আৰু মাত্ৰ তিনি দিন। কৰ্মচাৰী ভৱিষ্যত নিধিৰ (এমপ্লয়িজ প্ৰভিডেন্ট ফান্দ বা ইপিএফ) ‘ইউনিভাৰ্চেল একাউণ্ট নম্বৰৰ’ (ইউএএন) ৰ স’তে বাধ্যতামূলকভাৱে আধাৰ কাৰ্ড সংযোগ কৰাৰ সময়সীমা ৩০ নৱেম্বৰত সমাপ্ত হ’ব।
যদি সেই সময়সীমাৰ ভিতৰত পিএফ-আধাৰ যোগ কৰা নহয় তেন্তে কৰ্মচাৰীসকল সকলো পিএফ সেৱাৰ পৰা বঞ্চিত হ’ব পাৰে।
কেন্দ্ৰৰ নিৰ্দেশনাৱলীত কোৱা হৈছে যে যদি পিএফ-আধাৰ সংযুক্ত নহয়, ইপিএফ খণ্ডৰ কৰ্মচাৰীসকলৰ দৰমহাৰ পৰা কৰ্তন কৰা আৰু নিয়োগকৰ্তাই পৰিশোধ কৰা ধন পিএফ বিভাগৰ একাউণ্টত জমা কৰা নহ’ব। চাকৰি এৰি দিয়াৰ পাছত পিএফৰ ধন উলিওৱাতো সমস্যা হ’ব।
কোড অফ ছ’চিয়েল ছিকিউৰিটি -২০২০ৰ ১৪২ ধাৰা সংশোধন কৰি কেন্দ্ৰই এই বছৰৰ জুন মাহত নিৰ্দেশ দিছিল যে ৩১ আগষ্টৰ ভিতৰত ইউএএনৰ স’তে আধাৰ কাৰ্ড সংযোগ নকৰা পিএফ সদস্যসকলক পিএফ খণ্ডত তেওঁলোকৰ দৰমহাৰ পৰা কৰ্তন কৰা নহ’ব আৰু নিয়োগকৰ্তাই পৰিশোধ কৰা ধন পিএফ বিভাগৰ একাউণ্টত জমা কৰা নহ’ব।
তেওঁলোকসকলো পিএফ সেৱাৰ পৰা বঞ্চিত হ’ব। সেই সময়ত চাকৰি এৰিলে পিএফৰ ধন উলিয়াব নোৱাৰিব।
ঔদ্যোগিক কোম্পানীসমূহৰ সংগঠন এছ’চিয়েশ্যন অৱ ইণ্ডাষ্ট্ৰিজে কেন্দ্ৰৰ পদক্ষেপৰ বিৰুদ্ধে দিল্লী উচ্চ ন্যায়ালয়ত গোচৰ ৰুজু কৰে।
আবেদনকাৰী দলে দাবী কৰিছিল যে বহুতো কোম্পানীয়ে নিয়মটোৰ স’তে সমস্যাৰ সন্মুখীন হৈছিল। বহুক্ষেত্ৰত, প্ৰব্ৰজনকাৰী শ্ৰমিকসকলে ঘৰৰ পৰা কামলৈ উভতি অহাৰ পাছত নথিপত্ৰ দিয়াত অসুবিধা পাইছে।
দিল্লী উচ্চ ন্যায়ালয়ে আৱেদনকাৰী পক্ষৰ যুক্তিৰ পাছত আধাৰ কাৰ্ডক পিএফৰ স’তে সংযোগ কৰাৰ সময়সীমা ৩০ নৱেম্বৰলৈ পিছুৱাই দিয়াৰ নিৰ্দেশ দিছিল।
গোচৰটোৰ ৰায়ত দিল্লী উচ্চ ন্যায়ালয়ে কয় যে পিএফৰ স’তে আধাৰ সংযোগৰ অভিযোগ শুনিবলৈ পিএফৰ আচি পৰিষদে (ইপিএফঅ’) ‘অভিযোগ নিষ্পত্তি বিষয়া’ নিযুক্ত কৰিব।
আবেদনকাৰী কোম্পানী বা আন যিকোনো নিয়োগকৰ্তাই বিষয়াজনৰ স’তে যোগাযোগ কৰিব পাৰে যাতে পিএফৰ ধন জমা পলম নহয়।
ইয়াৰ উপৰিও, নিয়োগকৰ্তাই আধাৰ কৰ্তৃপক্ষৰ দ্বাৰা প্ৰমাণীকৰণৰ বাবে অপেক্ষা নকৰাকৈ পিএফ-আধাৰ যোগ দিয়া সকলৰ বাবে পিএফ ধন জমা কৰিব পাৰে।
কেন্দ্ৰই পাছত উত্তৰ-পূবৰ ৰাজ্যসমূহত বাস কৰা সকলো কৰ্মচাৰী আৰু অন্যান্য ৰাজ্যৰ কিছুমান উদ্যোগৰ (বিড়ি, নিৰ্মাণ আৰু বৃক্ষৰোপণ উদ্যোগ যেনে চাহ, কফি, মৰাপাট, কাজু বাদাম, ইলাচী আদি শিল্প) কৰ্মচাৰীসকলৰ বাবে পিএফৰ স’তে আধাৰ সংযোগ ৩১ ডিচেম্বৰলৈ বৃদ্ধি কৰে।