NasatraBaghekhaity : দৈনিক অগ্ৰদূত ডিজিটেল ডেস্ক : বঙাইগাঁও জিলাৰ টাপাট্টাৰী উন্নয়ন খণ্ডৰ অন্তৰ্গত নসত্ৰ-বাঘেখাইতি পঞ্চায়তত পঞ্চায়ত সচিব আৰু সভানেত্ৰীৰ স্বামীৰ দৌৰাত্ম্যৰ বাবে অতিষ্ঠ হৈছে সৰ্বসাধাৰণ জনতা। পঞ্চায়ত সচিব চিত্ত ৰায় আৰু সভানেত্ৰীৰ স্বামী নাছিৰ উদ্দিনে আন সদস্যৰ মতামতক কোনো গুৰুত্ব নিদি নিজৰ খেয়ালখুচিমতে আঁচনি ৰূপায়ণ কৰি অহাত ক্ষোভিত হৈ পৰিছে আন পঞ্চায়ত সদস্যসকল।
অভিযোগ মতে, পঞ্চায়ত সচিব চিত্ত ৰায় আৰু জিআৰএছ ছহিদুল আলম আহমেদে পঞ্চায়ত কার্যালয়ত প্রায়ে অনুপস্থিত থাকে। পঞ্চায়তৰ বাসিন্দাসকলে বিশেষ জৰুৰী কামত যোগাযোগ কৰিলে প্রায়ে খণ্ড উন্নয়ন বিষয়াৰ কাৰ্যালয়, জিলা পৰিষদ কাৰ্যালয়ত ব্যস্ত থকা বুলিহে কৈ অহাত বহু সময়ত বিপাঙত পৰে পঞ্চায়তৰ বাসিন্দাই।
উল্লেখ্য যে, পঞ্চায়ত সচিব আৰু জিআৰএছ দুয়োৰে ঘৰ অভয়াপুৰী চহৰত। অভিযোগ মতে, পঞ্চায়ত সচিব চিত্ত ৰায় আৰু জিআৰএছ ছহিদুলে মাহেকে পষেকে একেখন বাহনতে আহি পঞ্চায়তত ভুমুকি মৰাত বিভিন্ন প্রমাণ পত্ৰ লোৱাৰ ক্ষেত্ৰত অসুবিধাৰ সম্মুখীন হৈ আহিছে।
আনপিনে পঞ্চায়তৰ পৰা প্ৰমাণপত্র বা আন নথিপত্র বিচাৰিলে পঞ্চায়ত সচিবে ধন লোৱাৰো অভিযোগ উত্থাপিত হৈছে। তেনেদৰে পঞ্চায়তৰ জিআৰএছগৰাকীয়ে প্রধানমন্ত্রী আৱাস যোজনা, জৱ কার্ড, এনৰেগা আঁচনিৰ নামত ধন সংগ্ৰহ কৰা বুলিও অভিযোগ উত্থাপিত হৈছে।
এই সন্দর্ভত ইতিমধ্যে বঙাইগাঁও জিলা পৰিষদৰ মুখ্য কাৰ্যবাহী বিষয়াক অভিযোগ পত্র দাখিল কৰাৰ লগতে ইয়াৰ প্রতিলিপি স্থানীয় বিধায়কক প্ৰদান কৰা হৈছে। অভিযোগ পত্রত সচিব চিত্ত ৰায় আৰু জিআৰএছ ছহিদুলক পঞ্চায়তখনৰ পৰা বদলি কৰাৰ বাবে দাবী জনায় যদিও এইক্ষেত্ৰত কোনো ব্যৱস্থা গ্রহণ নকৰিলে।
উল্লেখ্য যে মহিলাক সৱলীকৰণ তথা পঞ্চায়তত মহিলাৰ প্ৰতিনিধিত্ব সুনিশ্চিত কৰাৰ বাবে পঞ্চায়তখনত সভাপতিৰ আসনখন মহিলাৰ বাবে সংৰক্ষণ কৰা হয় যদিও পঞ্চায়তখনত এতিয়া সভানেত্ৰীৰ স্বামী নাছিৰুদ্দিনে সৰ্বময়কৰ্তা হৈ পৰিছে। এনে অৱস্থাত সচিব চিত্ত ৰায়ে আন সদস্য-সদস্যাসকলৰ অস্থিত্বক একপ্ৰকাৰ নস্যাৎ কৰি কাৰ্যকৰী সভাকে ধৰি কোনো ধৰণৰ সভা-সমিতি অনুষ্ঠিত নকৰাকৈ পঞ্চায়তৰ কাম-কাজ চলাই নিয়া বুলিও অভিযোগ উত্থাপন কৰিছে পঞ্চায়তবাসীয়ে।
এই লৈ যোৱা ২১ আগষ্টত পঞ্চায়তখনৰ একাংশ নির্বাচিত সদস্যই জিলা পৰিষদৰ মুখ্য কাৰ্যবাহী বিষয়াক অভিযোগ দাখিল কৰে। অভিযোগ পত্ৰত উল্লেখ কৰা মতে, পঞ্চায়ত সভানেত্রী তাহমিনা খাতুন, পঞ্চায়ত সচিব চিত্ত ৰায় আৰু জিআৰএছ ছহিদুল আলম আহমেদে পঞ্চায়তীৰাজ ব্যৱস্থা ধোঁৱাচাঙত তুলি নির্বাচিত একাংশ সদস্যৰ স’তে কোনো ধৰণৰ আলোচনা নকৰাকৈ ২০২৬-২৭ বৰ্ষৰ বছৰেকীয়া আঁচনিসমূহ প্ৰস্তুত কৰাত পঞ্চায়তখনৰ ইছৱপুৰ খণ্ডত কোনো আঁচনি গ্ৰহণ নকৰাত উন্নয়নৰ পৰা বঞ্চিত হোৱাৰ আশংকাত ভুগিছে ৰাইজ। পঞ্চায়তখনৰ বিৰুদ্ধে উত্থাপিত এনে অভিযোগ ঊর্ধতন কর্তৃপক্ষক তদন্তমূলে ব্যৱস্থা গ্ৰহণৰ দাবী জনাইছে ৰাইজে।
