Amlan Borgohain :
অসমৰ গৌৰৱ, স্প্ৰীন্টাৰ অম্লান বৰগোহাঁইয়ে দিশপুৰস্থিত লোকসেৱা ভৱনত ৰাজ্যৰ মুখ্যমন্ত্রী ড: হিমন্ত বিশ্ব শৰ্মাক এক সৌজন্যমূলক সাক্ষাৎ কৰে। দ্রুত মানৱ তথা দেশৰ অন্যতম আগশাৰীৰ আন্তর্জাতিক এথলেট অম্লানে টাইৱানত সদ্য অনুষ্ঠিত ‘টাইৱান অপেন আন্তর্জাতিক এথলেটিকছ চেম্পিয়নশ্বি’ত ভাৰতীয় দলৰ হৈ ৪ X ১০০ মিটাৰ ৰীলেত সোণৰ পদক অর্জন কৰাৰ উপৰিও ইতিমধ্যে দেশ-বিদেশৰ বিভিন্ন ৰাষ্ট্ৰীয় তথা আন্তঃৰাষ্ট্ৰীয় প্রতিযোগিতাত নিজৰ অসামান্য ক্রীড়া প্রতিভাবে সুনাম কঢ়িয়াই আনিছে।
এই প্রসংগত মুখ্যমন্ত্ৰীয়ে অম্লানৰ সফলতাক লৈ গৌৰৱ প্ৰকাশ কৰাৰ লগতে অসম সন্তান গৰাকীয়ে অংশগ্রহণ কৰিবলগীয়া সমাগত আন্তঃৰাষ্ট্ৰীয় প্রতিযোগিতাসমূহৰ বাবে আন্তৰিক শুভেচ্ছা জ্ঞাপন কৰে। সাক্ষাৎকালত অসম এথলেটিকছ সন্থাৰ সভাপতি তথা ৰাজ্য চৰকাৰৰ কেবিনেট মন্ত্রী জয়ন্ত মল্লবৰুৱা আৰু সাধাৰণ সম্পাদক গীতার্থ গোস্বামীও উপস্থিত থাকে। সাক্ষাৎ কালত মুখ্যমন্ত্রীয়ে অম্লান বৰগোহাঁইৰ পৰৱৰ্তী লক্ষ্য কমনবেলথ গেমছ আৰু এছিয়ান চেম্পিয়নশ্বিপৰ বাবে চলি থকা প্ৰস্তুতিৰ বিষয়ে খেলুৱৈ গৰাকীৰ সৈতে গুৰুত্ব সহকাৰে আলোচনা কৰে।
মুখ্যমন্ত্রীয়ে নিজা অনুভৱ ব্যক্ত কৰি কয় যে, “অম্লান অসমৰ লগতে দেশৰ গৌৰৱ। অসম চৰকাৰৰ পৰা তেখেতৰ আগন্তুক প্রতিযোগিতাৰ বাবে সম্ভৱপৰ সকলো ধৰণৰ সহযোগিতা আগবঢ়োৱা হ’ব।” লগতে এই গৌৰৱময় যাত্ৰাত অম্লানৰ মনোবল দৃঢ় ৰাখি বিশ্বৰ ক্ৰীড়া ক্ষেত্ৰত অসমৰ নাম উজ্জ্বল কৰাৰ আশা প্রকাশ কৰে মুখ্যমন্ত্ৰী গৰাকীয়ে।
উল্লেখযোগ্য যে, অম্লান বৰগোহাঁইয়ে ইতিমধ্যে দেশৰ বহু প্রতিযোগিতাত পদক লাভ কৰাৰ উপৰিও নিজকে ৰাষ্ট্ৰৰ শ্রেষ্ঠ দৌৰবিদ হিচাপে প্রতিষ্ঠা কৰিছে। তেখেতৰ এই যাত্ৰাত ৰাজ্য চৰকাৰে সহায়-সহযোগিতা আগবঢ়ালে আগন্তুক দিনত আন্তর্জাতিক ক্রীড়াক্ষেত্ৰত তেওঁৰ সফলতা আৰু অধিক বিৰাজমান হ’ব বুলি আশা প্রকাশ কৰিছে ৰাজ্যৰ ক্ৰীড়ামোদীসকলেও ৷