ভাৰতত বৃদ্ধি পাইছে কৰ’না আক্ৰান্তৰ সংখ্যা । সেয়ে বিভিন্ন ৰাজ্যই একাধিক বিধিনিষেধ জাৰি কৰিছে । ইয়াৰ মাজতেই দেখা গ’ল মধ্যপ্ৰদেশৰ মন্ত্ৰীক বিমানবন্দৰত বহি পূজা কৰা । ক’ভিড প্ৰতিৰোধ কৰিবৰ বাবেই এই পূজা । কিন্তু মন্ত্ৰীৰ মুখতে মাস্ক নাই । সম্প্ৰতি এই কাৰ্যৰ বাবে সমালোচনাৰ সন্মুখীন হৈছে মন্ত্ৰীগৰাকী ।
মধ্যপ্ৰদেশৰ পৰ্যতন তথা সংস্কৃতি মন্ত্ৰী ঊষা ঠাকুৰে ইন্দৌৰ বিমানবন্দৰত অহল্যাবাই হোলকাৰ মূৰ্তিৰ সন্মুখত পূজাত বহে । এই পূজাত তেওঁক যোগ দিয়ে বিমানবন্দৰৰ পৰিচালক আৰ্যমা সন্ন্যাস আৰু বিষয়াসকলে ।
বিমানবন্দৰত পূজাৰ সময়ত মাস্ক অবিহনেই দেখা যায় মন্ত্ৰীগৰাকীক । ইয়াকে লৈ আৰম্ভ হৈছে ব্যাপক সমালোচনা । সকলোৱে প্ৰশ্ন কৰিছে, ‘তেওঁ কৰ’না প্ৰতিৰোধ কৰিবলৈ পূজা কৰিছে, ইপিনে কিয় তেওঁৰ মুখতে মাস্ক নাই ?’
অৱশ্যে ইয়াৰ পূৰ্বেও মন্ত্ৰী ঊষাক মাস্ক অবিহনে দেখা গৈছিল বিধানসভাত । সেই সময়ত সাংবাদিকৰ প্ৰশ্নৰ উত্তৰত তেওঁ কৈছিল যে, তেওঁ প্ৰত্যেক দিনাই যজ্ঞ কৰে আৰু হনুমান চালিছা পঢ়ে । সেয়ে তেওঁক মাস্ক পৰিধান কৰাৰ প্ৰয়োজন নাই ।
বিগত বৰ্ষত সংক্ৰমণ বৃদ্ধিৰ সময়ত কেন্দ্ৰীয় মন্ত্ৰী ৰামদাস আঠৱালে ‘গ’ কৰ’না গ’ বুলি প্ৰাৰ্থনা কৰিছিল । সেই প্ৰাৰ্থনাৰ ভিডিঅ’ সামাজিক মাধ্যমত ভাইৰেল হৈ পৰিছিল । এইবাৰ মধ্যপ্ৰদেশৰ মন্ত্ৰীগৰাকীৰো ভিডিঅ’ ভাইৰেল হৈ পৰিছে সামাজিক মাধ্যমত ।