All Accused In North Cachar’s Thousand Crore Scam Acquitted:
উত্তৰ কাছাৰৰ ( বৰ্তমান ডিমা হাচাও) বহুচৰ্চিত হাজাৰ কোটিটকীয়া কেলেংকাৰী গোচৰৰ আটাইকেইজন অভিযুক্তই অৱশেষত ৰেহাই পালে ৷
কেলেংকাৰীৰ পৰা ৰক্ষা পালে আৰ এইছ খান,জুৱেল গাৰ্লোছা, নিৰঞ্জন হোজাই, মোহিত হোজাইকে ধৰি ১১ গৰাকী অভিযুক্তই যাৱজ্জীৱন কাৰাদণ্ড শাস্তিৰ পৰা ৰেহাই পায় ৷
গুৱাহাটী উচ্চ ন্যায়ালয়ে আজি এই গোচৰটোৰ ওপৰত ৰায়দান কৰি নিম্ন আদালতৰ পূৰ্বৰ ৰায়টোক খাৰিজ কৰে ৷
বিচাৰ প্ৰক্ৰিয়াত প্ৰতিয়নযোগ্য তথ্য প্ৰমাণ দাখিলত তদন্তকাৰী সংস্থা ব্যৰ্থ হোৱাৰ বাবেই উচ্চ ন্যায়ালয়ে তেওঁলোকক দোষমুক্ত ঘোষণা কৰে বুলি সদৰি কৰে আচামীগণৰ অধিবক্তা বিজন মহাজনে ৷
ৰাজ্য কপাই যোৱা এহেজাৰ কোটি টকাৰ কেলেংকাৰীৰ স’তে উত্তৰ কাছাৰ পাৰ্বত্য জিলাৰ মুখ্য কাৰ্যবাহী বিষয়া মোহিত হোজাই, সমাজ কল্যাণ বিভাগৰ উপ-সঞ্চালক আৰ এইছ খান, উগ্ৰপন্থী সংগঠন ডি এইছ ডিৰ নেতা জুৱেল গাৰ্লোচা, নিৰঞ্জন হোজাইকে ধৰি মুঠ ১১ জনক নিম্ন আদালতে দোষী সাব্যস্ত কৰিছিল।
পৰৱৰ্তী সময়ত সমাজ কল্যাণ বিভাগৰ তদানীন্তন উপ-সঞ্চালক আৰ এইছ খান সহ ৮ জন অভিযুক্ত জামিনত আছিল ৷
কিন্ত জুৱেল গাৰ্লোচা,মোহিত হোজাই আৰু নিৰঞ্জন হোজাইক ৰাষ্ট্ৰীয় তদন্তকাৰী সংস্থা চমুকৈ নিয়াৰ আদালতে যাৱজ্জীৱন কাৰাদণ্ডৰে দণ্ডিত কৰাৰ বিপৰীতে ১১ জনক দোষী সাব্যস্ত কৰে ৷
নিয়া আদালতৰ সেই ৰায়ক প্ৰত্যাহ্বান জনাই এঘাৰজন অভিযুক্তই গুৱাহাটী উচ্চ ন্যায়ালয়ত আপিল কৰে ৷ সেই আপিলৰ শুনানি গ্ৰহণ কৰি শুক্ৰবাৰে আদালতৰ ডিভিজন বেঞ্চে নিয়া আদালতৰ ৰায়ক খাৰিজ কৰি আটাইকেইজন অভিযুক্তকে দোষমুক্তৰ ৰায়দান দিয়ে ৷
ইয়াৰ লগে লগে যাৱজ্জীৱন কাৰাদণ্ডৰে দণ্ডিত হৈ ইতিমধ্যে কাৰাবন্দী হৈ থকা নিৰঞ্জন হোজাই, জুৱেল গাৰ্লোচাৰ আৰু মোহিত হোজাই মুকলি আকাশৰ তললৈ অহাটো নিশ্চিত হ’ল।
