ভাৰত- বাংলাদেশৰ তিক্ততাপূৰ্ণ পৰিবেশৰ মাজতে সোমবাৰে দুপৰীয়া ঢাকাত উপস্থিত ভাৰতীয় বৈদেশিক সচিব বিক্রম মিস্ত্ৰী :
ভাৰত- বাংলাদেশৰ তিক্ততাপূৰ্ণ পৰিবেশৰ মাজতে সোমবাৰে দুপৰীয়া ঢাকাত উপস্থিত হয় ভাৰতীয় বৈদেশিক সচিব বিক্রম মিস্ত্ৰী। বায়ুসেনাৰ বিশেষ বিমানেৰে ঢাকা বিমান বন্দৰত উপস্থিত হোৱা বৈদেশিক সচিব গৰাকীক উস্ম আদৰণি জনায় বাংলাদেশৰ বৈদেশিক দপ্তৰৰ উচ্চপদস্থ বিষয়াই ৷
বিক্রম মিস্ত্ৰীয়ে আজি সন্ধিয়া ভাগত বাংলাদেশৰ বৈদেশিক সচিবৰ স’তে ৰাষ্ট্ৰীয় অতিথিশালা পদ্মা ভৱনত দুই দেশৰ তিক্ততাপূৰ্ণ পৰিস্থিতি আৰু কেতবোৰ বিষয় সন্দৰ্ভত আলোচনা কৰাৰ সম্ভাৱনা আছে ৷
# ভাৰতৰ বৈদেশিক সচিব বিক্রম মিস্ত্ৰী বাংলাদেশ ভ্রমণৰ প্ৰাকক্ষণত উত্তাল প্ৰতিবাদ বাংলাদেশ নেছনেলিষ্ট পার্টিৰ
ভাৰতৰ বৈদেশিক সচিব বিক্রম মিস্ত্ৰী বাংলাদেশ ভ্রমণৰ প্ৰাকক্ষণত ঢাকাস্থিত ভাৰতীয় উচ্চাযুক্তালয় কঁপোৱাৰ ব্যর্থ চেষ্ট চলায় দেশখনৰ সোঁপন্থী ৰাজনৈতিক দল বাংলাদেশ নেছনেলিষ্ট পার্টি (বিএনপি)য়ে। দেওবাৰে বিএনপিৰ হেজাৰ হেজাৰ নেতা-কর্মীয়ে ভাৰতৰ বিৰুদ্ধে বিভিন্ন অভিযোগ উত্থাপন কৰি ঢাকাৰ বড়িধাৰাস্থিত ভাৰতীয় উচ্চায়ুক্তালয়লৈ এক সমদল উলিয়ায়। প্রাক্তন প্রধানমন্ত্রী খালেদা জিয়া নেতৃত্বাধীন সোঁপন্থী দলটোৰ তিনিটা শাখা ক্রমে যুৱ দল , স্বেচ্ছাসেৱক দল আৰু ছাত্র দলে উলিওৱা এই বৃহৎ সমদলক ৰামপুৰা দলঙৰ ওচৰত আৰক্ষীয়ে বাধা দিয়ে। দুপৰীয়া ১২-৩৫ বজাত বিএনপিৰ ঢাকাৰ নয়াপল্টনস্থিত মুখ্য কাৰ্যালয়ৰ পৰা উলিওৱা এই সমদলে ৰামপুৰা দলঙৰ ওচৰ পোৱাৰ সময়তে প্রতিবাদকাৰী সকলক বৃহৎ সংখ্যক আৰক্ষীয়ে বাধা দিয়ে।
আইন-শৃংখলাৰ সমস্যা সৃষ্টিৰ আশংকা কৰি আগতীয়াকৈ আৰক্ষীয়ে ৰামপুৰা দলঙৰ ওচৰত বেৰিকেড স্থাপন কৰি আৰক্ষীয়ে প্রতিবাদকাৰী সকললৈ অপেক্ষা কৰে। প্ৰতিবাদকাৰীসকল উক্ত স্থানত উপস্থিত হোৱাৰ লগে লগে তেওঁলোকক আৰক্ষীয়ে বাধা দি এই প্রতিবাদী কাৰ্যসূচীৰ নেতাসকলক নিৰাপত্তা বাহিনীক সহযোগ কৰিবলৈ আহ্বান জনায়। আৰক্ষীৰ এই আহ্বানলৈ সঁহাৰি দি প্ৰতিবাদকাৰীসকল থমকি ৰয়। অৱশ্যে তাত সমদলকাৰীসকলে কমেও এঘণ্টা পথ অৱৰোধ কৰে। প্রতিবাদকাৰীসকলে প্ৰকাশ কৰা অনুসৰি তেওঁলোকে ত্ৰিপুৰাৰ আগৰতলাত শেহতীয়াভাৱে বাংলাদেশৰ উপ-উচ্চায়ুক্তালয় সংঘটিত প্ৰতিবাদকাৰীৰ উপদ্ৰৱ আৰু দেশখনৰ ৰাষ্ট্ৰীয় পতাকা অৱমাননাৰ বিৰুদ্ধে এই প্রতিবাদী সমদল কাৰ্যসূচীৰ আয়োজন কৰে।
