দৈনিক অগ্ৰদূত ডিজিটেল ডেস্ক : পৰ্বতৰ প্রতি বহুতৰে আকর্ষণ আছে। বহু মানুহেই পাহাৰীয়া অঞ্চলত ফুৰিবলৈ যায় বা পৰ্বতাৰোহণ কৰিবলৈ যায়। অথচ পর্বতত শুই-বহি কটাই চাকৰি কৰাৰ কথা কোনেও কল্পনা কৰিব নোৱাৰে। তাকো কেৱল মেঘ চাই থাকিব লাগে।
সম্প্ৰতি পৰ্বতৰ ওপৰত বহি মেঘ চাই চাই মাহিলি শকত অংকৰ দৰমহা লৈ আছে চীনৰ এজন যুৱকে। এই কামৰ বাবে ২৩ বছৰীয়া যুৱকজনে মাহিলি লাভকৰে প্ৰায় চাৰে আঠ লাখ টকা।
তেওঁৰ কামটোও বহু অদ্ভুত। কাম বুলিবলৈ প্রতিদিনে পুৱা শোৱাৰ পৰা উঠি পাহাৰীয়া মেঘৰ বিচৰণ প্ৰত্যক্ষ কৰিব লাগে। লগতে প্ৰকৃতিৰ কাৰ্যকলাপ কেমেৰাবন্দী কৰাই সেই যুৱকজনৰ চাকৰি। আচলতে চীনৰ হেনান প্ৰদেশৰ বিখ্যাত লাওজুন পাহাৰ পৰ্যটকৰ অন্যতম প্রিয় স্থান।
দুহেজাৰ বছৰৰো অধিক পুৰণি এই ঐতিহাসিক পাহাৰীয়া অঞ্চলটো ‘মেঘৰ সমুদ্র’ নামেৰে পৰিচিত। কিয়নো পাহাৰৰ ওপৰৰ পৰা কিছু তলত মেঘৰ তৰপবোৰ ঠিক বগা সাগৰৰ দৰে লাগে। সম্প্রতি পাহাৰৰ এই সৌন্দর্য বিশ্ব মঞ্চত তুলি ধৰিবলৈকে এক ভিন্নধর্মী উদ্যোগ লয় স্থানীয় পর্যটন কর্তৃপক্ষই।
সৃষ্টি কৰা হয় ‘ক্লাউডস্কেপ অবজার্ভাৰ’ বা ‘মেঘ পৰিদৰ্শক’ নামৰ এটা নতুন পদ। সামাজিক মাধ্যমত এই চাকৰিৰ খবৰ প্ৰকাশ পোৱাৰ লগে লগে হুলস্থুল লাগে। মাত্র এসপ্তাহৰ ভিতৰতে চাৰে চিনি হেজাৰ আবেদন জমা হয়। কঠোৰ প্রতিযোগিতাৰ অন্তত কপাল ফুলে ২৩ বছৰীয়া ভুগাৰ লী ছিচেনে।
তেওঁ ১৬ জুলাইৰ পৰা ১৫ আগষ্ট পর্যন্ত পাহাৰৰ চূড়াত থকাৰ সুযোগ পায়। তেওঁৰ কামটো আছিল নিতৌ সলনি হৈ থকা মেঘ, কুঁৱলি আৰু সূর্যোদয়ৰ দৃশ্য কেমেৰাবন্দী কৰা। লগতে পর্যটন কেন্দ্ৰৰ নিজস্ব সামাজিক মাধ্যমৰ ছাইটত সেইবোৰ ভিডিঅ’ প’ষ্ট কৰা।
শুনিবলৈ স্বপ্নৰ দৰে লাগিলেও কামটো কিন্তু একেবাৰে সহজ নাছিল। কিয়নো মেঘতো আৰু কেতিয়াও নির্দিষ্ট সময় মানি নাহে। সেয়ে লীয়ে পুৱা পাঁচ বজাৰ পৰা কেমেৰা হাতত লৈ সাজু হৈ থাকিব লাগিছিল। নিখুঁত ভিডিঅ’ আৰু ফটো সংগ্ৰহৰ বাবে তেওঁ ড্র’ন চলাবলৈকো শিকিবলগীয়া হৈছিল।
আনকি ভিডিঅ’ এডিটিঙৰ কামো শিকিছিল। মেঘ দেখা নোপোৱা পর্যন্ত সময়খিনি উদ্বেগৰে অতিবাহিত হৈছিল। অৱশ্যে সকলো অতিক্ৰম কৰি এমাহতে তেওঁ লাভকৰিলে চীনৰ ৬০ হেজাৰ ইউয়ান, ভাৰতীয় মুদ্রাত প্রায় আঠ লাখ ৫০ হেজাৰ টকা।
অভিজ্ঞ পর্যটন বিষয়াসকলৰ মতে, পাহাৰক সেই যুৱকজনে এজন কবিৰ দৃষ্টিৰে সন্ধান কৰিছিল। চাইছে মেঘৰ নিজস্ব জগতখন। এই চোৱাৰ কামতে তেওঁ সফল হৈছে। কামৰ শেষত লীয়েও জনায় যে সময়খিনি যেন দেউকাত ভৰ দি উৰি গুচি গ’ল।
