Nepal’s 13 hydropower projects have been destroyed by floods:
দৈনিক অগ্ৰদূত ডিজিটেল ডেস্ক:যোৱা ২৬ আগষ্টত আকস্মিক বানে নেপালৰ কমেও ১৩ টা জলবিদ্যুৎ প্ৰকল্পৰ ক্ষতিসাধন কৰে। ফলত দেশখনৰ বিদ্যুৎ উৎপাদনৰ পৰিমাণ ব্যাপক হাৰত হ্রাস পাইছে সেয়েহে সম্প্রতি দেশখনে ভাৰতলৈ বিদ্যুৎৰ ৰপ্তানি প্রায় ৫০ শতাংশ হ্রাস কৰিছে। উচ্চস্তৰীয় চৰকাৰী সূত্ৰই প্ৰকাশ কৰা অনুসৰি নেপালে ভাৰতলৈ দিনে আঠশ মেগাৱাট বিদ্যুৎ শক্তি ৰপ্তানি কৰি আছিল।
এই জলপ্রলয়ত ১৩ টাকৈ জলবিদ্যুৎ প্ৰকল্পৰ বিস্তৰ ক্ষতিসাধন হোৱাত বিদ্যুৎ উৎপাদনত যি ব্যাঘাত জন্মিছে তাৰ বাবে দেশখনে ভাৰতলৈ বিদ্যুতৰ ৰপ্তানিৰ পৰিমাণ চাৰিশ মেগাৱাট হ্ৰাস কৰিছে। শেহতীয়া বিধ্বংসী আকস্মিক বানত ক্ষতিগ্রস্ত হোৱা নেপালৰ জলবিদ্যুৎ প্রকল্পসমূহৰ অন্যতম হৈছে ১৪ মেগাৱাট বিদ্যুৎ উৎপাদনক্ষম দেবীঘাট জলবিদ্যুৎ প্রকল্প।
এই বানত ক্ষতিগ্রস্ত দেশখনৰ আন জলবিদ্যুৎ প্রকল্পসমূহ হ’ল আপাৰ ত্রিশূলী (২১৬ মেগাৱাট বিদ্যুৎ উৎপাদনক্ষম), ৰসুয়াগঢ়ী (১১১ মেগাৱাট), ৰাসুয়া ভোটেকোশী (১২০ মেগাৱাট), সানজেন খোলা (৭৮ মেগাৱাট), আপাৰ মইলুং এ (৬.৪২ মেগাবাট), মইলুং খোলা (৫ মেগাৱাট), লাইডং খোলা (২০ মেগাৱাট), চিলিমে (২২ মেগাৱাট), ত্রিশূলী হাইড্র’পাৱাৰ (২৪ মেগাৱাট) , আপাৰ ত্রিশূলী ৩-এ (৬০ মেগাৱাট), আপাৰ ত্রিশূলী ৩-বি (৩৭ মেগাবাট) আৰু মিডল ত্রিশূলী গংগা (১৫.৬ মেগাবাট) ।
এইসমূহ জলবিদ্যুৎ প্ৰকল্পৰ চিলিমে আৰু ত্রিশূলীৰ পৰা বাংলাদেশেও বিদ্যুৎ ক্রয় কৰে। গতিকে নেপালৰ এই জলপ্ৰলয়ে ভাৰত আৰু বাংলাদেশৰো পোনপটীয়া ক্ষতি কৰাৰ আভাস স্পষ্ট হৈছে। উল্লেখ্য যে নেপালে নিতৌ ৪,৩০০ মেগাৱাট বিদ্যুৎ উৎপাদন কৰে। এই বিদ্যুতৰ ৯০ শতাংশই দেশখনে জলবিদ্যুৎ প্রকল্পসমূহৰ পৰা উৎপাদন কৰে।