আনহাতে, আৰক্ষীৰ বাধাত ৰামপুৰ দলঙৰ ওচৰত প্রতিবাদী কাৰ্যসূচীৰ সামৰণি পেলোৱাৰ পাছত প্রতিবাদকাৰীসকলে বড়িধাৰাস্থিত ভাৰতীয় উচ্চায়ুক্তালয়লৈ ছজন প্রতিনিধি প্ৰেৰণ কৰে। প্ৰতিবাদকাৰীসকলক প্রতিনিধিত্ব কৰি বিএনপিৰ যুৱ দলৰ কেন্দ্ৰীয় সভাপতি মনায়েম মুন্না, সাধাৰণ সম্পাদক নুৰুল ইছলাম নয়ন, স্বেচ্ছাসেৱক দলৰ সভাপতি এছএম জিলানি, সাধাৰণ সম্পাদক ৰাজীৱ এহছান, ছাত্ৰ দলৰ সভাপতি ৰকিবুল ইছলাম ৰাকিব আৰু সাধাৰণ সম্পাদক নাছিৰ উদ্দিন নাছিৰ ভাৰতীয় উচ্চায়ুক্তালয়ত উপস্থিত হৈ কে’বাদফীয়া দাবী সম্বলিত স্মাৰক পত্ৰ প্ৰদান কৰে।
ভাৰতীয় উচ্চায়ুক্তালয়ৰ এজন বিষয়াই ছয়জনীয়া প্রতিনিধি দলটোৰ পৰা গ্ৰহণ কৰা এই স্মাৰকপত্ৰত ‘আগৰতলা কাণ্ড’ আৰু দেশখনৰ ৰাষ্ট্ৰীয় পতাকা পদদলিত কৰাৰ ঘটনাৰ প্রতিবাদো জনোৱা হৈছে। তদুপৰি বাংলাদেশৰ ক্ষমতাচ্যুত প্রধানমন্ত্রী শ্বেইখ হাছিনাক ভাৰতত আশ্রয় দিয়াক লৈও স্মাৰক পত্ৰখনত অসন্তুষ্টি প্রকাশ কৰা হৈছে। প্রতিবাদকাৰীসকলে অভিযোগ কৰিছে যে ভাৰতত নিৰাপদ আশ্রয়ত থাকি প্রাক্তন প্রধানমন্ত্রী হাছিনাই বাংলাদেশক অস্থিৰ কৰাৰ চেষ্টা কৰিছে। ক্ষমতাচ্যুত প্ৰধানমন্ত্ৰী গৰাকীৰ প্ৰতি ভাৰতে প্ৰদৰ্শন কৰা এই দৰদক বাংলাদেশৰ জনতাই ইতিবাচকভাবে লোৱা নাই বুলিও প্রতিবাদকাৰী সকলে দাবী কৰে।
প্রতিবাদকাৰীসকলে লগতে অভিযোগ কৰা অনুসৰি, ভাৰতে বাংলাদেশত সাম্প্রদায়িক সংঘৰ্ষৰ উচটনি যোগাবলৈ ষড়যন্ত্র কৰিছে। লক্ষ্যণীয় যে বাংলাদেশত হিন্দু নিৰ্যাতনৰ বিৰুদ্ধে অলপতে আগৰতলাত একাংশই কৰা প্রতিবাদৰ সময়ত দেশখনৰ উপ-উচ্চায়ুক্তালয়ত দুর্বৃত্তই উপদ্রব চলায়। ইয়াক লৈ বাংলাদেশে তীব্র প্রতিক্রিয়া প্রকাশ কৰি ঢাকাস্থিত ভাৰতীয় উচ্চাযুক্ত প্রণয় বাৰ্মাক তলব কৰি নি ক্ষোভ প্রকাশ কৰে। ইয়াৰ সমান্তৰালভাৱে আগৰতলা কাণ্ডৰ বিৰুদ্ধে ভাৰত চৰকাৰে কঠোৰ স্থিতি গ্ৰহণ কৰে। ঘটনাত জড়িত থকাৰ অভিযোগত আৰক্ষীয়ে সাতজন লোকক গ্ৰেপ্তাৰ কৰে। তদুপৰি ঘটনাটো সংঘটিত হোৱাৰ সময়ত কৰ্তব্যত গাফিলতি কৰাৰ অভিযোগত ত্ৰিপুৰা চৰকাৰে তিনিজন আৰক্ষী বিষয়াক নিলম্বিত কৰাৰ লগতে আন এজনক ৰিজার্ভ ক্ল’জড কৰে। তৎসত্ত্বেও বাংলাদেশত আগৰতলা কাণ্ডৰ বিৰুদ্ধেও প্রতিবাদ অব্যাহত থকাটোৱে তাৎপর্য বহন কৰিছে।
