Waqf Board has not been formed in the state for six years:
অসমত ৱাকফ ব’ৰ্ড শীঘ্ৰে গঠনৰ দাবী জনাইছে বদৰুদ্দিন আজমল নেতৃত্বাধীন অসম ৰাজ্যিক জমিয়ত উলামাই। এক সংবাদমেলত সংগঠনটোৰ সম্পাদক তথা বিধায়ক ড° ৰফিকুল ইছলামে চৰকাৰক এই দাবী জনাই কয় যে যদিহে তৎকালে ব’ৰ্ডখন গঠন কৰা নহয়, তেনেহ’লে তেওঁলোক ন্যায়ালয়ৰ দ্বাৰস্থ হ’ব। ইছলামে কয়, ‘কেন্দ্ৰত যিদৰে ৱাকফ ব’ৰ্ড আৰু সম্পত্তিক লৈ চৰকাৰে যি ধৰণৰ কাৰচাজি অব্যাহত ৰাখিছে, অসমতো তাৰ প্ৰভাৱ দেখা হৈছে ।
ৱাকফৰ হেজাৰ হেজাৰ বিঘা ভূমি বেদখল হৈছে। বেদখল উচ্ছেদক লৈ চৰকাৰৰ কোনো তৎপৰতা নাই । এনে আচৰণৰ জৰিয়তে চৰকাৰে ৱাকফ’লৈ সম্পত্তি দান কৰাসকলকহে অপমান কৰিছে। ভবিষ্যৎ প্ৰজন্মৰ বাবে ৱাকফ’লৈ দানবীৰসকলে সম্পত্তি আগবঢ়াই গৈছে। চৰকাৰৰ আওকণীয়া ভূমিকাত সেই সম্পত্তিত কেৱল বেদখল চলিছে।’ ৱাকফক লৈ কেন্দ্ৰীয় চৰকাৰে গ্ৰহণ কৰা ভূমিকাকো ইছলামে সমালোচনা কৰে।
চৰকাৰৰ উদ্দেশ্য ভাল নহয় বাবেই যুটীয়া সংসদীয় সমিতিৰ বৈঠকতো শাসক পক্ষৰ সাংসদসকলে বিৰোধীক উপেক্ষা কৰি আহিছে বুলি ইছলামে কয়। সংগঠনটোৰ অতিৰিক্ত সাধাৰণ সম্পাদক ফজলুল কৰিমে কয় যে প্রায় ছবছৰ ধৰি অসমত ৰাকফ ব’ৰ্ড গঠন হোৱা নাই। এয়া আইনবিৰুদ্ধ। চৰকাৰে এতিয়াও কোনো ধৰণৰ গুৰুত্ব দিয়া দেখা পোৱা নাই বুলি উল্লেখ কৰি কৰিমে কয় যে ন্যায় বিচাৰি তেওঁলোক ন্যায়ালয়ৰ দ্বাৰস্থ হ’ব।
তাৰ পূৰ্বে চৰকাৰক ব’ৰ্ডখন তৎকালে গঠন কৰিবলৈ দাবী জনাইছে। সংবাদমেলত ৰফিকুল ইছলামে ৰাষ্ট্ৰীয় নাগৰিকপঞ্জী (এনআৰচিত নাম অন্তর্ভুক্ত নোহোৱাসকলক ‘বিজেকছন শ্লিপ’ শীঘ্ৰে প্ৰদান কৰিবলৈও দাবী জনায়। তেতিয়াহে মানুহবোৰে আদালতৰ দ্বাৰস্থ হ’ব পাৰিব বুলি তেওঁ কয়।
একেদৰে এনআৰচিত নাম অন্তর্ভুক্ত হোৱা সকলকো ভবিষ্যতে কোনো ধৰণৰ অসুবিধা হ’ব নোৱৰাকৈ পৰিচয় পত্ৰ দিব লাগে বুলি চৰকাৰক দাবী জনায়। ইছলামে লগতে কয়, ‘অসমত অনুপ্ৰৱেশকাৰী চিনাক্তকৰণৰ সময়সীমা ১৯৭১ৰ ২৪ মার্চ বুলি উচ্চতম ন্যায়ালয়ে ৰায় দিয়াৰ পাছত চূড়ান্ত এনআৰচিক লৈ যদি কিবা বাধা আছিল, সেয়াও আঁতৰিছে। গতিকে চূড়ান্ত এনআৰচিত নাম অন্তর্ভুক্ত হোৱাসকলক পৰিচয়পত্ৰ দিয়াত এতিয়া নিশ্চয় বাধা নাই।’
