Dalgaon:
দৈনিক অগ্ৰদূত ডিজিটেল ডেক্স:-চৰকাৰী চাকৰিৰ আশাত বছৰ বছৰ ধৰি অপেক্ষা কৰাৰ বিপৰীতে নিজৰ পৰিশ্ৰম, অধ্যৱসায় আৰু চিন্তাশীল পদক্ষেপেৰে স্বাৱলম্বিতাৰ এক উজ্জ্বল নিদৰ্শন স্থাপন কৰিছে দৰঙৰ দলগাঁৱৰ এজন যুৱ উদ্যোক্তা মহিবুল হকে। ঘৰতে থলুৱা প্ৰজাতিৰ কুকুৰা পালন কৰি বৰ্তমান তেওঁ আৰ্থিকভাৱে স্বাৱলম্বী হোৱাৰ লগতে অঞ্চলটোৰ বহু নিবনুৱা যুৱকৰ বাবে প্ৰেৰণাৰ উৎস হৈ পৰিছে।
সৰু পৰিসৰত আৰম্ভ কৰা এই উদ্যোগ আজিৰ দিনত এক সফল উদাহৰণ হিচাপে পৰিগণিত হৈছে। কোনো ডাঙৰ বাণিজ্যিক ফাৰ্ম স্থাপন নকৰাকৈ নিজ গৃহ পৰিসৰত বৈজ্ঞানিক পদ্ধতি অনুসৰণ কৰি মহিবুলে থলুৱা বা লোকেল কুকুৰা পালন কৰি আহিছে। বৰ্তমান তেওঁৰ ফাৰ্মত ৬০০তকৈও অধিক থলুৱা প্ৰজাতিৰ কুকুৰা আছে বুলি জানিব পৰা গৈছে।
বজাৰত থলুৱা কুকুৰাৰ মাংস আৰু ডিমৰ চাহিদা দিনক দিনে বৃদ্ধি পোৱাৰ ফলত মহিবুলে এই ব্যৱসায়ৰ জৰিয়তে প্ৰতিমাহে লক্ষাধিক টকা উপাৰ্জন কৰিবলৈ সক্ষম হৈছে। বিশেষকৈ স্বাস্থ্যসচেতন গ্ৰাহকৰ মাজত থলুৱা কুকুৰাৰ প্ৰতি আগ্ৰহ বৃদ্ধি পোৱাত তেওঁৰ উৎপাদিত কুকুৰাৰ বিক্ৰীও যথেষ্ট বৃদ্ধি পাইছে।মহিবুলে জনায় যে আৰম্ভণিতে বহু সমস্যাৰ সন্মুখীন হ’বলগীয়া হৈছিল যদিও ধৈৰ্য, অধ্যৱসায় আৰু সঠিক পৰিকল্পনাই তেওঁক সফলতাৰ পথ দেখুৱাইছে। থলুৱা সম্পদক সঠিকভাৱে ব্যৱহাৰ কৰিলে গাঁৱে-গঞ্জেও যে স্বাৱলম্বী হোৱাৰ পথ বিচাৰি পাব পাৰি, সেই কথা তেওঁ বাস্তৱ ৰূপে প্ৰমাণ কৰি দেখুৱাইছে।
মহিবুলৰ এই সফলতাই এতিয়া অঞ্চলটোৰ বহু নিবনুৱা যুৱকক নতুনকৈ চিন্তা কৰিবলৈ উৎসাহিত কৰিছে। বহিঃৰাজ্যৰ পৰা অহা বয়লাৰ কুকুৰাৰ ওপৰত নিৰ্ভৰ নকৰি স্থানীয়ভাৱে উৎপাদিত থলুৱা কুকুৰাৰ জৰিয়তে আত্মনিৰ্ভৰশীল হোৱাৰ পথ যে সম্ভৱ, সেয়া যেন মহিবুলৰ এই প্ৰচেষ্টাই স্পষ্ট কৰি তুলিছে।স্থানীয় ৰাইজৰ মতে, উপযুক্ত চৰকাৰী সহায় আৰু প্ৰশিক্ষণ লাভ কৰিলে মহিবুলৰ দৰে বহু যুৱকে কৃষিভিত্তিক আৰু পশুপালন ভিত্তিক উদ্যোগৰ জৰিয়তে নিজৰ জীৱন গঢ়াৰ সুযোগ লাভ কৰিব। মহিবুল হকৰ এই সফলতা কেৱল ব্যক্তিগত জয়গাথা নহয়, ই গাঁওৰ অৰ্থনৈতিক বিকাশৰ ক্ষেত্ৰতো এক আশাব্যঞ্জক দৃষ্টান্ত হিচাপে পৰিগণিত হৈছে।
