অৱশেষত আবেগ বিহ্বল পৰিস্থিতিৰ মাজেৰে আছু ত্যাগ কৰিলে সাধাৰণ সম্পাক লুৰীণজ্যোতি গগৈয়ে । আজি নিশা দুলিয়াজানৰ অধিবেশনত বিষয় বাচনি সভাত ভাষণ দি লুৰীণজ্যোতিয়ে কয়, ‘সদৌ অসম ছাত্ৰ সন্থাৰ পৰা বিদায় মাগিব বিচাৰিছো । এইটো মোৰ সিদ্ধান্ত । মই বহুবাৰ বিবেকক সুধিছো, মই বহুবাৰ হৃদয়ক সুধিছো, আত্মাক সুধিছো । মই সকলোকে সেৱা জনাইছো । এই বিদায়ক্ষণত সহায়-সহযোগিতা আগবঢ়াবলৈ সকলোকে আহ্বান জনালো ।’
তেওঁৰ এই ঘোষণাৰ লগে লগে মঞ্চলৈ উঠি যায় আছুৰ সদস্যসকল । তেওঁলোকে ‘লুৰীণ ককাই জিন্দাবাদ’, ‘জয় আই অসম’, ‘ককাই আমাৰ জিন্দাবাদ’ আদি ধ্বনিৰে অধিবেশন স্থলি উত্তাল কৰি তোলে । এক আৱেগিক পৰিৱেশত লুৰীণজ্যোতিয়ে চকুপানী বাধা দিব নোৱাৰিলে ।
ইয়াৰ পাছত চকুপানী টুকি থোকাথুকি মাতেৰে তেওঁ সাংবাদিকক কয়, ‘এটা শক্তিশালী-যুগান্তকাৰী সিদ্ধান্ত লোৱা হৈছে । মোৰ ব্যক্তিগত জীৱনৰ বাবে সিদ্ধান্ত ল’ব খোজা নাই । আমি এটা নিৰ্দিষ্ট সময়ৰ কাৰণে বাৰে বাৰে কৈছো । অসমৰ ৰাইজে নিশ্চয় বুজিছে মই কি ক’ব খুজিছো । নিৰ্দিষ্ট সময়ৰ কাৰণেহে মানুহে যিকোনো অনুষ্ঠানত থকাতো প্ৰয়োজন । বিশ্ববিদ্যালয়ে দুটা বছৰ সিদ্ধান্ত কৰি দিছে স্নাতকোত্তৰ ডিগ্ৰীৰ কাৰণে, পাঁচটা বছৰ নিৰ্ধাৰণ কৰি দিছে গৱেষণা কৰিবৰ বাবে । নিৰ্দিষ্ট সময় সকলোতে থাকে । এইটো আপুনি, মই গ্ৰহণ কৰিব লাগিব । এইটো বিজ্ঞানসন্মত কথা, বাস্তৱ প্ৰাকৃতিক পৰিঘটনা । এই যি মানুহৰ নাটক আৰু কাৰচাজি তাৰ সামৰণি পৰিব ওলাগে। মই বিদায় লোৱাৰ সিদ্ধান্ত ঘোষণা কৰিম বুলি কথা দিছিলো আজি কথা ৰাখিলো । আন যিবোৰ কথা ক’ম সকলোৰে আগত ক’ম ইয়াত মোৰ নিজৰ বুলিবলৈ একান্ত ব্যক্তিগত কোনো কথা নাই । কাৰণ মই কৈছোৱে মোৰ কাৰণে সুযোগ আছিল ছাত্ৰ সন্থাৰ সভাপতি হোৱাৰ । সুযোগ আছিল যিবোৰ শক্তিয়ে মোৰ নাম কয়, বিজেপি আৰু কংগ্ৰেছ তেওঁলোকৰ দলৰ টিকট ল’বলৈ, এটা ভাল ৰাজনৈতিক যাত্ৰা কৰিবলৈ মোৰ প্লেটফ’ৰ্ম আছিল । তেওঁলোকৰ লগত গৈ মন্ত্ৰী-বিধায়ক হোৱাৰ বাসনা যদি মোৰ থাকিল হেতেন মই নিশ্চিতভাৱে তালৈ যাব পাৰিলো হয় । মই যোৱা নাই কে’বাটাও কথা ৰক্ষা কৰিবৰ বাবে ছাত্ৰ সন্থাত প্ৰতাৰণা কৰাৰ বাবেই যিসকলে দলিল ৰচনা কৰিছে ইয়াৰ অৱসান ঘটাবলৈ মোৰ এটা ক্ষুদ্ৰ প্ৰচেষ্টা । মই অন্তত গড্ডাৰী কৰা মানুহ নহয় । মই যদি ভুল কৰিছো আঙুলিয়াই দিয়ক ।’
লুৰীণজ্যোতিয়ে কয় যে, তেওঁ জাতিক সাহস-ন্যায়-প্ৰৰণা দিবলৈ চেষ্টা কৰিব । ‘এই গিদ্ধান্ত মই জানি-বুজি বিবেকৰে লৈছো । মই নিজে সাহসৰে বিবেকক সুধি মন-আত্মা-হৃদয়ৰ সকলোকে কৈছো এই সিদ্ধান্তই ছাত্ৰ সন্থাত এক আদৰ্শ প্ৰতিষ্ঠা কৰিব । কাৰণ ছাত্ৰ সন্থাৰ মঞ্চখন ত্যাগৰ যিটো শক্তি সেইটো অৰ্জন কৰিব লাগিব । এইবোৰ চিন্তা, আদৰ্শ আমি ছাত্ৰ সন্থাৰ কৰ্মকৰ্তাক দেখুৱাব লাগিব । এইবাৰ বহু সিদ্ধান্ত যোগান্তকাৰী সিদ্ধান্ত হৈছে । সময়ে ক’ব সথিক সিদ্ধান্ত তেওঁলোকে গ্ৰহণ কৰিছে, শক্তিশালী সিদ্ধান্ত কৰিছে । মোৰ এই সিদ্ধান্ত মই নাজানো এশ শতাংশ শুদ্ধ বুলি কয় নে নকয় ।’