TigerShroffAttack : দৈনিক অগ্ৰদূত ডিজিটেল ডেস্কঃ বলীউড অভিনেতা টাইগাৰ শ্ৰফৰ ওপৰত আক্ৰমণৰ ঘটনাৰ দায় ইতিমধ্যে স্বীকাৰ কৰিছে গেংষ্টাৰ লৰেন্স বিষ্ণোইৰ ঘনিষ্ঠ লোকসকলে। তথ্য অনুসৰি,এই আক্ৰমণৰ বাবে সুদূৰ অমৃতসৰৰ পৰা পিষ্টল আৰু গুলী মুম্বাইলৈ অনা হৈছিল।
ইয়াৰ পূৰ্বে ৰাজস্থানৰ কোটাৰ পৰা তিনিজনক গ্ৰেপ্তাৰ কৰা হৈছিল। মঙলবাৰে এই ঘটনাত আৰু চাৰিজনক গ্ৰেপ্তাৰ কৰিছে আৰক্ষীয়ে। তেওঁলোকৰ মাজত দুগৰাকী মহিলাও আছে।
আৰক্ষীৰ সূত্ৰ অনুসৰি, ধৃতকেইজন হৈছে ২১ বছৰীয়া কুণাল, ১৯ বছৰীয়া সুমিত, ২৩ বছৰীয়া ৰাধা আৰু ২৩ বছৰীয়া ববিতা। দিল্লী আৰু সোণীপত অঞ্চলৰ পৰা তেওঁলোকক গ্ৰেপ্তাৰ কৰা হৈছে। মূলতঃ আক্ৰমণকাৰীসকলৰ হাতত অস্ত্ৰ তুলি দিয়াৰ কামৰ স’তে তেওঁলোক জড়িত আছিল বুলি সন্দেহ কৰা হৈছে।
চাৰিওজনকে ট্ৰেনজিট ৰিমাণ্ডত নিজৰ জিম্মালৈ লৈ মহাৰাষ্ট্ৰ আৰক্ষীয়ে জেৰা চলাইছে। ইয়াৰ পূৰ্বে গ্ৰেপ্তাৰ কৰা তিনিজন মুম্বাই আৰক্ষীৰ জিম্মাত আছে।
আৰক্ষীৰ দাবী, টাইগাৰ আক্ৰমণকাৰীসকলৰ প্ৰকৃত লক্ষ্য নাছিল। তেওঁলোকৰ লক্ষ্য আছিল বলীউড অভিনেতা ছলমান খান। বান্দ্ৰাত থকা ছলমানৰ ঘৰৰ সন্মুখৰ পৰা ঘূৰি আহিছিল বিষ্ণোই গেঙৰ সদস্যসকল। তাত নিৰাপত্তাৰ কটকটীয়া ব্যৱস্থা দেখি সেই পৰিকল্পনা বাতিল কৰা হয়। তাৰ পিছতে ছলমানৰ ঘনিষ্ঠ অভিনেতা টাইগাৰৰ ওপৰত আক্ৰমণৰ চেষ্টা কৰে তেওঁলোকে। যোৱা ১৮ অক্টোবৰৰ সন্ধিয়া টাইগাৰৰ গাড়ী লক্ষ্য কৰি এটাৰ পিছত আনটো গুলীচালনা কৰে আক্ৰমণকাৰীসকলে।
অভিনেতাজন আঘাতপ্ৰাপ্ত নহ’লেও তেওঁৰ গাড়ীৰ চালক আৰু এগৰাকী অনুৰাগী গুলীবিদ্ধ হয়। তেওঁলোক চিকিৎসালয়ত চিকিৎসাধীন হৈ আছে। বিষ্ণোইৰ ঘনিষ্ঠ গেংষ্টাৰ অনিল পণ্ডিত আৰু হৰমন সান্ধুৱে সামাজিক মাধ্যমত এই আক্ৰমণৰ দায় স্বীকাৰ কৰিছে।
মঙলবাৰে গ্ৰেপ্তাৰ কৰা চাৰিজন এই আক্ৰমণৰ স’তে কেনেদৰে জড়িত? ডিচিপি প্ৰবীণকুমাৰ ত্ৰিপাঠীয়ে জনোৱা অনুসৰি, অভিযুক্ত কুণাল কাৰাগাৰত আছিল। শেহতীয়াকৈ জামিনত মুক্তি লাভ কৰে তেওঁ। এগৰাকী বন্ধুৱে তেওঁক বিষ্ণোই গেঙৰ অনিলৰ সৈতে চিনাকি কৰাই দিছিল। অনিলৰ নিৰ্দেশতে কুণালে অমৃতসৰৰ পৰা প্ৰথমে এটা পিষ্টল আৰু ২০ ৰাউণ্ড গুলী সংগ্ৰহ কৰে। প্ৰায় দুমাহ পূৰ্বে ৰাধাৰ স’তে তেওঁৰ চিনাকি হৈছিল। পিষ্টলটো লৈ মুম্বাইলৈ যাবলৈ ৰাধাক মান্তি কৰায় কুণালে।
১৫ অক্টোবৰত ৰাধা আৰু তেওঁৰ বান্ধৱী ববিতাক লৈ তেওঁ নতুন দিল্লী ৰে’ল ষ্টেচনত উপস্থিত হয়। ৰাধাৰ বেগত পিষ্টলটো আছিল। ১৭ অক্টোবৰত তেওঁলোক দাদৰ ষ্টেচনত নামে। কুণালে এটা নিৰ্দিষ্ট সুৰক্ষিত (এনক্ৰিপ্টেড) এপৰ জৰিয়তে তেওঁলোকৰ সৈতে যোগাযোগ ৰক্ষা কৰি আছিল।
দাদৰত নামি ৰাধা আৰু ববিতাই এখন হোটেলত আশ্ৰয় লৈছিল। পুৱা প্ৰায় ১১ বজাত তেওঁলোকৰ পৰা পিষ্টল থকা বেগটো এজন কিশোৰে লৈ যায়। তাৰ পিছদিনা, অৰ্থাৎ ১৮ অক্টোবৰৰ সন্ধিয়া টাইগাৰক লক্ষ্য কৰি গুলীচালনা কৰা হয়। সমগ্ৰ ঘটনাৰ পিছত টাইগাৰ আৰু ছলমানৰ নিৰাপত্তা কেইবাগুণো বৃদ্ধি কৰা হৈছে। ছলমানৰ আন ঘনিষ্ঠ লোকসকলৰ নিৰাপত্তাও বৃদ্ধি কৰিছে আৰক্ষীয়ে। বান্দ্ৰাত থকা ছলমানৰ ঘৰৰ সন্মুখৰ পথত বেৰিকেড স্থাপন কৰা হৈছে।