ইপিনে, ভাৰতীয় উচ্চায়ুক্তালয়লৈ প্রতিবাদী সমদল উলিওৱাৰ পূর্বে প্রতিবাদকাৰীসকলে বিএনপিৰ মুখ্য কাৰ্যালয়ত দিনৰ ১১-৩০ বজাত এক প্রতিবাদী সভা অনুষ্ঠিত কৰে। এই সভাত ভাষণত বিএনপিৰ জ্যেষ্ঠ যুটীয়া সাধাৰণ সম্পাদক ৰুহুল কবিৰ ৰিজভি আৰু দলৰ উক্ত তিনিটা শাখাৰ শীর্ষ নেতৃবর্গই গৰিহণা দিয়ে যে ভাৰতৰ শাসক দল আৰু সংবাদ মাধ্যমে বাংলাদেশত ধর্মীয় সম্প্রীতিত ব্যাঘাত জন্মোৱাৰ উদ্দেশে মিছা আৰু বিপথে পৰিচালনাকাৰী প্ৰচাৰ চলাইছে। ভাষণত ৰিজভিয়ে লগতে অভিযোগ কৰে যে ভাৰতৰ শাসক দলে ক্ষমতাচ্যুত প্রধানমন্ত্রী হাছিনাক বাংলাদেশত পুনৰ ক্ষমতালৈ ঘূৰাই আনিব বিচাৰিছে। ইয়াক তেওঁ প্রত্যক্ষ আগ্রাসনৰ বাহিৰে আন একো নহয় বুলি আখ্যা দিয়ে। ভাৰত চৰকাৰে বাংলাদেশৰ জনতাক ভাল নাপায় বুলিও ক্ষোভ প্রকাশ কৰি তেওঁ পুনৰ কয়, ‘আপোনালোক (ভাৰত চৰকাৰ)-এ বাংলাদেশৰ জনতাক ভাল নাপায়। আপোনালোকে বাংলাদেশৰ সাৰ্বভৌমত্ব আৰু স্বাধীনতাক সম্মান নজনায়।’
ক্ষমতাচ্যুত প্রধানমন্ত্রী হাছিনাই শক্তিশালী গণ প্ৰতিবাদৰ সন্মুখীন হৈ বাংলাদেশৰ পৰা পলায়ন কৰি ভাৰতত আশ্রয় লয় বুলি উল্লেখ কৰি বিএনপি নেতাজনে পুনৰ কয়, ‘ভাৰতৰ শাসক দলে হাছিনাক ক্ষমতালৈ ওভতাই আনিবলৈ যি কৰিছে, সেয়া ৰাজনীতি বিজ্ঞানৰ ভাষাত প্রত্যক্ষ আগ্রাসনৰ বাহিৰে আন একো নহয়।’ দিল্লীৰ প্ৰভুত্বক প্রতিহত কৰিবলৈ বাংলাদেশৰ ১৮ কোটি জনতা সাজু আছে বুলি উল্লেখ কৰি তেওঁ আৰু কয়, ‘বায়ু, সমুদ্ৰৰ পৰা মাটিলৈ এই তিনিও ক্ষেত্ৰতে যুঁজ দি আমাৰ দেশক সুৰক্ষা কৰাৰ বাবে উন্নত অস্ত্র কেনেদৰে ব্যৱহাৰ কৰিব লাগে আমি জানো। আমাৰ তজবজীয়া সামৰিক বাহিনীত সমর্থবান লোক আছে।’ এই প্রতিবাদী কার্যসূচী উপলক্ষে আজি পুৱা ৯-৩০ বজাৰ পৰা বিএনপিৰ মুখ্য কাৰ্যালয়লৈ দলৰ নেতা- কর্মী-সমর্থকৰ সোঁত বয়। উক্ত প্রতিবাদী সভাৰ পাছত প্ৰতিবাদকাৰীসকলে ভাৰত বিৰোধী ধ্বনি লিখা ফেষ্টুন আৰু ৰাষ্ট্ৰীয় পতাকা লৈ ভাৰতীয় উচ্চায়ুক্তালয় অভিমুখে সমদল উলিয়ায়।