বাটে-ঘাটে যানজট যিমানেই বৃদ্ধি পাইছে, সিমানেই জনপ্রিয়তা বাঢ়িছে অটমেটিক ট্রেন্সমিচনৰ গাড়ীসমূহৰ। ভাৰতীয় বজাৰত সেয়ে সাম্প্রতিক সময়ত অন্যতম জনপ্রিয় বাহন হৈ পৰিছে ছাব কম্পেক্ট এছইউভিসমূহ। এই গাড়ীসমূহৰ মাজতাে আকৌ পেট্রল মডেলৰ অটমেটিক ট্রেন্সমিচনৰ ভেৰিয়েণ্টৰ সমাদৰ সর্বাধিক হৈছে। বর্তমানে ভাৰতীয় বজাৰত সর্বাধিক জনপ্রিয়তা অর্জন কৰা ১০ লাখ টকাৰ তলৰ পেট্রল অটমেটিক ছাব কম্পেক্ট এছইউভিনাে কোনকেইখন তাকে জানাে আহক..
ৰেন’ কিগাৰ
এই গাড়ীখনৰ দাম বজাৰত ইয়াৰ অন্য প্রতিদ্বন্দ্বী মডেলসমূহৰ তুলনাত যথেষ্ট কম। গাড়ীখনত আছে এক লিটাৰৰ পেট্রল ইঞ্জিন। লগতে আছে এএমটি ট্রেন্সমিচনৰ সুবিধা। ৬.৫৯ লক্ষ টকাৰ পৰা দাম আৰম্ভ হােৱা বাহনখন ভাৰতত বর্তমানে সবাতােকৈ সস্তাৰ পেট্রল অটমেটিক ট্রেন্সমিচন এছইউভি। এক লিটাৰৰ পেট্রল ইঞ্জিনযুক্ত পাঁচ স্পীড এএমটি ভেৰিয়েণ্টৰ দাম সর্বাধিক আঠ লক্ষ টকা হােৱাৰ বিপৰীতে এক লিটাৰৰ পেট্রল ইঞ্জিনযুক্ত চিভিটি ভেৰিয়েণ্টৰ দাম ৮.৬০ লক্ষ টকাৰ পৰা ৯.৫৫ লক্ষ টকাৰ ভিতৰত।
নিছান মেগনাইট
কিগাৰৰ দৰেই এক লিটাৰৰ পেট্রল ইঞ্জিনত উপলব্ধ নিছানৰ এই জনপ্রিয় এছইউভিখন। অৱশ্যে কেৱল টার্বো ইঞ্জিনতহে এই গাড়ীখন পােৱা যাব। লগতে থাকিব চিভিটি ট্রেন্সমিচনৰ সুবিধা। ১০ লক্ষ টকাৰাে কম দামত মেগনাইটৰ টপ ভেৰিয়েন্ট ক্রয় কৰিব পাৰিব গ্রাহকে। বাহনখনত আছে এটা ৩৬০ ডিগ্ৰীৰ কেমেৰা, সাত ইঞ্চি বহল টিএফটি ডিজিটেল ড্রাইভাৰ ইনষ্টুমেন্ট ক্লাষ্টাৰ। এইবােৰৰ উপৰি বাহনখনত এয়াৰ পিউৰিফায়াৰ, জেবিএল ছাউণ্ড ছিষ্টেম আৰ ৱায়াৰলেছ চার্জিং আদিৰ দৰে অত্যাধুনিক সা- সুবিধা আগবঢ়াইছে নিছানে। উল্লেখ্য যে নিছান মেগনাইটৰ এক লিটাৰৰ টার্বো পেট্রল ইঞ্জিনযুক্ত চিভিটি ভেৰিয়েন্টখনৰ দাম ৮.১৯ লক্ষ টকাৰ পৰা ৯.৭৫ লক্ষ টকাৰ ভিতৰত।
টাটা নেক্সন
ভাৰতীয় বজাৰত ৰেন’ কিগাৰে মুক্তি লাভ কৰাৰ আগলৈ নিছান মেগনাইট আৰু টাটা নেক্সণ নামৰ মডেল দুখনেই এই শ্ৰেণীৰ সবাতােকৈ সস্তীয়া গাড়ী আছিল। টাটা নেক্সনত আছে ১.২ লিটাৰৰ টার্বো ইঞ্জিনৰ ছয় স্পীড এএমটি ট্রেন্সমিচন। এই ভেৰিয়েন্টসমূহৰ প্ৰাৰম্ভিক দাম ৮.৬ লক্ষ টকা হােৱাৰ বিপৰীতে সর্বাধিক দাম হৈছে ১১.৩ লক্ষ টকা। বাহনখনৰ এক্সএম (এছ) ভেৰিয়েন্টখনত ছানৰুৰাে সুবিধা আছে।
