে পূৰ্বৰ এশ শতাংশৰ পৰিৱৰ্তে বর্তমান আদায় দিবলগীয়া প্রিমিয়ামৰ পৰিমাণ ১০ শতাংশ কৰা হৈছে।
আনহাতে, অসম আৰ্হিৰ ঘৰ থকাসকলে পূৰ্বৰ নিৰ্ধাৰিত ৩০ শতাংশ প্রিমিয়ামৰ পৰিৱর্তে আঞ্চলিক মূলাংকন তিনি শতাংশ দিব
লাগিব।’ ইয়াৰ পাছতে মুখ্যমন্ত্রীয়ে কয়, ‘অট্টালিকা – থকা মানুহে মাটি ক্রয়-বিক্রয় কৰিব লাগিলে আঞ্চলিক মূলাংকন ৪০ শতাংশ আৰু অসম আৰ্হিৰ ঘৰ থকা মানুহে মাটিৰ ক্রয়-বিক্রয় কৰিলে ২৭ শতাংশ পঞ্জীয়নৰ সময়ত দিব লাগিব। ‘মিছন
বসুন্ধৰা-২’ৰ জৰিয়তে যিসকলে ভূমি আবণ্টন পাইছিল, তেওঁলোকৰ পৰাই এই ব্যৱস্থা কাৰ্যকৰী হ’ব।’ মুখ্যমন্ত্ৰীৰ এই ভাষ্যই ভূমি ক্রয়-বিক্রয়ৰ ক্ষেত্ৰত পূৰ্বৰ তুলনাত নতুন ব্যৱস্থাৱলীত আদায় দিবলগীয়া ধনৰ মূল্য বহু গুণে বৃদ্ধি পোৱাত নগৰাঞ্চলৰ বাসিন্দাসকল একপ্ৰকাৰ আতংকিত হৈছে।
এই ঘোষণাই মহানগৰীৰো সচেতন মহলত ব্যাপক প্রতিক্ৰিয়াৰ সৃষ্টি কৰাৰ লগতে ঘৰ ক্রয়-বিক্রয়ৰ ব্যৱসায়ত জড়িত থকাসকলকো গভীৰ চিন্তাত পেলাইছে। এনে এজন সচেতন লোকে কয়, ‘পঞ্জীয়নৰ সময়ত এনে বৃহৎ ধন আদায়ৰ ব্যৱস্থাই ঘৰৰ কিনা-বেচা সাধাৰণ শ্ৰেণীৰ লোকৰ বাবে অসম্ভৱ বিষয় কৰি তুলিব। সোঁৱে-বাঁৱে দুর্নীতিৰে ধন চপোৱাসকলেহে এতিয়াৰে পৰা ঘৰ কিনিব পাৰিব।
পঞ্জীয়নৰ নামত যদি চৰকাৰক এইদৰে বৃহৎ পৰিমাণৰ ধন আদায় দিবলগীয়া, তেন্তে সাধাৰণ লোকে সপোনতো ঘৰ কিনাৰ কথা ভাবিব নোৱাৰে বুলি কয় মহানগৰৰ বাসিন্দাই। এনে এজন বাসিন্দাই কয়, ‘চৰকাৰে প্ৰথমতে মাটিৰ পট্টা প্ৰদানৰ বাবে প্রিমিয়ামৰ হ্ৰাসৰ কথা কৈ মানুহক ভালৰি বোলাই লৈ একে সময়তে মাধমাৰ দিলে।’
ইপিনে, মুখ্যমন্ত্ৰীয়ে পুনৰ ভাষণত কয় যে এতিয়াৰে পৰা ভূমি উপদেষ্টা সমিতিৰ বৈঠক সমজিলা ভিত্তিক হ’ব। তেওঁ কয় যে অসমৰ একচনীয়া ভূমিসমূহ শৃংখলিত কৰিলে দালালৰাজ বন্ধ হ’ব। এইবাৰ এক শতাংশ প্রিমিয়ামৰে একচনীয়া মাটি ম্যাদী কৰিব পাৰিব বুলিও লগতে কয়। তেওঁ কয়, ‘মিছন বসুন্ধৰা-৩’ অসমৰ জনসাধাৰণৰ ভূমি আৰু পৰিচয় সুৰক্ষিত কৰাৰ বাবে লোৱা এক দৃঢ় পদক্ষেপ হিচাপে চিহ্নিত হ’ব।
