Case Against Bengaluru Cinema Hall:
২৫ মিনিট ধৰি বিজ্ঞাপন ! সময় নষ্ট কৰাৰ অভিযোগত জনপ্ৰিয় চিনেমা হল আৰু টিকট বুকিং সংস্থাৰ বিৰুদ্ধে গোচৰ ৰুজু কৰিলে এজন যুৱকে ! সেই গোচৰত সংশ্লিষ্ট চিনেমা হলৰ কৰ্তৃপক্ষক ক্ষতিপূৰণ হিচাপে ৬৫ হেজাৰ টকা দিবলৈ নিৰ্দেশ দিছে আদালতে।
সৰ্বভাৰতীয় সংবাদ মাধ্যমৰ এক সূত্ৰৰ মতে, ২০২৩ চনত ত্ৰিশ বছৰীয়া যুৱকজনে বাংগালুৰুৰ জনপ্ৰিয় থিয়েটাৰ পিভিআৰ ইনক্সত ‘ছেম বাহাদুৰ’ নামৰ এখন চিনেমা চাবলৈ গৈছিল। ইয়াৰ বাবে তেওঁ ‘বুক মাই শ্ব’’ এপৰ পৰা আগতীয়াকৈ অনলাইন টিকট বুকিং কৰে । যুৱকজনে আবেলি চাৰি বজাৰ অনুষ্ঠানটো চাবলৈ টিকট ক্ৰয় কৰে । তেওঁ ভাবিছিল চিনেমাখন সন্ধিয়া ছয় বাজি ৩০ মিনিটৰ ভিতৰত শেষ হ’ব। ইয়াৰ পাছত তেওঁৰ এটা জৰুৰী কাম আছিল। কিন্তু অভিযোগ, নিৰ্ধাৰিত সময়সূচী অনুসৰি চিনেমাখন আৰম্ভ কৰাৰ পৰিৱৰ্তে প্ৰায় চাৰি বাজি ৩০ মিনিটৰ পৰা চিনেমাখন আৰম্ভ হয় !
চিনেমাখন আৰম্ভ হোৱাৰ পূৰ্বে ২৫ মিনিট ধৰি দীঘলীয়া বিজ্ঞাপনটো দেখুওৱা হয়। ফলস্বৰূপে যুৱকজনৰ কামত পলম হোৱাৰ দাবী । উল্লেখ্য যে ইয়াৰ পাছতে তেওঁ চিনেমা হল কৰ্তৃপক্ষ আৰু টিকট বুকিং কোম্পানীৰ নামত গোচৰ ৰুজু কৰে!আদালতত, যুৱকজনে দাবী কৰে যে চিনেমা হলৰ বাবে তেওঁৰ ‘মূল্যৱান সময়’ অপচয় হৈছে । পলম হোৱাৰ বাবে, তেওঁ সেই সন্ধিয়া আন কোনো কামত যোগদান কৰিব নোৱাৰিলে। ইফালে আদালতেও যুৱকজনৰ সপক্ষে ৰায় প্ৰদান কৰে !
আদালতে লক্ষ্য কৰিছে যে সময় টকাৰ সমাৰ্থক। গতিকে সময় নষ্ট কৰাৰ এই অভিযোগটো ন্যায়সঙ্গত। চলচ্চিত্ৰ প্ৰদৰ্শনৰ সময়ত দৰ্শকসকলক বিজ্ঞাপন চাবলৈ বাধ্য কৰাটোও অনুচিত বাণিজ্য প্ৰথা। নিয়ম অনুসৰি, চিনেমা খন আৰম্ভ হোৱাৰ ১০ মিনিট আগতে আৰু দুয়োটা অৰ্ধাংশৰ মাজত বিজ্ঞাপন প্ৰদৰ্শন কৰিব পাৰি। পিভিআৰ আৰু ইনোক্সক সময় অপচয়ৰ বাবে ৫০ হেজাৰ টকা, মানসিক নিৰ্যাতনৰ বাবে পাঁচ হেজাৰ টকা আৰু যুৱকজনে দাখিল কৰা অভিযোগ আৰু আইনী ব্যয়ৰ বাবে ১০হেজাৰ টকা জৰিমনা বিহা হৈছে।
এই সকলো টকা সেই ব্যক্তিজনৰ হাতত হস্তান্তৰ কৰা হ’ব। ইয়াৰ উপৰিও আদালতে কোম্পানী দুটাক এক লাখ টকা অতিৰিক্ত জৰিমনা আদায় দিবলৈ নিৰ্দেশ দিয়ে।
