BJP Releases Assam Poll Sankalp Patra:
দৈনিক অগ্ৰদূত ডিজিটেল ডেক্স:—ৰাজ্যৰ বিধানসভা নিৰ্বাচন দিন চমু চাপি অহাৰ লগে লগে শাসক- বিৰোধী সহ সকলো সৰু-বৰ দলে ব্যাপক তৎপৰতা অব্যাহত ৰাখিছে। কংগ্ৰেছে দেওবাৰে পাঁচটা প্ৰতিশ্ৰুতি সহ দলীয় ইস্তাহাৰ মুকলি কৰাৰ পিছত আজি ৰাজ্যিক বিজেপিও মুকলি কৰিলে ৩১টা প্রতিশ্রুতিৰে বিজেপিৰ সংকল্প পত্ৰ ৷ এই উপলক্ষে মহানগৰীৰ বশিষ্ঠস্থিত ৰাজ্যিক বিজেপিৰ কাৰ্যালয় বাজপেয়ী ভৱনত কেন্দ্ৰীয় বিত্তমন্ত্ৰী নিৰ্মলা সীতাৰমণৰ উপস্থিতিত মুকলি কৰা হয় সংকল্প পত্ৰ ৷ অনুষ্ঠানত উপস্থিত থাকে মুখ্যমন্ত্ৰী ড:হিমন্ত বিশ্বশৰ্মা, কেন্দ্ৰীয় মন্ত্ৰী সৰ্বানন্দ সোনোৱাল,কেন্দ্ৰীয় ৰাজ্যিক মন্ত্ৰী পবিত্ৰ মাৰ্ঘেৰিটা,বিজেপিৰ ৰাষ্ট্ৰীয় উপ- সভাপতি বৈজয়ন্ত পাণ্ডা সহ কে’বা গৰাকী জ্যেষ্ঠ নেতা।
উল্লেখ্য যে ৩১টা প্রতিশ্রুতিৰে বিজেপিৰ সংকল্প পত্ৰত উল্লেখ থকা মুল প্ৰতিশ্ৰুতি কেইটা হ’ল -অৰুণোদয় আঁচনিৰ ধন পূৰ্বৰ ১,২৫০ টকাৰ পৰা ৩ হাজাৰ টকালৈ বৃদ্ধি কৰা হ’ব ধন ৷ একেদৰে২ লাখ নিবনুৱাক চাকৰি প্ৰদানৰ প্ৰতিশ্ৰুতি । চিএমএএএ’কে ধৰি ১০ লাখ যুৱক-যুৱতীক দিয়া হ’ব আর্থিক সাহায্য ৷ অবৈধ অনুপ্ৰৱেশকাৰীক চিনাক্ত আৰু বহিষ্কৰণৰ প্রতিশ্রুতি দি বিজেপিয়ে ১৯৫০ৰ Immigrants Impulsion Actৰ যোগেদি কৰা বিতাড়ন কৰিব অবৈধ অনুপ্ৰৱেশকাৰীক৷
আনহাতে ষষ্ঠ অনুসূচী আৰু জনজাতীয় অঞ্চল বাদ দি বলবৎ হ’ব ইউচিচি৷ লাভ জেহাদ, ভূমি জেহাদৰ বিৰুদ্ধে কঠোৰ হ’ব বিজেপি চৰকাৰ। ৰাজ্যৰ দীৰ্ঘদিনীয়া বান সমস্যা ১৮ হাজাৰ কোটি ব্যয়েৰে বানমুক্ত কৰাৰ প্ৰতিশ্ৰুতি দিয়ে বিজেপিয়ে ৷ এখন বানমুক্ত অসম গঢ়াৰ সংকল্প ইস্তাহাৰত উল্লেখ কৰা হয় ৷
