‘‘উত্তৰ পূৰ্বাঞ্চলত খাদ্য সংসাধন ক্ষেত্ৰখনৰ প্ৰচুৰ সম্ভাৱনা আছে আৰু ই অঞ্চলটোত বৃহৎ অৰ্থনৈতিক উত্তৰণ তথা নিয়োজনৰ সুবিধা প্ৰদান কৰিব পাৰে’’, খাদ্য সংসাধন উদ্যোগ বিভাগৰ কেন্দ্ৰীয় ৰাজ্যিক মন্ত্ৰী ৰামেশ্বৰ তেলীয়ে দেওবাৰে আকাশবাণী গুৱাহাটীকেন্দ্ৰৰ ‘‘প্ৰতিৰোধ’’ শীৰ্ষক এক অনুষ্ঠানৰ সাক্ষাৎকাৰত এইদৰে কয় ৷ লগতে কয় যে খাদ্য অত্যাৱশ্যকীয় সামগ্ৰীৰ ভিতৰত অন্তৰ্ভুক্ত হোৱা হেতুকে তেওঁৰ মন্ত্ৰালয়ে খাদ্য সংসাধনৰ সকলো উদ্যোগৰ কাৰ্যকলাপ পুনৰাম্ভ কৰিবলৈ নিৰ্দেশ দিছে যাতে তলাবন্ধৰ সময়ছোৱাত খাদ্য সামগ্ৰীৰ নাটনি নহয় ৷ উত্তৰ পূৰ্বাঞ্চলৰ ৰাজ্যকেইখনত খাদ্য সংসাধনৰ সকলো গোটে নিজৰ কাম আৰম্ভ কৰিছে যদিও কিছুমান অঞ্চলত শ্ৰমিকৰ নাটনি হোৱা বাবে কাম আৰম্ভ কৰিব পৰা নাই বুলিও তেওঁ উল্লেখ কৰে ৷
উদ্যোগসমূহৰ কাম আৰম্ভ হোৱাটো নিশ্চিত কৰিবলৈ মন্ত্ৰালয়ে ন’ডেল বিষয়া নিযুক্ত কৰিছে বুলি তেওঁ জানিবলৈ দিয়ে ৷ খাদ্য সংসাধন উদ্যোগ মন্ত্ৰালয়ে হাতত লোৱা কেইবাটাও প্ৰকল্পৰ ওপৰত আলোকপাত কৰি মন্ত্ৰীগৰাকীয়ে কয় যে মন্ত্ৰালয়ে ছিকিমৰ বাহিৰে উত্তৰ পূৰ্বাঞ্চলৰ প্ৰতিখন ৰাজ্যতে ১৫০ বিঘা ভূমি এলেকা সামৰি মেগা ফুড পাৰ্ক স্থাপন কৰিবলৈ পৰিকল্পনা হাতত লৈছে ৷ অসমত নলবাৰী জিলাৰ টিহুত ইতিমধ্যেই এই মেগা ফুড পাৰ্কৰ কাম আৰম্ভ হৈছে ৷ এই কথা উল্লেখ কৰি তেওঁ কয় যে এই মেগা পাৰ্কসমূহত প্ৰায় ২০ৰ পৰা ২৫টা গোট থাকিব যাৰ দ্বাৰা পাঁচ হাজাৰ পৰ্যন্ত লোক প্ৰত্যক্ষ আৰু পৰোক্ষভাৱে নিয়োজিত হ’ব ৷
তাৰোপৰি উত্তৰ পূৰ্বাঞ্চলৰ ৰাজ্যসমূহত খাদ্য সংসাধনৰ উদ্যোগ স্থাপন কৰিবলৈ বিচৰা যিকোনো উদ্যমী লোকক মন্ত্ৰালয়ৰ তৰফৰ পৰা ৭৫% পৰ্যন্ত ৰাজসাহায্য প্ৰদান কৰা হ’ব ৷ আকাশবাণী গুৱাহাটীৰ সংবাদ সম্পাদক শ্ৰী মানস প্ৰতীম শৰ্মাই গ্ৰহণ কৰা সাক্ষাৎকাৰটোত তেলীয়ে ক’ভিড-১৯ ৰ সংক্ৰমণ ৰোধ কৰিবলৈ চৰকাৰ আৰু জনসাধাৰণৰ মাজত নিকট সমন্বয় স্থাপনৰ জৰিয়তে কেৰেলা চৰকাৰে সাফল্যৰ আৰ্হি দাঙি ধৰা বুলি জানিবলৈ দিয়ে ৷ এই পৰিপ্ৰেক্ষিততে তেওঁ অসমৰ জনসাধাৰণকো কেন্দ্ৰীয় আৰু ৰাজ্য চৰকাৰে জাৰি কৰা ক’ভিড-১৯ সম্পৰ্কীয় নিৰ্দেশনাসমূহ পালন কৰিবলৈ আহ্বান জনায় ৷
