Wife Kills Husband MP:
দৈনিক অগ্ৰদূত ডিজিটেল ডেক্স:–কেৱল ক’লা হোৱাৰ বাবেই স্বামীক নৃশংস হত্যা পত্নীৰ। প্ৰেমিকৰ সৈতে মিলি স্বামীৰ প্ৰাণ লোৱা পত্নী ইতিমধ্যে আৰক্ষীৰ জালত। এই দেশ জোকাৰি যোৱা ভয়ংকৰ কাণ্ড সংঘটিত হয় মধ্য প্ৰদেশৰ ধৰ জিলাৰ ৰাজোদত ৷
মৎস্য ব্যৱসায়ী দেৱকৃষ্ণ পুৰোহিতৰে দীৰ্ঘদিন ধৰি তেওঁৰ পত্নী প্ৰিয়ংকাৰ সম্পৰ্ক ভাল নাছিল। দেৱকৃষ্ণ ভগ্নীয়ে আৰক্ষীক জানিব দিয়া মতে দেৱকৃষ্ণক পত্নীয়ে প্ৰায়ে অপমান কৰি কৈছিল যে ক’লা বৰণৰ হোৱা বাবে ঠাট্টা-মস্কৰাৰে সম্পৰ্কটোক বিষাক্ত কৰি তুলিছিল। এই বিষয়টোক লৈ দৈনিক তৰ্ক-বিতৰ্কৰ সূত্ৰপাত ঘটিছিল ঘৰখনত৷ যাৰ ফলত দেৱকৃষ্ণ মানসিক চাপত ভুগিছিল।
দেৱকৃষ্ণৰ ভগ্নীয়ে আৰক্ষীক বিতংভাৱে সদৰি কৰা মতে কিছুদিনৰ পৰা প্ৰিয়ংকাৰ আচৰণ সন্দেহজনক হৈ আছিল। স্বামীৰ পৰা দূৰত্ব বজাই ৰাখি ঘণ্টাৰ পিছত ঘণ্টা ধৰি ম’বাইলত কথা পাতিছিল ৷ যাৰবাবে এইক্ষেত্ৰত দেৱকৃষ্ণই আপত্তি কৰিলেই দুয়োৰে মাজত কথাৰ কটাকটি হয় । আনকি প্ৰিয়ংকাই কেইবাবাৰো বিবাহ বিচ্ছেদ কৰাও ভাবুকি দিছিল ৷
আনহাতে আৰক্ষীয়ে প্ৰাৰম্ভিক তদন্তত অবৈধ প্ৰেমৰ সম্পৰ্ক পোহৰলৈ আহিছে ৷ ৰাজগড় নিবাসী কমলেশ পুৰোহিতৰ সৈতে প্ৰিয়ংকাৰ দীৰ্ঘদিনীয়া সম্পৰ্ক আছিল। এই সম্পৰ্কৰ বাবেই দুয়োজনে দেৱকৃষ্ণক নিৰ্মূল কৰাৰ পৰিকল্পনা ৰচনা কৰিছিল। তদন্তত প্ৰকাশ পাইছে যে কমলেশে তেওঁৰ সংগী সুৰেন্দ্ৰ ভাটীক এক লাখ টকাৰ বিনিময়ত তেওঁক হত্যা কৰিবলৈ চুক্তিবদ্ধ কৰিছিল৷ ইয়াৰে ৫০ হাজাৰ টকা ইতিমধ্যে দিয়া হৈছিল।
৭ এপ্ৰিলৰ নিশা ষড়যন্ত্ৰৰ অংশ হিচাপে দেৱকৃষ্ণ পুৰোহিত ঘৰৰ দুৱাৰখন খোলা ৰখা হৈছিল। ইয়াৰ পিছতে অভিযুক্তই ঘৰত প্ৰৱেশ কৰি শুই থকা দেৱকৃষ্ণক চোকা অস্ত্ৰৰে আক্ৰমণ কৰি হত্যা কৰে। প্ৰমাণ নষ্ট কৰি আৰক্ষীক বিপথে পৰিচালিত কৰাৰ উদ্দেশ্যে ঘৰৰ সা-সামগ্ৰীবোৰ সিঁচৰতি কৰি ঘটনাটোক ডকাইতি বুলি চিহ্নিত কৰাৰ প্ৰয়াস কৰা হৈছিল।
অৱশ্যে আৰক্ষীৰ মাৰাথন জেৰাত দেৱকৃষ্ণ পুৰোহিতৰ পত্নীক সোধা-পোছা কৰাৰ সময়ত তেওঁৰ বক্তব্যত কেইবাটাও বৈপৰীত্যৰ কথা পোহৰলৈ আহে। ম’বাইল কলৰ সবিশেষ, আৰু কাৰিকৰী প্ৰমাণৰ ভিত্তিত সমগ্ৰ ষড়যন্ত্ৰৰ খলনায়ক দেৱকৃষ্ণৰ পত্নী প্ৰিয়ংকা আৰু তেওঁৰ প্ৰেমিক কমলেশক আৰক্ষীয়ে গ্ৰেপ্তাৰ কৰাৰ বিপৰীতে চুপাৰি কিলাৰ সুৰেন্দ্ৰ ভাটী এতিয়াও পলাতক অৱস্থাত আছে। আৰক্ষীয়ে অভিযান অব্যাহত ৰাখিছে ।
আনহাতে আৰক্ষীয়ে ঘৰৰ পৰা চুৰি হোৱা বুলি অভিযোগ উত্থাপন কৰা কেতবোৰ সামগ্ৰীও উদ্ধাৰ কৰাৰ সমান্তৰালভাৱে হত্যাকাণ্ডৰ পূৰ্বে দেৱকৃষ্ণক কোনো ধৰণৰ মাদক দ্ৰব্য দিয়া হৈছিল নেকি সেই বিষয়েও তদন্ত অব্যাহত ৰাখিছে আৰক্ষীয়ে।