২০২১ৰ পৰা ৰাজ্য চৰকাৰে লোৱা প্ৰচেষ্টাই ৰাইজক ভূমি অধিকাৰপ্ৰদানৰ ক্ষেত্ৰত তথা ভূমি সংস্কাৰৰ ক্ষেত্রত অসমত এটা স্বর্ণিল যুগৰ সূচনা কৰিছে। ৰাজ্য চৰকাৰৰ প্ৰযুক্তিৰ সহায়ত দুবছৰৰ ভিতৰত অসমৰ ভূমি ৰাজহ প্ৰশাসন ব্যৱস্থাত কৰা ভূমি সংস্কাৰ ভাৰতৰ ভিতৰতে উৎকৃষ্ট হ’ব আৰু এইটোৱে হৈছে মিছন বসুন্ধৰাৰ ডাঙৰ সফলতা।
‘মিছন বসুন্ধৰা-৩’ৰ জৰিয়তে মিছন বসুন্ধৰা-২ৰ অধীনৰ অধিক স্পষ্টতাৰ বাবে স্থগিত ৰখা আবেদনৰ পুনৰ পৰীক্ষা নগৰ আৰু কাষৰীয়া অঞ্চলত বেহাই প্রিমিয়াম হাৰত একচনীয়া পট্টাৰ ম্যাদীকৰণ, পূৰ্বৰ গ্রাম্য কিন্তু পৰৱৰ্তী কালত নগৰ অঞ্চলৰূপে ঘোষিত অঞ্চলত দখলীস্বত থকা ৰায়তক মালিকীস্বত্ব প্রদান, বন্দৱস্তি নোহোৱা পূৰ্বৰ ভূদান- গ্রামদান ভূমিৰ বন্দৱস্তি প্রদান, প্ৰসাৰিত ৰূপত ভূমিৰ শ্ৰেণীৰ পৰিৱৰ্তন, চাহ অনুদান-গ্ৰান্টণ্ট ভূমিৰ পট্টাৰ শ্ৰেণী পৰিৱৰ্তন ক্রমে পট্টা প্রদান, তদুপৰি বসুন্ধৰা-২ৰ অধীনৰ সাধাৰণ চৰকাৰী আৰু চিলিং চৰকাৰী ভূমিৰ পট্টন, দখলীস্বত্ব থকা ৰায়তক মালিকীস্বত্ব প্রদান (গ্রামাঞ্চল) আৰু খিলঞ্জীয়া লোকক কফি, চাহ, ৰবৰ খেতিৰ বাবে ব্যৱহাৰ কৰি থকা ভূমিৰ পট্টন সেৱা জনসাধাৰণৰ বাবে মিছন বসুন্ধৰা-৩ৰ জৰিয়তে উপলব্ধ হ’ব।
ভাষণত মুখ্যমন্ত্রী ড: শৰ্মাই মিছন বসুন্ধৰা-৩ আৰম্ভ হোৱা আজিৰ দিনটো আনন্দ আৰু স্মৰণীয় দিন বুলি অভিহিত কৰে। তেওঁ কয় যে ক’ভিডৰ পৰিৱেশৰ মাজত বৰ্তমানৰ ৰাজ্য চৰকাৰে দায়িত্ব গ্রহণ কৰিছিল আৰু সেই সময়ছোৱাত উন্নয়নৰ কথা কোৱাটো এক অলীক কল্পনা আছিল।
প্ৰতিকূল পৰিৱেশৰ মাজতো ৰাজহ সংস্কাৰৰ দিশত যুগান্তকাৰী পদক্ষেপ লোৱাৰ বিষয়ে আলোচনা কৰা হৈছিল বুলি মন্তব্য কৰি তেওঁ কয় যে ২০২১ৰ দুই অক্টোবৰত মিছন বসুন্ধৰাৰ প্ৰথম পৰ্যায়ৰ আৰম্ভ হৈছিল। মিছন বসুন্ধৰা-১.০ত ৮,১৩,৯৮১খন ভূমি সংক্রান্তীয় আবেদন নিষ্পত্তি কৰা হৈছিল।