ClimateChange :📌 দৈনিক অগ্ৰদূত ডিজিটেল ডেস্ক : সাৱধান! অহা বছৰটো হ’ব ইতিহাসৰে সবাতোকৈ গৰম বছৰ। প্ৰশান্ত মহাসাগৰৰ এল নিনোসহ বিভিন্ন কাৰকৰ ক্ৰিয়াৰ ফলত আগন্তুক বছৰটোত অসহনীয় গৰম পৰাৰ আশংকা কৰিছে বতৰ বিজ্ঞানীসকলে।
উল্লেখ্য যে এইবাৰ বিভিন্ন অঞ্চল প্রচণ্ড বানৰ কৱলত পৰিলেও দৰাচলতে এইবাৰৰ বৰ্ষাকালত বৰষুণৰ পৰিমাণ হ্রাসহে পায়। এই কথা সম্ভৱতঃ সকলোৱে লক্ষ্য কৰিছে। বৰ্ষাৰ দিনত বৰষুণ নোহোৱা বা পৰিমাণ হ্ৰাসৰ অন্যতম কাৰণৰূপে চিহ্নিত হৈছে প্রশান্ত মহাসাগৰৰ এল নিনো।
এই এল নিনোৰ প্ৰভাৱতে ভাৰতকে ধৰি দক্ষিণ এছিয়াৰ বিভিন্ন ঠাইত বৰ্ষাৰ দিনবোৰত বৰষুণৰ ঘাটিয়ে দেখা দিছে। অৱশ্যে কেৱল ভাৰত বা দক্ষিণ এছিয়াতে নহয়, সমগ্র বিশ্বতে এল নিনোৱে বতৰৰ ওপৰত প্ৰভাৱ পেলাইছে। আনকি এল নিনোৰ এই প্ৰভাৱৰ ফলত অহা ২০২৭ৰ বছৰটো ইতিহাসৰে সবাতোকৈ গৰম বছৰ হোৱাৰ আশংকা কৰিছে বিজ্ঞানীসকলে।
প্রায় এল নিনোৰ স’তে দুর্বল মৌচুমী বতাহৰ সম্পর্ক থাকে। উল্লেখ্য যে এল নিনো হৈছে বিষুবীয় প্রশান্ত মহাসাগৰৰ মধ্য আৰু কেন্দ্রীয় অঞ্চলৰ জলপৃষ্ঠ স্বাভাবিকতকৈ অধিক গৰম হোৱা। ইয়ে সমগ্ৰ বিশ্বৰ বতৰৰ ওপৰত প্ৰভাৱ পেলাইছে।
এল নিনোৰ প্ৰভাৱ সম্পৰ্কত ব্রিটেইনৰ বতৰ বিজ্ঞান কেন্দ্ৰৰ মুৰব্বী অধ্যাপক আদম স্কেইফে কয়, ‘আমাৰ ধাৰণা স্পষ্ট হোৱা উচিত যে এয়া হৈছে এক অভূতপূর্ব ঘটনা। মই কেতিয়াও এনে গভীৰ এল নিনো দেখা নাছিলো।’
এই এল নিনোৰ ফলত অহা বছৰটো ইতিহাসৰে সবাতোকৈ গৰম বছৰ হ’ব বুলিও বিজ্ঞানীজনে সতৰ্ক কৰি দিছে। বিজ্ঞানীসকলৰ মতে প্রশান্ত মহাসাগৰ বাণিজ্যিক বতাহ দুর্বল বা বিপৰীতমুখী হ’লে গৰম পানী পূবমুৱাকৈ প্ৰভাৱিত হ’বলৈ ধৰিলেই এল নিনোৰ উদ্ভৱ হয়।
সম্প্রতি প্রশান্ত মহাসাগৰৰ এল নিনোৰ উৎপত্তিস্থলত উষ্ণতা স্বাভাৱিকতকৈ দুই ডিগ্রী চেলচিয়াছ অধিক হৈ আছে। ব্রিটিছ বতৰ বিজ্ঞান কেন্দ্ৰৰ মতে চলিত বৰ্ষৰ অন্তিমফালে এই উষ্ণতা তিনি ডিগ্রী চেলচিয়াছলৈ বৃদ্ধি পাব পাৰে। এনে পৰিৱেশ ১৯৫০ৰ পাছত এইবাৰ প্ৰথমবাৰৰ বাবে উদ্ভৱ হৈছে।
এল নিনোৰ ফলত ভাৰত তথা দক্ষিণ এছিয়াত বর্ষাকালত বৰষুণৰ ঘাটিয়ে দেখা দিয়ে। চলিত বাৰিষাত কি ঘটিল সেয়া সকলোৰে চকুৰ সন্মুখত। অৰ্থাৎ দেশৰ প্রান্তে প্রান্তে এইবাৰৰ বাৰিষাত বৰষুণৰ ঘাটি হয়। অৱশ্যে বাৰিষা ভাৰতত বৰষুণৰ ঘাটিৰ বাবে কেৱল এল নিনোক জগৰীয়া কৰিব নোৱাৰি। ইয়াৰ আন বহু কাৰণো আছে।
এনে কাৰকৰ অন্যতম হৈছে মানবসৃষ্ট জলবায়ু পৰিৱৰ্তন। ইতিমধ্যে প্রশান্ত মহাসাগৰৰ কেতবোৰ স্থানত প্রায় এশ মিটাৰ গভীৰতাত উষ্ণতা স্বাভাৱিকতকৈ আঠ ডিগ্রী চেলচিয়াছ বৃদ্ধি পাইছে। ইয়ে আগন্তুক মাহবোৰত এল নিনো অধিক প্ৰবল কৰি তোলাৰ আশংকা আছে। কাৰণ সাগৰৰ পানীৰ তলৰ এই উষ্ণতা বৃদ্ধিৰ ফলত উত্তাপৰ এক বৃহৎ চৌবাচ্চাৰ সৃষ্টি হৈছে।
গতিকে অহা বছৰটোৰ অত্যধিক গৰম সহ্য কৰিবলৈ প্ৰস্তুতি চলোৱাৰ সময় সমাগত হ’ল বুলি বতৰ বিজ্ঞানীসকলে মন্তব্য কৰিছে।
